Utoqqaat pisinnaanerusut angerlarsimaffiat

Utoqqaat pisinnaanerusut angerlarsimaffiat Tasiilamiittut nunaqarfinniittullu sannarlugaanerujussuat nutaannginnerallu utoqqarnut peqqinnanngilluinnartumik sunniuppoq. Illut toqqavii qisuinnarnik toqqavilersugaapput, anorlertillugu illut aalasarput. Illullu qaliai silammut arlallit ammaannarput aput sialuk isugutallu oqunnguukkiartorluni. Utoqqarnut najugarisat peqqinnanngilluinnarput. Iserit saaffigineqartarsimagaluarpoq aaqqiissutaasinnaasunilli iluarsiissuteqanngisaannarsimapput. Alakkaannartarpaat allamillu sunagit.

Ukiut 25 angullugit illut pisoqaassuseqarput, nalitsinnut tulluanngilluinnarput pingaartumik sakkortuumik anorlertillugu utoqqaat taakkunani angerlarsimaffillit illunut allanut qimaasarsimapput. Utoqqarnut politikki kusanartoq eqqartumik timitaqassappat naleqquttumik toqqissisimanartumillu aaqqinneqarsinnaasariaqaraluarput.

1. Utoqqaat pisinnaanerusut illui qaqugukkut misissorneqartarpat?
2. Utoqqaat illui nutaanngilisut anorersuarnullu tulluanngitsut nutarsarnissaannik Kommuneqarfik Sermersooq pilersaaruteqarpa?
3. Qanga kingullermik utoqqaat qanimut tikillugit qullersanit tikillugit isumasiorneqarlutillu naapinneqarpat?
4. Taamaassimanngippat isumasiorneqarnissaannik Kommuneqarfik Sermersooq arlaannik pilersaarusiornikuunngila imaluunniit pilersaarusiussamaanngila?

Asasara Kommunalbestyrelsimi ilaasortaq, Laura Taunâjik.

Siullermik apeqqutigisannut qujanarujussuaq.

Ulloq 14. maaji 2020-mi allaffeqarfimmut apeqquteqaateqarputit una pillugu ”Utoqqaat pisinnaanerusut angerlarsimaffiat”.

Sanarfinermut Avatangiisinullu ingerlatsiviup apeqqutigineqartut imatut ittut tiguai:

1. Utoqqaat pisinnaanerusut illui qaqugukkut misissorneqartarpat?
2. Utoqqaat illui nutaanngilisut anorersuarnullu tulluanngitsut nutarsarnissaannik Kommuneqarfik Sermersooq pilersaaruteqarpa?
3. Qanga kingullermik utoqqaat qanimut tikillugit qullersanit tikillugit isumasiorneqarlutillu naapinneqarpat?
4. Taamaassimanngippat isumasiorneqarnissaannik Kommuneqarfik Sermersooq arlaannik pilersaarusiornikuunngila imaluunniit pilersaarusiussamaanngila?

Apeqqutinnut tunngavilersuutaasoq tassaavoq, utoqqaat pisinnaanerusut angerlarsimaffiat Tasiilamiittut nunaqarfinniittullu sannarlugaanerujussuat nutaannginnerallu utoqqarnut peqqinnanngilluinnartumik sunniuppoq. Illut toqqavii qisuinnarnik toqqavilersugaapput, anorlertillugu illut aalasarput. Illullu qaliai silammut arlallit ammaannarput aput sialuk isugutallu oqunnguukkiartorluni. Utoqqarnut najugarisat peqqinnanngilluinnarput. Iserit saaffigineqartarsimagaluarpoq aaqqiissutaasinnaasunilli iluarsiissuteqanngisaannarsimapput. Alakkaannartarpaat allamillu sunagit. Ukiut 25-t missaat angullugit illut pisoqaassuseqarput, nalitsinnut tulluanngilluinnarput pingaartumik sakkortuumik anorlertillugu utoqqaat taakkunani angerlarsimaffillit illunut allanut qimaasarsimapput. Utoqqarnut politikki kusanartoq eqqartumik timitaqassappat naleqquttumik toqqissisimanartumillu aaqqinneqarsinnaasariaqaraluarput.

Sanarfinermut Avatangiisinullu Ingerlatsivik ima akissuteqarpoq:

Asasara Laura,

Saaffiginnissutinnut qujanaq.

Kommuneqarfik Sermersuumi allaffeqarfiup piginnittutut Iserit A/S-imi aqutsisut ataavartumik ataatsimeeqatigisarpai.

Ataatsimiinnerni taama ittuni pissutsit assigiinngitsut soqutigisaqaqatigiilluni eqqartorneqartarput ilaatigut kommunip atuunnera aamma Iserit A/S-ip atuunnera ataatsimut paaseqatigiiffiunissaa ingerlaarfiilu qulakkeerniarlugit.

Saaffiginnissutaasoq una tunngavigalugu piginnittutut ataatsimiinnermi tulliani apeqqutitit qaqinneqassapput, pissutigalugu ataavartumik inissiat aserfallatsaalineqarneri matumani utoqqaat inissiaat ilanngullugit, illunik piginnittunit akisussaaffigineqarmata.

Tamaat isigalugu ilisimatitsissutigineqassaaq, Tunumi inissiat Ini A/S-imit nuunneqartut qanoq aserfallatsaalisassaatigineri pillugit Iserit A/S-imit ukkatarineqangaatsiarput, soorluttaaq ingerlatseqatigiiffiup Tunumi aserfallatsaaliuinermut tunngasut maannamiit pingaarnersiugarisaasa ilagigaat. Tasiilami nunaqarfiinilu ilinniarsimasunik sanasussaaleqisarnikkut piffissallu sanaartornissamut atugassap sivikittarnera peqqutaaqataalluni ukiumut suliassat qanoq amerlatigisut ajoraluartumik killeqartarput.

Sanasut sanaartukkanillu suliakkerneqartartut amerlasuut Tasiilami aallartitaqartarnissaannut soqutiginnileqqullugit Kommuneqarfik Sermersuumit aamma Iserit A/S-imit pilerisaarneqartarput.

Inuss.Inuull.

Hans Henrik Winther Johansen

Sanarfinermut Avatangiisinullu Ingerlatsivimmi pisortaq

Kommuneqarfik Sermersooq