16. & 17. august Tasiilami katersortarfimmi Namminersorlutik Oqartussat Kommuneqarfik Sermersoorlu suleqatigiillutik, takornariaqarneq inuussutissarsionerlu pillugit isumasioqatigiisitsissapput. Takornariaqarneq pillugu suleriusissaq pillugu Namminersorlutik Oqartussat tusarniaassapput Tunumilu inuussutissarsiornermi aporfiusinnaasut periarfissallu qulaajarneqassallutik.
Sisamanngorpat 16. august isumasioqatigiinnermi takornariaqarneq sammineqassaaq, ullullu aappaani inuussutissarsiorneq sammineqassalluni. Isumasioqatigiinnerup ingerlanerani workshopit pingasut ingerlanneqassapput. Isumasioqatigiinneq Inuussutissarsiornermut Nukissiuuteqarnermullu Naalakkersuisumit Aqqalu Jerimiassenimit aamma Borgmester Asii Chemnitz Narupimit ammarneqassaaq.
Isumasioqatigiinneq innuttaasunit pulaarneqarsinnaavoq tallimangornermi nalunaaqutaq 15.00, tassani erinarsoqatigiit aliikkusersuitinneqassallutik pulaartunullu kaffeqarumaarpoq kaageqarlunilu. Isumasioqatigiinnermi peqataasut Tasiilami innuttaasunit oqaloqatigineqarsinnaajumaarput, soorlu Greenland Business, Visit Greenland, Namminersorlutik Oqartussat, Kommuneqarfik Sermersooq aamma Destination East Greenland.