Tasiilami nunaqarfinnilu ingeniørinik suleqatigiinnik angalasartunik pilersitsinissaq

Qulequtaq:

Tasiilamut nunaqarfiinullu Ingeniørimik angalasartussamik imaluunniit alakkaasarsinnaasumik Kommuneqarfik Sermersooq periarfissaqartitsinersoq pillugu  apeqquteqaat

Toqqammavilersuut:

Inissianik Kommunit inissiaataannik iluarsaassisarnermi sanaartukkat naammassineqarneq ajortut ukiuni tulleriinni tamakkiisumik naammassineqarsinnaasanngillat. Taamatullu iluarsaasseqqinnerni sannarlukkat pillugit nalilersuisoqartannginnera peqqutigalugu suliat sannarlutaasut ukiuni arlalinni atasinnaanissaat qularnartuuvoq. Pissutsit sanaartornerup iluani naammaginanngitsut Tasiilami nunaqarfiinilu suliartortitaqartarnerup takutippaa aningaasarsiutigiinnarlugu sanaartukkat naammaginanngitsut arlaqartut.

Siunertaq:

Tasiilami inissianik allanillu Kommunep susassaqarfiisa ataani sanaartornikkut iluarsagassat naammaginanngittumik suliarineqartarnerat pillugit paasiumasat makkuupput:

1. Sanasut namminersortut suliai naammassineqanngitsut imaluunniit sannarlutaasut pillugit Kommuneqarfik Sermersooq qanoq aaqqiissuteqartoqarnissamut iliorsinnaava?
2. Inissianik iluarsaasseqqinnermi suliat naammassineqanngitsut pillugit nakkutilliineq Kommuneqarfik Sermersuup qanoq pimoorutsigai?
3. Kommuneqarfik Sermersooq Ingeniørimik angalasartussamik sanaartukkat imaluunniit iluarsaasseqqinnerni nakkutilliisinnaasumik atorfinitsitinissaminut ammava? Uani pineqarput piffiit tamarmik Kommunep ataaniittut.

Asasara Kommunalbestyrelsemut ilaasortaq, Laura Taunâjik.

Siulliullugu apeqqutinnut qujanaq.

”Tasiilami nunaqarfinnilu ingeniørinik suleqatigiinnik angalasartunik pilersitsinissaq” pillugu allaffeqarfimmut apeqqutitit ulloq 10. april 2019 nassiuppatit. Apeqqutit ukuusut Sanarfinermut Avatangiisinullu Ingerlatsiviup tiguai:

1. naammaginanngitsumik iluarsaassisarnerit iluarsaanneqareersulluunniit pipallattut aaqqiiviginiarlugit Kommuneqarfik Sermersooq qanoq iliorsinnaava?
2. Iluarsaassinernut naammassineqanngitsunut tunngatillugu nakkutilliineq Kommuneqarfik Sermersuup qanoq pimoorutsigaa?
3. Ingeniørinik suleqatigiinnik nakkutilliinermiluunniit suleqatigiinnik angalasartunik pilersitsinissaq Kommuneqarfik Sermersuup ammaffigaa?

Apeqqutinnut tunngaviuvoq kommunip inissiaataanik iluarsaassinerni ukiut marlussuit kingulliit ingerlaneranni assassorlutik sulisartut suliassat naammassisarsinnaasimanngikkaat. Aamma iluarsaassinernik nakkutilliisoqannginnera pissutigalugu eqqarsaatigineqarluarsinnaavoq ukiut siuliini amerlanernik kukkusoqartarsimassasoq amigaateqarsimassasorlu.

Taamaalilluni Tasiilami nunaqarfiinilu naammaginanngitsunik sanasoqartarnera takuneqarsinnaavoq, tamannalu pipallannernik taamaallaat pissuteqarpoq assassorlutillu sulisartut taamaallaat iluanaaruteqarnissamik eqqarsaateqarnerat pissutigalugu.

Akissut:

Asasara Laura,

Saaffiginnissutinnut qujanaq.

Iluarsaassinerni anginerusuni entreprenørit pitsaassutsimik qulakkeerinninnerisigut assinillu uppernarsaasiornerigut suliassat malinnaavigineqartarput. Tamassuma saniatigut siunnersuisartumit aamma/imaluunniit Iserit, kommunip inissiaatileqatigiiffia, suleqatigalugu nakkutilliisoqartarpoq. Sanarfinermut Avatangiisinullu Ingerlatsivik aamma entreprenørit suliaat amigaateqarpata ingerlatsivinnik allanik nalunaaruteqarluartartunik suleqateqarluarpoq. Nalunaaruteqartarnerit taakku ugguuna institution@sermersooq.gl imaluunniit sanarfinermut immikkoortortaqarfimmut oqarasuaatikkut saaffinninnikkut pinerusarput.

Suliani amigaateqassappat tamanna tunniussinermi erseqqissarneqartarpoq tassani tunniussinermi allattuivimmut ilanngullugu amigaatinik allattuisoqartarluni. Tunniussinermi allattuivik amigaatinillu allattuivik entreprenørinut tunniunneqartarput. Amigaatit aaqqinneqarnissaannut tamatigut piffissaliisoqartarpoq amigaatillu annertoqataannik aningaasanik uninngatitsisoqartarluni. Aatsaat amigaatit aaqqinneqarsimanerannik uppernarsaat tiguneqarpat uninngatinneqartut akilerneqartarput.

Sulianik ukiup ataatsip qaangiunnerani misissuinermi aaqqinneqarsimanngitsunik amigaateqarsinnaavoq, taamaattoq qularnaveeqqutit akilerneqarneq ajorput uninngatitalluunniit akilerneqartaratik. Qularnaveeqqummik akiliineq uninngatitanilluunnit akiliineq aatsaat amigaatit aqqinneqaraangata pisarput. Entreprenøri amigaatinik aaqqiisinnaanngippat amigaatit qularnaveeqqummik uninngatitsinikkut uninngatitanilluunniit ilanngaateqarnikkut entreprenørimit allamit suliarineqartarput.

Sanaartornerni iluarsaassinernilu annertunerusuni tamani pilersaarusiorneq pillugu siunnersuisartunut, sanaartornermi aqutsisunut nakkutilliisunullu isumaqatigiissusiortoqartarpoq. Siunnersuisup isumatigiissummi pisussaaffii sanarfinermut immikkoortortaqarfimmit malinnaavigeqqissaarneqartarput naleqqutinngitsullu uparuarneqartarlutik taamaalillutik aaqqinneqarniassammata.

Ilisimatitsissutigineqarsinnaavoq sanarfinermut immikkoortortaqarfik sulianik ingerlanneqartunik nakkutilliinermi kiisalu kommunip illuutaasa aserfallatsaaliorneqarnerannik nalunaarsuinermi Tunumi sinniisoqarajuttartoq. Sanarfinermut pisortaaq kingullertigut 16.-27. marts kiisalu 26. juni-26. juli Tasiilamiippoq, taakkkunannga Sanarfinermut Avatangiisinullu Ataatsimiititaliaq 26.-29. juni peqataavoq. Tamassuma saniatigut sulisoq 20.-27. juli sulianik ingerlanneqartunik nakkutilliilluni 20.-27. juli Tasiilamiippoq.

Inussiarnersumik inuulluaqqusillunga

Hans Henrik Winther Johannsen

Sanarfinermut Avatangiisinullu Pisortaq

Kommuneqarfik Sermersooq