Laura Taunâjik Uitsatikitseq ·
Laura Taunâjik Uitsatikitseq
Asasara Kommunalbestyrelsimut ilaasortaq, Laura Táunâjik Uitsatikitseq (S)
Siullermik apeqqutigisannut qujanarujussuaq. Ulloq 30. aggusti 2022 Kuummiini ”Immikkoordaajinni” pillugu allaffeqarfitsinnut apeqquteqaateqarputit.
Apeqqutit imaattoq Suliffeqarfimmut Kiffartuussivimmit tiguneqarpoq:
“Kommunalbestyrelse 31/08-2021 ataatsimiinneranni “Kuummiini ”Immikkoordaajinni” sanaartorfissagissarneqarnissaanik allineqarnissaanillu siunnersuut” ilaasortanit tamanit eqqartorlugulu akuersissutigineqarnikuuvoq. Ulloq manna tikillugu pilersaarummik aallartinneqarsimasumik takusimanngilagut. Tamanna uggornartuuvoq.
Taamaattumik paaserusunnarpoq:
Suliaq sumut killippa?
Suliarinnittussarsiortoqarpa?
Aaqqissuussineq qanoq ingerlanneqarpa?
Pilersaarutit qaqugu aallartinneqarlutillu naammassineqassappat?
The administration's answer ·
The administration's answer
Sanarfinermut Avatangiisinullu Ingerlatsivik ima akissuteqarpoq:
Asasara Laura Táunâjik Uitsatikitseq
Ingerlatsiviup “Kuummiini ”Immikkoordaajinni” sanaartorfissagissarneqarnissaanik allineqarnissaanillu siunnersuut” pillugu apeqquteqaatinnut qutsavigerusuppaatit.
Sanaartornermut immikkoortortaqarfik entreprenørimik avataaneersumik, pilersaarummut ”Nunaqarfinni Eqqagassalerineq/Torersaaneq”-mut tunngassutilimmik suliassaqareersumik suliassamut atorfinitsitsinikuuvoq. Suliassaq neqerooruteqartarnermut inatsisip matoqqasumik neqeroortitsinermut periarfissarititaasa iluaniimmat, sanaartornermut immikkoortortaqarfik matoqqasumik neqeroortitsissalluni aalajangerpoq, taamaalinikkut pilersaarutip assigiinngitsut marluk entreprenørimit ataatsimit suliarineqarnerisigut ingerlatsinikkut annertuumik iluanaaruteqartoqassammat.
Entreprenøri ukioq manna umiatsiaaqqanut talittarfimmik itisiliinissamut atugassarititaasunik misissuiartorluni Kuummiinukassaaq. Tamatumunnga atatillugu atortut, umiatsiaaqqanut talittarfimmik pioreersumik assaanermi pissarsiat ”Immikkoordaajinni” nunatalersuinermut atorneqarsinnaanersut misissorneqassaaq.
Entreprenørip pisinnaasutut nalilerpagu, ukioq manna suliarineqassaaq pisinnaanngitsutulli nalilissappagu, aappaagu naammassineqarsinnaaqqullugu pilersaarusiorneq ingerlateqqinneqassaaq.
Inussiarnersumik inuulluaqqusillunga
Hans Ulrik Skifte
Sanarfinermut Avatangiisinullu Ingerlatsivimmi pisortaq