Dorthe-Marie Mogensen-Fontain ·
Dorthe-Marie Mogensen-Fontain
Katersortarfiup Paamiuniittup “Taqqissuut” innuttaasunut attartortitsinermut akigititaasut suut toqqammavigalugit aalajangersarneqarpat?
Isumaqarpunga akigititaasut innuttaasunut amerlanernut qaffasippallaartut, naleqqussaqqinneqarnissaallu pisariaqalersimasoq.
Ilanngullugu nassiuppara innuttaasup allagaqaataa tunngavilersuutaalu:
“Innuttaasut illuat “Taqqissuut”
Katersortarfiup atorneqarnera ilumoorsinnaanerpa taamarsuaq akeqassasoq, akit immikkuulukaartut agguataarneqarsimasullu?
Nalunngilara igaffimmut atortorissaaruteqartoq, taamaakkaluartoq arlaqarput nalliuttorsiornermi nerinermut atortunik atuineq ajortut engangsinillu atuisoqartartoq.
Aammattaaq isumaqarpunga kusanarluinnartumik nalliuttorseerfissatut taaneqarsinnaanngitsoq, allamilli periarfissaqarpallaannginneq pissutigalugu allatut ajornartumik attartorneqartartoq. Taamatuttaaq aamma isumaqarpunga illoqarfitsinni periarfissat annikinneri Kommune-miit atorluarneqarluni akinik aaliangiisoqarsimasoq.
Inuppassuupput maani illoqarfitsinni akissaatitigut ilungersuuteqartut, isumaqarpungalu ingasammik akinik aaliangersaasoqarsimasoq.
Komm.Sermersooq-mi nunaqarfinni katersortarfinnik nalliuttorsiornermi attartuinermi akeqanngitsumik atorneqartarput, naak aamma iggavimmik atuisoqartaraluaq.
Nikingassut angisoorujussuuvoq, akeqanngitsumiit 2.000kr-mut sinnerluguluunniit.
Aaliangersakkat ilaanni aamma allaqqavoq, nalliuttorsiortussaatilluni piareersassalluni ulloq sioqqullugu matuersaat tigugaanni ekstramik akiliisoqassasoq, taanna aamma ingasaginarpoq.
Siornatigut nalliuttorsiortussat ulloq sioqqullugu matuersaammik tigusisarnikuupput, taanna piareersarfittut atussammat, kikkummi ulloq nalliuttorsiorfik eqqorlugu piareersaanermik ingerlatsissappat?
Isumaqarpunga aliangersakkat taamaattut innuttaasunik qeratasuumik, ulapporliortitsinermik aningaasatigullu artukkersuutaasinnaasunik pilersitsisut. Taamak allanninni pissutigaara, inuppassuummata isertitakinneq aallaavigalugu nalliuttorsiorsinnaanerannik killiliingaatsiartut.
Qangarsuaaniilli nalliuttorsiorneq, katinneq, apersortinneq, kuisitsitsineq, katiffissiornerit il.il., ilaquttanik kammalaatinillu ataatsimuualaartitsisarneq kalaallit atugarisuuarput, tamanna tammariartuaassanerluni aamma?
Neriuppunga una saaffiginnissutiga illuatungilersorpallaarnagu arlaatigut aaqqiiffigineqarsinnaassasoq, illoqarfinni nunaqarfinnilu pissutsit assiinngippallaarnerat ersarikkami, aammalu akit taamaattut annertuallaartut misinnaramik.
Inussiarnersumik
Doris M.Petersen
Paamiut-ni innuttaaqataasoq
The administration's answer ·
The administration's answer
Suliffeqarfimmut Kiffartuussivik ima akissuteqarpoq:
Asasara Dorthe-Marie,
Katersortarfinnik attartornermi akit piumasaqaatillu assigiinnerulersinneqarsimapput, soorunami attartukkap qanoq innera, pitsaassusia atortuilu eqqarsaatigalugit. Tamanna tunngavigalugu akit allanngortinneqarnissaat pillugu Kommunalbestyrelsimut siunnersuutigineqarsimavoq, tassungalu atatillugu 2021-mut missingersuusiornissamut atatillugu kommunalbestyrelsip siunnersuutigineqartut akuersissutigai. Tamatuma kingornagut kommunimi illoqarfinni katersortarfinnik attartornermi akunnermut akit assigiissarneqarput.
