Kommuneqarfik Sermersooq immikkoortunut pilersaarutinik ineriartortitserusuppoq, kommunip ineriartornissaanut qinikkat aalajangiinissaannut atugassanik toqqammavissanillu. Taamaattumik immikkoortut, immikkut ittumik pilersaarusiorfigineqarnissaannik nalunaarsorneqarsimasut pilersaarusiorneqassapput, qulequttat erseqqissumik killilikkat pillugit sammineqarniassammata.
Pilersaarutitut periusissiami P18-imi aalisarneq qitiutinneqartussatut allaaserineqarpoq. Tassani allaaserineqarpoq, kommunimi illoqarfinni nunaqarfinnilu umiatsiaararsortunut tunngaviusumik atugassarititaasut pillugit sukumiisumik immikkoortumut pilersaarusiortoqassasoq. Immikkoortumut pilersaarut Kommuneqarfik Sermersuumi immikkoortunut pilersaarutinut allanut attuumassuteqartinneqassaaq, tamatumuuna kommunip akisussaaffeqarfiisa ataavartumik ineriartortinneqarnissaannut attuumassuteqartinnissaa qulakkeerneqassalluni.