Suliffeqarnermut Isumaginninnermullu Ingerlatsivik

Kangiamiut

Storm Ludvigsen

Asasarput Kommunalbestyrelsimi ilaasortaq, Storm Ludvigsen

 

Siullermik apeqqutigisannut qujanarujussuaq.

 

Ulloq 31 januaari 2024″Inuit Kangiamiut” pillugit allaffeqarfitsinnut apeqquteqaateqarputit. Apeqqutit Suliffeqarfimmut Kiffartuussivimmit tiguneqartoq:

 

” Filippinerit/Thailandimiut

Nuummiittut qassiunersut qassillu nunasisuunersut paaserusunnarpoq, taassumallu saniatigut qaammammut qassit tikisinneqartarnersut aamma paaserusunnarpoq.

Innuttaasut amerliartuinnavissut apeqqusertaleramikku sunersut aammalu tassanngaannaq amerleriapiloorneri assut apeqquserneqartalerami.”

SI

The administration's answer

Asasara Storm Ludvigsen,

 

Inuit Kangiamiut pillugit allaffeqarfimmut apeqqutinnut qujanaq.

Kalaallit Nunaanni Naatsorsueqqissaartarfiup Nuummi innuttaasut, qallunaatut innuttaassuseqanngitsut, pillugit naatsorsuutai ataani takutinneqarsinnaapput.

Nuummi 2023-mi 1.201-it (6%) nunanit allamiuneersuupput nunanit assigiinngitsunit 45-neersut imatullu agguataarsimapput:

Nunani Avannarlernit Europami nunamit allamit Amerikap avannaanit Thailandimit Aasiap ilaanit Filippinerit Nunat allat Katillugit
Amerlassusii 147 207 37 192 94 469 55 1.201
%-inngorlugit amerlassusiat  12% 17% 3% 16% 8% 39% 5% 100%

 

Innuttaasut filippinerisut, thailandimiusut aasialluunniit ilaaneersutut innuttaassuseqartut amerliartuinnarput.

Majoriaq taannaavoq sulisussanik avataaneersunik akuersissutinik suliaqartartoq, kisianni taakku saniatigut innuttaasut allamiut Kalaallit Nunaannut tikittarput ilaqutariinnik ataatsimoortitsineq aqqutigalugu. Tamatuma saniatigut allamiutut innuttaassuseqartut meeraat, maani inunngorsimasut aamma qulaani allamiutut innuttaassuseqartutut aamma takussutissanut ilaatinneqartarput.

Tulliuttumi Majoriap avataaniit suliartortitsiniarnermi qinnuteqaatinik suliaqartarnerani periuserineqartoq nassuiarneqassaaq.

  1. Kalaallit Nunaanni nunanit allamiut sulinissaminnut pisinnaatitaaffii imatut ipput:
  • Innuttaasut Danmarkimeersut, Norgemeersut, Sverigemeersut Islandimeersullu Kalaallit Nunaanniissinnaapput sulillutillu
  • Innuttaasut najugaqarnissaminnik akuerineqartut ilaqutariinnik ataatsimoortitsinikkut qimaasutulluunniit, inunnik ikiuinermi imaluunniit piffissaligaanngitsumik nunamiissinnaanermut akuerisaasut, Kalaallit Nunaanni aamma sulisinnaapput
  • Nunanit allamiut allat sulisinnaanermut akuersissummik qinnuteqassapput – EU-mili innuttaassuseqartut visumeqartariaqanngillat

 

  1. Sulinissamut najugaqarnissamullu qinnuteqarnermi periuseq:
  • Nunanit allamiut, Kalaallit Nunaanni sulerisuttut, qallunaat nunanit allanit nunasiniartunik allaffeqarfia, Styrelsen for International Rekruttering og Integration (SIRI) aqqutigalugu qinnuteqassapput
  • Sulinissamut najugaqarnissamullu akuerineqassagaanni, qinnuteqartup sulisinnaaneranik piginnaasaanillu Kalaallit Nunaanni amigaateqartoqarnera piumasarineqarpoq, aamma qinnuteqartup suliffeqarfimmik atorfeqarnissaq pillugu isumaqatigiissuteqarnera.
  • Najukkami Majoriaq qinnuteqaatinik ataasiakkaanik nalilersuisarpoq, atorfik nunaqavissumit inuttalerneqarsinnaanersoq
  • Sulisinnaanermut akuersissut ukiumi ataatsimi atuuffeqarsinnaavoq ullormi akuerineqarfianiit – atorfeqartitaanerup sivisussusia apeqqutaatinnagu
    • Tamatuma kingornatigut sivitsuinissamik qinnuteqartoqarsinnaavoq
  • Immikkut ilinniagallit sulisinnaanermut akuersissutitaqanngitsumik qaammatini pingasuni sulisinnaapput (assersuutigalugu montørit, siunnersortit assigisaallu)
  • Suliamik suliarinninneq qaammatini pingasuni sivisussuseqartarpoq

 

