Nunaqarfinni inissiassanik illuliornissaq

Qinersiviup kingorna aningaasanut inatsisissaq inaarsarneqareerneratigut paasivarput nunaqarfinni illut isaterneqartussat arlallit aningaasaliiffigineqarsimasut. Tamatuma nassatarisaanik ilanngullugu aamma paasivarput nunaqarfinni inissianik sanaartornissaq ilanngullugu pilersaarutinut ilanngunneqarsimasoq.

Ukiut arlallit maannamut ingerlapput nunaqarfinni sanaartorneq ineqarniarnikkut inerisaaffigineqarsimanani. Taamaattumik innuttaasut allatut ajornartumik illoqarfimmut allanulluunniit nutsertariaqarnerat avaqqunneqarsinnaajunnaarsimalluni. Tamanna uggornarpoq, nunaqarfinni inerisaasoqannginnerata kingunerimmagu inissaaleqineq. Ajoraluartumik inuusuttunut ilaqutariippassuarnullu tamanna eqquinerluppoq.

Takusinnaavoq 2016 nalaani nunaqarfinni sanaartornissaq siunniunneqarsimagaluartoq, tamatumunngali atatillugu takussaasumik tigussaasumillu piviusunngortitsisoqarsimaneranik ersiuteqartoqarani. Tamanna innuttaasunut arlalitsigut eqquinerluppoq. Nunaqarfimmuinnaanngitsoq illoqarfimmulli nuunnermi ajornartorsiutit arlallit puttallarfigisarpaat.

1. Kommuneqarfik Sermersooq nunaqarfiini sanaartugassat suut pilersaarutigaat?

2. Inissianik sanaartornissaq qaqugu sumilu aallartinnissaanik pilersaaruteqarpa?

3. Inissiarnik sanaartortoqassappat inissiat sorliit pineqarpat?

4. Inissiat qassit sanaartorneqarnissaannut pilersaarutigineqarpat?

Asasara Laura Táunâjik Uitsatikitseq

2022 – 2030-mut sanaartugassanut missingersuutini politikkikkut akuersissutigineqartuni, 2021-mi ukiakkut suliarineqartuni, ukioq ukiunilu tulliuttuni manna nunaqarfinni inissianik nutaanik illuliortoqarnissaanut aalajangikkanik aningaasaliissuteqartoqarnikuunngilaq. Tamanna tunngavigalugu erseqqissumik nunaqarfinni nutaanik inissialiortoqarnissaa pilersaarutaanngilaq, qaqugukkut pinissaanut aalajangersimasunik pilersaaruteqartoqanngilaq. Missingersuutinut politikkikkut isumaqatigiissut naapertorlugu allassimavoq, kommunip nunaqarfiini inissiat amerlassusii pitsanngorsarnissaannut amerlisarnissaannullu pisariaqartitsineq misissuiffigineqassasoq.

Qulaani pineqartoq eqqarsaatigalugu ingerlatsivik Iserit A/S-imut saaffiginnissuteqarpoq, makkuninnga paasisaqarusulluni erseqqissaaffigeqqullunilu:

1.  Nunaqarfinni tamani innuttaasut qassit inissarsiorlutik utaqqisuutigineqarpat.

2. Inissiat qanoq angitigisut pisariaqartinneqarlutillu noqqaassutigineqarneruppat (init qassit).

3. Inissiat qanoq issusiinik nalilersuineq qanoq innersoq, aammalu inissiat inigineqanngitsut/atorneqanngitsut pigineqarnersut.

Ingerlatsiviup tabeli ataaniittoq Iserit A/S-imit pissarsiaraa, tassani allassimallutik, innuttaasut qassit maannakkorpiaq inissarsiorlutik utaqqisuutigineqarnersut, aammalu inissiat angissusaat (init qassit) pineqarnersut. Kisitsisit imatut agguataagaapput:

https://d33v4339jhl8k0.cloudfront.net/inline/22115/614a0e60ff872db12cd8e07a9dbadf48dd7478a3/749c2de57989cfe10803df238ed6e25c2d8b1bd0/image001.png

Tabelimi qulaani taaneqartumi allassimavoq, kommunip nunaqarfiini inissarsiorlutik utaqqisuutigineqartutut katillutik 34-t allassimasuutigineqartut, taakkunani inissiani pineqartuni init qassiunissaannik kissaatigisat nikerartuupput ataatsimik initalinniit pingasunik initalinnut. Ataatsimut isigalugu pingaaruteqarpoq paasissallugu, utaqqisunut allattorsimaffik imaanngimmat, maannakkorpiaq qassit angerlasimaffeqanngitsuunerinik, aammalu inissarsiorlutik utaqqisunut allattorsimaffik inissarsiortut qassiunerinik takussutissiisuunngitsoq. Tamatumunnga inuup ataatsip inissialianut assigiinngitsunut allattorsimaffinniissinnaanera pissutaavoq. Aamma tamatumunnga ilanngullugu inooqatigiit tamarmik immikkut allattorsimasuutigineqarsinnaapput.

Inussiarnersumik
Hans Ulrik Skifte
Sanarfinermut Avatangiisinullu Ingerlatsivimmi pisortaq