Meeqqanut Atuarfeqarnermullu Ingerlatsivik

Pineqartoq: Anorersuit sakkortuut pineranni Kommunip suliffiutaanni periusissiat

Laura Taunâjik Uitsatikitseq

Asasara Kommunalbestyrelsimut ilaasortaq, Laura Táunâjik Uitsatikitseq (S)
Siullermik apeqqutigisannut qujanarujussuaq.
Ulloq 19 marsi 2022 “Anorersuit sakkortuut pineranni Kommunip suliffiutaanni periusissiat” pillugu allaffeqarfitsinnut apeqquteqaateqarputit.

Meeqqanut Atuarfeqarnermullu Ingerlatsiviup apeqquteqaatit tiguaa imaattoq:
” Ukiup ingerlanerani anorersuit sakkortuut nunatsinni nalaanneqaqattaarput. Ilaatigut inunnut uloriarnartorsiortitsisinnaasunik. Taamak pisoqarnera pillugu Kommunitta iluani ilaatigut suliffeqarfiit ilaannik matoqqatitsinerit pisimallutik.

Sap Ak Siuliani nunatta kangia sakkortungaatsiartumik anorersuarujussuarpoq. Ilaatigut navianarsinnaasumik, nunaqarfiillu ilaanni aamma illut atortuinik teqqaasoqarluni, tamakkulu ulorianarsinnaaneri inuup inuuneranik navianartorsiortitsisinnaanerat miserratigineqarsinnaanngilaq. Taamaakkaluartorli sapaat ataasinngornerullu akornanni sakkortuumik anorersuarujussuarpoq. Taamaattorli Tasiilami atuarfik meeqqerivillu ammatiinnarneqarsimapput. Anorersuup sakkortunera eqqarsaatigalugu meeqqanut qanoq uloriarsinnaatiginera innuttaasut namminneq oqaluttuarnermikkut uppersarsinnaavaat. Taamaattorli atuarfik ammatinneqartussaanera pillugu ilinniartitsisut meeraaraatillit meeqqeriviliaassisariaqarput. Meeqqerivinnilu sulisut suliartortariaqarlutik, naak ilaatigut meeraaqqanut sila taamak anorersuartigitillugu aniffiginissaa tulluanngilluinnaraluartoq. Illua-tungaatigulli Kommunimi sulisut qatsuuminerani aatsaat suliartornissaat innersuussutigineqarsimalluni.

Paasiumasat annerusumik ukuupput:
* Sakkortuumik anorersuartillugu Kommuneqarfik Sermersooq immikkut periusissiamik aaqqissuussissamaanngila?
* Anorersuit sakkortuut pigaangasa meeqqeriviit atuarfiillu ammatinneqartarnissaat pissusissamisoorpa?
* Kommune matoqqatinneqaraangat sulisullu qatsornissaata tungaanut angerlarsimaannarsinnaanerisa nalaani meeqqeriviit atuarfiillu aamma matoqqagallartinneqarsinnaanerat periarfissaava?”

MI

The administration's answer

Asasara Laura Táunâjik Uitsatikitseq

Anorersuit sakkortuut pineranni Kommunip suliffiutaanni periusissiat pillugit apeqqutinnut qujanaq.

Meeqqanut Atuarfeqarnermullu Ingerlatsiviup Kommuneqarfik Sermersuumi atuarfiit ulluuneranilu paaqqinnittarfiit akisussaaffigivai. Taamaattumik ingerlatsiviup akisussaaffigaa perorsaanikkut kaammattuutaasunik sammisaqartitsinernik neqeroornissaminut nukarlernullu paaqqinninnissaminut angajullernullu atuartitsinissaminut neqerooruteqarnissaq.

