Kangilinnguani tunniussineq iluarsaassinerlu

Asasarput Kommunalbestyrelsimut ilaasortaq, Peter Davidsen (S)

Siullermik apeqqutigisannut qujanarujussuaq.

Ulloq 4. marsi 2024 Kangilinnguani tunniussineq iluarsaassinerlu pillugit allaffeqarfitsinnut apeqquteqaateqarputit.

Sanarfinermut Avatangiisinullu Ingerlatsiviup apeqqutit tiguaa, imaattoq:

”
Ilisimaneqartutut Kangilinnguani iluarsaassinermut (torersaanermut) atatillugu kommunip pigisai illut marluk nunaqarfinni aqutsisut aqutassaattut tunniunneqarput.

Taakku illut marluk nunaqarfinni aqutsisut aqutassaat tamarmik pisataqarsimapput/pequtaqarsimapput nalituunik, taqqavanermiunik ilisimaneqartumik. Ajoraluartumili tunniunneqarneranni pisataarussimapput/pequtaarussimapput.

Iluarsaassinerulli kingunerisaanik illut pineqartut pisataarussimasut nunaqarfinni aqutsisunut tunniunneqarsimapput.

Illut pineqartut nunaqarfinnik aqutsisunik aqunneqartussat Kangilinnguani iluarsaassinerup kingorna pisattat/pequtaat pineqartut nalituut sumut pisimanersut paaserusuppara?

Taakku pisattat sumut pippat? Aamma tunineqarsimappata qanoq iluanaarutigineqarsimappat?

Kiisalu kina Kangilinnguani iluarsaassinermi akisussaava?
“

Asasara Peter Davidsen,

Kangilinnguani tunniussineq iluarsaassinerlu pillugit allaffeqarfimmut apeqqutinnut qujanaq.

Sanarfinermut Avatangiisinullu Ingerlatsiviup suliaq inuit arlallit piffissap ingerlanerani Kangilinnguani Ivittuunilu tunniussinermik iluarsaassinermillu suliaqarsimasut aqqutigalugit misissorniarsimagaluarpaa. Aamma toqqortaasivinni pisoqaanerusuni ujaasisimagaluarpugut.

Kangilinnguani illut eqqarsaatigalugit, illunik piginnittuuneq Illersornissaqarfimmit Ivittuuniillu akisussaaffigineqarsimavoq. Ivigtuut Kommuneata illuutai Kommuneqarfik Sermersuumut tunniunneqarnikuupput aammalu Arsummi nunaqarfimmi aqutsisunut ingerlateqqinneqaratik. Illuaqqat nunaannarmiittut, siornatigut Illersornissaqarfimmit pigineqartut Kommuneqarfik Sermersuumut tunniunneqarsimapput kingornatigullu Arsummi Nunaqarfimmi Aqutsisunut tunniunneqarlutik.

Illuaqqat taakkua oqaatigineqartutuut pequsersugaasimapput. Pequtit taakkunaneereersut qanoq pisimanersut, manna tikillugu isumaqatigiissuteqarnermut tunngasortaanik nassaassaqanngilagut. Taamaattumik maannakkuugallartoq oqaatigisinnaanngilarput kikkut pequtinik pissarsisimanersut, qanoq ittumik isumaqatigiissuteqarnersut imaluunniit qanoq akeqartitsisoqarsimanersoq imaluunniit iluanaaruteqartoqarsimappat taakkua qanoq pisimanersut.

Ivittuuni illut eqqarsaatigalugit, taakkua Kommuneqarfik Sermersuumut tunniunneqarnikuupput tassanngaanniillu Arsummi Nunaqarfimmi Aqutsisunut tunniunneqarlutik.

Taamaattumik assigiinngitsut piginnittuupput, apeqqutaatillugu illut sorliit tunniunneqarsimasut pineqarnersut.

Illut ilarpassui Kommuneqarfik Sermersuumut tunniunneqarsimasut, isaterneqarnikuupput illunilu taakkunani pequtit isumaqatigiissut malillugu Arsummi innuttaasunut tunniunneqartussaasimapput, taavalu pequtit soqutigineqanngitsut iginneqartussaasimallutik.

Illut sinneruttut Kommuneqarfik Sermersuumit pigineqartut, Kangilinnguit kujataatungaaniittut (sakkutooqarfiunngitsumiittut), oqaatigineqarneratut pequsersugaapput.

Kangilinnguani iluarsaassinertavia pivoq Illersornissaqarfiup, Kommunip sullissisullu allat suleqatigiinnerisigut.

Inussiarnersumik inuulluaqqusisoq

Søren Pedersen
Sanarfinermut Avatangiisinullu Ingerlatsivimmi pisortaq