Akigitinneqartoq 2.000 kr. taaneqarmat, eqqaaneqassaaq taanna nalliuttorsiornissamut illumik attartornermut tunngasuummat, attartornerlu nal. 12-imiit aallartittarpoq, taavalu aqaguani nal. 10 attartorunnaartoqassaaq, attartornermi akunnermut akigitinneqartut akuerisat tunngavigalugit tamanna naatsorsorneqarpat, attartorneq ima akeqassaaq:
Nal. 12 – 17, akunnerit 5 ataaseq 175,00 875,00 t kr.
Nal. 17 – 24, akunnerit 7 ataaseq 225,00 1.575,00 t kr.
Nal. 24 – 03, akunnerit 3 ataaseq 350,00 1.050,00 t kr.
Nalliuttorsiortoqartillugu illumik attartorneq 3.500,00 kr.
Akigitinneqartoq taannarpiaq Nuummi Illorput attartornerani atorneqartarpoq. Tamanna Paamiut illoqarfiannut qaffasippallaarpoq, aammalu attartorneq 2.000,00 kr.-nik akeqassasoq siunnersuutigineqarpoq, tamannalu aamma kommunalbestyrelsimit akuersissutigineqarpoq.
Apersortinnerit assersuutigigaanni, Taqqissuutip attartornissaanut ulloq ataaseq sioqqullugu matuersaatit tiguneqarsinnaapput, katersortarfik ulloq taanna sioqqullugu inniminnerneqarsimanngippat – taamaaliortoqarsinnaavoq 250 kr.-nik akiliilluni, naak illup attartornissaanut ulloq ataaseq sioqqullugu tigusisussaagaluarluni.
Taamaasiornikkut attartortut assigiissaakkamik pineqarsinnaapput. Attartortussat amerlanerit Taqqissuut nal. 12 tigusarpaat, nalliuttorsiornissamut piareersaaffigalugu, unnukkullu nalliuttorsiorfigalugu.
Assersuutigalugu ukioq manna apersortinnerit ulloq 04.07.21 aallartippata, taava qulingiluariarluni apersortitsisoqarnerani, Taqqissuut ullormi tassani atorneqassaaq. Taqqissuut ulloq 03.07.21 inniminnerneqarpoq, ulloq 12.07.21 tungaanut, nalliuttorsiortussat taakkua qulingiluat tamarmik paarlakaajaallutik illumik atuissapput nal. 12.00 aallartiffigalugu piareersaasarlutik, taavalu aqaguani nal.10 nallertinnagu matuersaat tunniuttarlugu, taava sulisugut akunnerni marlunni asaanissaminnut periarfissaqassapput tulliata attartulinnginnerani.
Qaavatigut 250 kr.-nik akiliutigineqartoq atorlugu periarfissaavoq, ulloq ataaseq sioqqullugu piareersarnissamut, aammali nalliuttorsiunnginnermi ulloq ataaseq sioqqutsilluni eqqissilluni piareersarnissamut periarfissiissutaassalluni.
Peqqinnermut, Susassaqartitsinermut Kulturimullu immikkoortortap ukiup aallartinnerani nunaqarfinni katersortarfiit aqunneqarnerat tigoqqammerpaa, taamaattumillu ukioq manna akinik aalajangersaasoqarnikuunani. Kisianni ukiup naalernerani Kommunalbestyrelsimut akinik siunnersuuteqartoqarumaarpoq, aappaagumut atuutilersussanik.
Naggataatigut oqaatigissavara akit atuutissammata kommunalbestyrelsip allamik aalajangiinissaata tungaanut, allannguuteqartoqassappat ilassutitut aningaasaliissuteqartoqartussaassammat.
Inussiarnersumik inuulluaqqusillunga
Marie Fleischer
Pisortaanerugallartoq