Ataasinngornermi marsip ulluisa 14-ianni 2022 Tasiilami anorersuarpoq. Ullaakkut pisortaq Immikkoortumi pisortamit sianerfigineqarpoq, anorersuarneranillu ilisimatinneqarluni. Pisortap nalunaarutigaa, atuarfimmi ulluuneranilu paaqqinnittarfinni upalungaarsimasoqassasoq, taamaalillutik inuiaqatigiinni pisariaqartumik atorfillit soorlu peqqinnissaqarfimmi, qatserisartoqarfimmi, politiini kommunillu aqqusinniortui suliartorniassammata meeraallu paarineqarniassammata, kisiannili Immikkoortumi pisortaq nalunaaruteqarsinnaasoq innersuussuteqarluni, periarfissaqartoqarpat meeqqat angerlasimatiinnarneqarsinnaasut, kisiannili meeqqeriviit atuarfillu ammatinneqassasut.

Pisortap nalunaarut nassiunneqartoq takunngilaa, kisiannili kingornagut atuarfiup pisortaa oqaloqatigaa, erseqqissaatigalugulu, atuarfimmi upalungaarsimasuutitaqassasoq, siunnersuutigalugulu sulisut meerallit angerlarsimaannartinneqassasut. Kisianni tamanna nal. arfineq-pingasut qaangerneranni pivoq, taamaattumillu arlaqartut isaareersimapput. Isumaqatigiissutigineqarpoq, kingusinnerusukkut sianertut, angerlarsimaannarsinnaasut, aningaasarsiaminnit ilanngaaffigineqaratik.

Kingusinnerusukkut Immikkoortumi pisortap Pisortallu isumaqatigiissutigaat, qanoq iliortoqartarnissaanik ersarissumik allaaserisamik amigaateqartoqartoq, taamaalilluni meeqqerivinni atuarfimmilu ersarissumik upalungaarsimasoqarniassammat, taamaalillutik inuiaqatigiinni pisariaqartumik sulisariaqartut meeraat anorersuartillugu paarineqartarniassammata. Taanna maannakkut suliarineqalereerpoq.

Anorersuartillugu meeqqeriviit atuarfiillu ammatinneqartarnerat nutaajunngilaq. Matumunnga ilanngunneqarpoq quppersagaq qanganisaq, meeqqeriviit ilaanni atoqqinneqarsinnaasoq, aammalu anorersuartillugu sulisut akisussaaffiannik ajunngilluinnartumik allaaserinnittoq. Aamma allaqqavoq qaqugukkut meeqqerivik atuarfilluunniit matussanersut: ”Meeqqerivik imaluunniit atuarfik matoqqatinneqassanngilaq, meeqqeriviit imaluunniit pisiniarfiit matoqqanngippata innuttaasullu suliartorsinnaanngippata”. Atuarfik imaluunniit meeqqerivik matussanersoq tamatigut pisortap aalajangigassaraa – atuarfiup pisortaa imaluunniit meeqqeriviup pisortaa aalajangiissanngillat. Akisussaaffik taanna immikkut ittunik pisoqartillugu Immikkoortumi pisortamut imaluunniit Stabs-/Fagchef-imut suliassanngortinneqarsinnaavoq.

Tassunga uiggiullugu ilisimatitsissutigineqassaaq, isumaqatigiissutigineqarnikuummat, Piterartillugu, taava politiit innersuussutaat malinneqartassasut, aammalu atuarfiit meeqqeriviillu matoqqatinneqartassasut, anorersuillu allat atuunnerini – kommune tamakkerlugu – meeqqeriviit atuarfiillu ammasassasut, sulisut inuiaqatigiinni pisariaqartinneqartut meeraasa paarineqartarnissaat akisussaaffittut isigigatsigu. Tamatumani aqutsisut ataasiakkaat akisussaaffigaat sulisut qanoq amerlatigisut pisariaqartinneqarnersut, aammalu kikkut sulissanersut.

Inussiarnersumik
Lone N. Møller
Meeqqanut Atuarfeqarnermullu Ingerlatsivimmi pisortaq

https://sermersooq.fra1.digitaloceanspaces.com/wp-content/uploads/2022/03/25100617/Pjece-vedr.-storm-dk_2200700_KAL.pdf