  1. Suliffeqarfinnut periuseq:
  • Suliffeqarfiit, suliffeqarfimmi atorfinnik inuttaqanngitsunik piumasarineqartunillu piginnaasalinnik nunaqavissunit atorfinitsitsisinnaanngikkaangamik, avataaniit sulisussanik atuinissaminnik qinnuteqarsinnaapput
  • Suliffeqarfiit www.suli.gl-imi nalunaarsorsimassapput tamatumalu kingornatigut nuna tamakkerlugu sulisussarsiornermut nittartakkami atorfiit inuttassarsiuussat allagarsiutigineqarsinnaapput
  • Tamatuma kingorna suliffeqarfiit sulisussanik avataaneersunik Majoriaq-mi www.suli.gl aqqutigalugu qinnuteqarsinnaapput
  • Majoriaq, qinnuteqaatip tiguneraniit ullut 14-it qaangiutsinnagit, qinnuteqaat pillugu aalajangiissaaq
    • Majoriap atorfiup nunaqavissumik inuttalerneqarsinnaanersoq aalajangiinermini pingaartittarpaa

 

  1. 2023-mi sulisut avataaneersut naatsorsorneqarneri imaapput:

 

Qaammat jan. feb. mar. apr. maaji jun. Juuli aug. sep. okt. nov. dec. Katillugit
Akuersissutit amerlassusiat 42 41 51 39 40 40 36 33 22 41 42 41 468
Allaffissornikkut akuerisat 2 3 1 3 2 0 6 0 0 7 0 0 24
Sivitsuinerit amerlassusiat 16 31 36 14 41 19 16 24 18 58 33 33 339
Atorunnaarsinneqartut amerlassusiat 2 0 1 0 1 0 0 6 0 0 0 2 12
Itigartitsissutit amerlassusiat 1 8 1 1 2 1 0 7 3 3 0 27 54
Aalajangiinerit katillugit 63 83 90 57 86 60 58 70 43 109 75 103 897

 

Nalinginnaasumik avataaneersunik sulisussarsiornermik qinnuteqaatit imaluunniit sivitsuinissamik qinnuteqaatit amerlassusii, Majoriaq aqqutigalugu pisartut, ukiuni arlaqalersuni taamaaginnarsimapput. Avataaneersunik sulisussarsiorluni qinnuteqaatit tamangajammik Nuummeersuupput. Suliffeqarnermut Isumaginninnermullu Ingerlatsiviup avataaneersunik sulisussarsiorluni qinnuteqaatit akuerineqartut/itigartinneqartut qaammatit pingasukkaarlugit Suliffeqarnermut Isumaginninnermullu Ataatsimiititamut ilisimatitsissutigisarpai.

 

  1. Isumaqatigiissut Fast-Track

 

Aammattaarli Namminersorlutik Oqartussanik isumaqatigiissut Fast-track aqqutigalugu avataaniit sulisussanik atorfinitsitsisoqarsinnaanera periarfissaavoq. Fast-track-imik aaqqissuussinermi periuserineqartoq tassaavoq:

  • Suliffeqarfiit, suliassaqarfimminni suliffissaaleqisut ikittuinnaagaangata, Isumaginninnermut Suliffeqarnermullu Naalakkersuisoqarfik aqqutigalugu fast-track aqqutigalugu qinnuteqarsinnaanerat
  • Suliffeqarfiit taanna aqqutigalugu avataaneersunik atorfinitsitsinissaminnut akuersissummik ukiuni pingasuni sivisussusilimmik pissarsisarnerat
  • Isumaqatigiissutip fast-track-ip siunertarivaa piffissani suliffissaqanngitsut ikittuinnaatillugit avataaniit sulisussanik pisariaqartitsinermi sulisussarsiortarnerup pitsaanerusumik eqaallisarnissaa
  • Naalakkersuisut isumaqatigiissummik fast-track-imik atorunnaarsisitsisinnaasut suliassaqarfimmi suliffissaaruttut amerlippata
  • Innuttaasoq, suliffeqarfimmi aalajangersimasumik fast-track-imik isumaqatigiissuteqarfigineqartumi atorfinikkusussappat, sulinissaminut SIRI-mit akuersissummik suli qinnuteqartassaaq, tassanili suliap suliarineqarnera taamaallaat qaammammik ataatsimik sivisussuseqarpoq

 

Akuersissutit fast-track-it SIRI-mit tunniunneqartarput, qinnuteqartoq Namminersorlutik Oqartussanit fast-track-imik akuersissuteqarmat, taamaattumik qinnuteqaatit taakkua Majoriaq-mit suliarineqarneq ajorput.

Oqaatigineqassaarli, Fast-track-imik aaqqissuussamut akuersissut aamma qinnuteqartup ilaquttanik nassataqarsinnaanermut akuersissutaammat, tamatumanilu inuiaqatigiinni innuttaasut akornanni avataaneersunik suliartortunik tassanngaannartumik amerlisunik malunniulluni. Matumanili ilaqutaasut aamma Majoriaq aqqutigalugu akuersissummik qinnuteqartarnissaat kommunimit sulissutigineqarpoq. Taamatut iliortoqarpoq najugaqavissunik sulisussarsiortarnissap sallilunneqarnissaa pillugu.

Tassani oqaatigineqassaaq, piffissami matumani Nunanit avannarlerneersunik aamma EU-p sinneraneersunik 350-it sinnerlugit amerlassuseqartunik sulisoqarmat. Atorfinitsinneqartut taakkua mittarfiliornermi atuarfiliornermilu pipput, taamaattumik sulisut taakkua sanaartornerit naammassippata nunatsinniit aallarnissaat naatsorsuutigineqarpoq.

 

Inussiarnersumik inuulluaqqusisoq

Ejner Grønvold

Suliffeqarnermut Isumaginninnermullu Ingerlatsivimmi pisortaq