Sanarfinermut Avatangiisinullu Ingerlatsivik

Paamiuni pinnguartarfinnik sanaartorneq

Dorthe-Marie Mogensen-Fontain

Paamiuni pinnguartarfinnut pilersitsinissamut suliaq sumut killippa? Aningaasaliissutigineqareermat taamaattorli suli pinnguartarfinnik illoqarfitsinni takusassaqanngimmat killiffia paaserusuppara. Pisariaqartinneqartorujussuummata ilaqutariit, meeqqallu susassaqartinneqarnissaannut. Timi aalanerulernissaannut suliniummut tapertaalluartussaammata kissaatiginaraluarpoq piaartumik iliuuseqartoqarnissaa.

SI

The administration's answer

Asasara kommunalbestyrelsimut ilaasortaq, Dorthe-Marie Mogensen-Fontain (S).

 

Siullermik apeqqutigisannut qujanarujussuaq.

 

Ulloq 02. juuni 2021-mi “Paamiuni pinnguartarfinnik sanaartorneq” pillugu allaffeqarfimmut apeqquteqaateqarputit.  Sanarfinermut Avatangiisinullu Ingerlatsiviup apeqqutitit tiguai, imaattut:

“Paamiuni pinnguartarfinnut pilersitsinissamut suliaq sumut killippa?

Aningaasaliissutigineqareermat taamaattorli suli pinnguartarfinnik illoqarfitsinni takusassaqanngimmat killiffia paaserusuppara. Pisariaqartinneqartorujussuummata ilaqutariit, meeqqallu susassaqartinneqarnissaannut. Timi aalanerulernissaannut suliniummut tapertaalluartussaammata kissaatiginaraluarpoq piaartumik iliuuseqartoqarnissaa.”

 

Sanarfinermut Avatangiisinullu Ingerlatsivik ima akissuteqarpoq:

 

Asasara Dorthe-Marie,

 

Sanarfinermut Avatangiisinullu Ingerlatsivimmit ilisimatitsissutigineqassaaq, Paamiuni pinnguartarfimmik ataatsimik ilasinissaq missingersuutinit aningaasaliiffigineqarsimasoq.

Politikikkut akuerineqarsimasumi ”Paamiunut Tamakkiisumik pilersaarut” qupperneq 27-mi allassimavoq, atuarfiup eqqaani kiisalu timersortarfiup eqqaani pinnguartarfiliortoqassasoq. Tamakkiisumik pilersaarut akissuteqaammut ilanngunneqarpoq.

Illoqarfimmi inuusuttut nuannaarutigisaannik 2020-mi timersortarfiup arsaattarfiullu akornanni silami pinnguartarfiliortoqarpoq.

2020-mi Paamiuni entreprenøri atuarfiup saavani pinnguartarfiliornissamik piumaffigineqarpoq. Aallartinneqarnissaa pillugu arlaleriarluni entreprenøri tuavisaarneqarsimavoq, tamannalu pillugu pinnguartarfik 2021-mi aasaanerani suliarineqarnissaa naatsorsuutigineqarpoq.

Tamatuma saniatigut 2016-imi Paamiuni arsaattarfiup pioreersup ivigaaraasalersorneqarnera ilisimatitsissutigineqassaaq.

 

Inussiarnersumik inuulluaqqusillunga

Hans Henrik Winther Johannsen

Sanarfinermut Avatangiisinullu Ingerlatsivimmi pisortaq