Ane Amalie Kuitse inuusuttut akornanni pimmatiginnittoqartarnera nakuusertoqartarneralu akuersaarnagit atsiornernik katersisimavoq, juunillu 22-anni atsiornerit borgmesterimut Avaaraq Olsenimut tunniuppai.
Ane Amalie Kuitse Facebookimi gruppemik ”Kalaallit nunatsinni qinngasaarisut annersaasullu akuerinngilakka”-mik taasaminik pilersitsisimavoq, tassunga pimmatiginnittarnermut akiuiniarnermut tunngasunik oqallissaarutinik paasissutissanillu ikkussuisarpoq. Taamatut suliniuteqarneq maanna atsiortitsinernik inerneqarpoq.
”Isumaqarpunga pingaaruteqartut uagut inuiaqatigiittut, pingaartumik inersimasuusugut, pimmatiginnittarnermut nakuusertarnermullu akerliunitsinnik takutitsissalluta. Oqartussanik utaqqiinnassanngilagut. Ajornartorsiut akiorniarneranut nammineq iliuseqarnissarput toqqarsinnaavarput. Taamaattumik nammineq kajumissusera atorlugu ajornartorsiut akiorniarlugu suliaqarpunga”, Ane Amalie Kuitse oqarpoq.
Ane Amalie Kuitse borgmesterimut Avaaraq Olsenimut juunip 22-anni 2023-mi atsiornerit tunniunnissaannut periarfissinneqarpoq.
”Nuannaarutigiuaannarpara innuttaasut unammilligassagut pillugit aaqqiissutaasinnaasunik ujartuigaangata. Tamakku tigulluartarpakka, pingaartumik sulinitsinni ukkatarisatsinnut tunngasuugaangata. Taamaattoqarneratami takutittarmagu suliagut pillugit tapersersorneqarluta. Kommuneqarfik Sermersuumi Pitsaaliuinermut Periusissiamik suliaqaleruttorpugut, tassanilu pimmatiginnittarnermut akiuiniarneq ilaalluinnarpoq”, borgmesteri Avaaraq Olsen oqarpoq.
Meeqqanut Atuarfeqarnermullu Ingerlatsivik pimmatiginnittarnermut pinaveersaartitsineq pillugu immikkut ittumik sammisaqartitsinikuupput. Atuarfinni, klubbini, atuartut angerlarsimaffiini, MISI-mi kiisalu AKO-ni FRO-nilu aqutsisunut apriilimi immikkut ittumik sammisaqartitsipput aamma ulluunerani neqeroorutini aqutsisunut juunimi immikkut ittumik sammisaqartitsipput.
Ane Amalie Kuitse oqaluttuarpoq atsiornerit 110-t 30 minutsit ingerlaneranni Amisut eqqaanni katersorsimallugit.