N.A.I.P

“Ulorianartorsiortitsivoq aserfallassimaqalunilu.
N.A.I.P.-p illutaa, John Møllerip aqq.
Apeqqutiginiakkap tunngavia:
Pineqartoq tassaavoq N.A.I.P.-p illutaa, John Møllerip Aqq.-niittoq Illu meeqqat inuusuttullu pinnguarfigisarpaat, illup qaavanut qallortarput tassanilu pinnguartarlutik. Tamanna immini ulorianarsinnaavoq, kisianni ajorneruvoq, illu qaliaalu nakkaatingajalermata, erseqqissaatigerusupparalu, tamanna ULORIANARLUINNARTUUMMAT, ilaatigut meeqqanut illup qaavani issiasunut, aammalu soorunami ilaqutariippassuarnut ullut tamaasa illumik saneqquasartunut. Illup qalia nakkaattuussappat meeqqanik issiasoqartillugu, ajoqusertoqangaatsiarsinnaavoq.

Illu annaanneqarsinnaanngilaq, takorloorsinnaanngilaralu aserfallatsaaliisoqarsimannginnera pissutigalugu ajutoorujussuartoqarnissaa toqusoqarnissaaluunniit
akuersaarneqarsinnaanngitsoq.

Illu atorneqarneq ajormat, aammalu N.A.I.P. illup aserfallatsaaliornissaanik soqutiginninngimmat, immaqa ilusiliortoqarsinnaavoq toqqavialu akisunerpaamik neqeroortumut tunineqarluni, piumasaqaatigalugu illumik najugarisassamik sanasoqassasoq “qangatut isikkulimmik”, taamaaliornikkut kommunimut N.A.I.P.-mullu aningaasassaqartitsisoqalissagaluarpoq, taakkulu inuusuttunut kalattoornermut kulturilerinermullu atorneqarsinnaassallutik. Peqatigitillugu meeqqat allallumi ajutoorujussuarnissaraluat pinngitsoortinneqarsinnaavoq, taamaasillunilu Nuutoqqap ilusaa innarlernagu.

In.in.
Justus Hansen”

Sanarfinermut Avatangiisinullu Ingerlatsivik ima akissuteqarpoq:
Siullermik N.A.I.P. pillugu apeqqutinnut qujanaq.

Allaffeqarfimmiit nalunaarutigineqassaaq, illumut nunaminertamik atugassiissut N.A.I.P.-mut nalunaarsugaammat, taamaattumillu kommunip tuniniarsinnaanngilaa. Ilanngullugu allaffeqarfimmiit oqaatigineqassaaq, illup isaterneqarnissaa oqaasertaliullugu neqeroortitsisoqarsinnaanngitsoq, taamaassappat nunaminertamik tuniniaaneq pineqassammat, tamannalu pilersaarusiornermut inatsit naapertorlugu pisinnaanngilaq (Inatsisartut inatsisaat nr. 17, 17. november 2010-meersoq).

Kommunalbestyrelsip juunip aallaqqaataani 2021-mi sumiiffimmut pilersaarutitut tapiliussaq nutaaq akuersissutigaa, tassani periarfissaalerluni illu B-510 isaterneqarsinnaasoq, tamannalu pereerpat nutaamik illuliortoqarsinnaasoq, Nuutoqqami avatangiisinut naleqqussakkamik. Aalajangersakkani (§21.1 imm. 5-imi) imatut oqaasertalerneqarpoq: ”B-510-ip iluanik iluarsartuineq sanaqqiinerlu. Illu pilersarummi 1 ½-mik suliarineqassaaq, ataatsimik pingaarnermik illutalik kiisalu ataatsimik qalialik. Illu 1½-nngorlugu suliarineqassaaq, ini alleq taavalu qalia. Sanaartorfissaq uuttortarneqarpoq 8 x13m. Sanaartorfissaq nunaminertami 100 m2-iuvoq.”

Inerniliineq:
Sanarfinermut Avatangiisinullu Ingerlatsiviup nunaminertamik atuinissamut piginnittoq peqqussuteqarfigisinnaavaa sanaartornermut inatsit aammalu nunaminertamik atuinissamut inatsit innersuussutigalugit, arlaatigut iliuuseqartoqassappat.

Kisianni aamma ingerlatsiviup ilisimavaa, N.A.I.P.-mit ilaasortaminnut suliaminnullu nutaanik inissaqartinneqarnissaq naatsorsuutigineqartoq. Kisianni ingerlatsiviup ilisimanngilaa, tamanna pillugu isumaqatigiissuteqartoqarsimanersoq.”

Inussiarnersumik inuulluaqqusilluta
Hans Ulrik Skifte
Sanarfinermut Avatangiisinullu Ingerlatsivimmi pisortaq