**MATOQQAGALLARPOQ**
Nittartakkami uani atoqqitassaasivik Atoqqik pillugu annerusumik atuarsinnaavutit. Ilaatigut pequttatit atornikut angerlarsimaffimmi allami nutaatut atoqqissinnaanerat paasisaqarfigisinnaavat.
Toqqaannartumik atoqqiineq – Atoqqik
Atoqqik tassaavoq Sermersuup Eqqagassaleriffiata atornikuerniarfia.
Uani pequtikutit atorluarneqarsinnaasut allallu atortut atoqqinneqarsinnaasut tunniussinnaavatit. Atortut piginnittunut nutaanut ingerlateqqinneqassapput taamaaliornikkut Kommuneqarfik Sermersuumi atoqqiinissaq qulakkiissavarput.
Toqqaannartumik atoqqiineq sunaanersoq, soorlu atornikuerniarfiliorsimanersugut il.il ataani atuarsinnaavat.
Sooq Kommuneqarfik Sermersooq toqqaannartumik atoqqiinermut pisiniarfiliorpa?
Atortoq eqqagassatut katersorneqaqqaarani tunineqarpat tunniunneqarpalluunniit toqqaannartumik atoqqiineq pineqartarpoq. Ullumikkut tigooraavimmut tunniunneqartartut amerlasuut ajoquteqartanngillat taamaattumillu allanit atorneqarsinnaallutik akikitsunngorlugillu pisiarineqarsinnaallutik.
Kommuneqarfik Sermersuup atornikuerniarfik Atoqqik aqqutigalugu kissaatigaa toqqaannartumik atoqqiinerup siuarsarnissaa, atorluarneqarsinnaasullu amerlanerit Eqqagassaleriffimmut tunniunneqartartut atuisunut nutaanut ingerlateqqinneqarsinnaanerat qulakkiissallugu.
Toqqaannartumik atoqqiineq nunarsuarmi anguniakkanut 12.4-mut 12.5-imullu attuumassuteqarpoq, tassani pinaveersaartitsineq, annikilliliineq atoqqiinerlu atorlugit eqqakkanik passussinerup pitsanngorsarnissaa eqqakkallu annikillisinnissat siunertaavoq.
Atornikuerniarfimmi suna pisiarineqarsinnaava?
Atoqqimmi pequtit atoqqitassat soorlu sofat, siniffiit, ilisiviit, issiaviit allallu atortut minnerit soorlu qulliit allallu angerlarsimaffimmi atorneqarsinnaasut pisiarisinnaavatit.
Sanaartornermi atortussiat atoqqitassat tamaasa atoqqitassanut containeritsinnut katersornikuuagut. Uani angerlarsimaffinni illuaqqamiluunniit amigaatitit takusinnaavatit.
NAtoqqimmi pequtinik atortunilluunniit atoqqissinnaasunik tigusaqaraangatta immikkoortiteqqaartarpavut pequtit atortullu atoqqinneqarsinnaanngitsut piiarneqartarlutik.
Nioqqut naatsorsuutigisatsinnit tuniniarneqarsinnaanngippat ikuallaavimmukaanneqassaaq atoqqinneqartussatulluunniit nassiunneqassalluni, taamaaliornikkut kiassarnermut nioqqutinullu nutaanut iluaqutaasinnaallutik.
Elektronikkinik, nillataartitsiviit assigisaannillu, atisanik,umiatsianik biilinillu Atoqqik tuniniaaffiusanngilaq.
Atornikuerniarfimmi pequtit atornikut qanoq akeqarpat?
Nioqqutit pitsaassusaat aallaavigalugu akit aalajangersarneqartarput. Taamaattumik uani akit tamaasa taasinnaanngilagut. Nioqqutit amerlanerit 500 kr. ataallugu akeqassapput immikkullu ittuni atortut/pequtit akiisa 500 kr. qaangersinnaallugu.
Imaaliussaatit:
Atoqqimmi pisiniaruit nioqqutit qorsummik, aappilarujuttumik aappaluttumillu qalipaatillit toqqarsinnaavatit.
Nioqqutit qorsunnik qalipaatillit tassaapput pisiniarfitsinniittuutivut atoqqitassat nutaanerit. Tamakkiisumik akilerlugit tunineqartarput.
Aappilarujuttumik qalipaatillit piffissaq sivisulaartumi pigaavut taamaattumillu 50 %-imik akikillineqarput
Nioqqutit aappaluttumik qalipaatillit “periarfissaq kingulleq” atorlugu nioqqutaapput akeqanngillat angerlaateriaannaallutillu.
Maluginiaruk nioqqutit akikitsut akii tamakkiisooriarlutik toqqaannartumik akeerutsinneqarsinnaammata.
Qanoq ilillunga atornikuerniarfimmut tunniussisinnaavunga?
Nutaanik pequteqalersimaguit nuuttussaaguilluunniit pequtikutit suli atorluarsinnaasut Atoqqimmi tuniniaqqitassanngorlugit tigorusuppagut!
Pequtitit atortutilluunniit atoqqinneqarsinnaasut tunniukkusukkukkit imaaliussaatit:
1. Pequtitit atortutilluunniit atoqqinneqarsinnaasut Nuummi Ikuallaaviup eqqaanut eqqagassalerivimmut tigooraaviup ammanerani aggiutikkit
2. Pequtitit atortutilluunniit atoqqissinnaasut nalilersortinniarlugit immikkoortiterivimmi sulisoq attavigiuk.
3. Sulisup atoqqissinnaasutut nalilikkani tigoorassavai. Sinneri angerlarsimaffinnut namminersortunullu malittarisassat atuuttut atorlugit igitassatut tunniunneqassapput.
4. Pequtikutit atortutillu atoqqissinnaasut Atoqqimmi tuniniarneqaqqinnissaat ilisimallugu ilerasuuteqarnak angerlarit.*
Pequtikutit atoqqitassanngorlugit tunniukkusukkukkit Atoqqimmi nuannaarutigissavarput, pisiniarfitsinnullu atorsinnaasannik peqarnersugut alakkaasarnissannut tikilluaqqusaavutit.
*Pequtitit atortutillu atoqqissinnaasut atoqqitassanngorlugit toqqaannartumik tunniukkukkit akuerissavat Atoqqimmit tuniniarneqassasut piginnittunulluunniit nutaanut pequtitit atortutilluunniit atoqqissinnaasut tunniutissavatit.
Nioqqutit tunineri Atoqqiup aningaasarsiutigissagai siunertaanngilaq. Pequtinik atortunillu atoqqissinnaasunik tuniniaanermi isertitat pisiniarfiup ammatinneranut ussassaarutinullu atorneqassapput.
Atornikuerniarfik sumi nanisinnaavara?
Atornikuerniarfik Atoqqik Pukuffimmi Ikuallaaviup eqqaaniippoq. Ikuallaaviup tungaanut sanguguit isaariaq siullermi saamerlermiippoq. Pisiniarniaruit biilitit uani aamma uninngatissinnaavatit.
LINK til GOOGLE MAPS
Atornikuerniarfik qaqugukkut ammasarpa?
Atoqqiup ammasarfii:
Marlunngornerit nal. 14.00-17.30
Arfininngornerit nal. 10.00-14.00