Charlotte Pike ·
Charlotte Pike
Toqqammavilersuut:
Ukioq kingulleq budgetilerinermi aningaasanik immikkoortitsiffiusut pillugit paasisaqarusullunga maanna apeqquteqarniarpunga.
Ittoqqortoormiinut tunngassuteqarput:
- Utoqqaat illuata allinissaanut suliaq 7 mill.kr., 2019 3mill.kr., 2020 4mill.kr.
- Illunik pisoqqanik isaterineq 2019 300t.kr., 2020 600t.kr., 2021 600t.kr.
Taakkua aningaasaliiffigineqarsimasut qanoq ingerlappat?
Siunertaq:
Taamatut apeqquteqaateqarninnut peqqutigaara illoqarfimmi suliat suli aallartissimarpasinngimmata killiffissiorneq piffissaalersimalluni, suliat aningaasalerneqartut timitalerniarneqalernersut.
Budgetsileritinnata paasisaqarusullunga taama apuussivunga.
The administration's answer ·
The administration's answer
Asasara Kommunalbestyrelsimut ilaasortaq, Charlotte Pike (IA)
Siullermik apeqqutigisannut qujanarujussuaq.
Aggustip ulluisa 7-t 2019 allatseqarfimmut apeqquteqarlutit nassitsivutit, Ittoqqortoormiini suliniutit aningaasaliiffigineqareersut pillugit.
Apeqqutit tunngaveqarpoq, kingullermik missingersuutinik isumaqatigiissusiornermi suliniutit aningaasaliiffigineqartut killiffii pillugit paasiniaagavit, Ittoqqortoormiini suliniutit makkuusut pillugit:
- Utoqqaat najugaqatigiiffiata allilerneqarneranut tunngasoq: 7 mill kr. 2019: 3mill kr. 2020: 4mill kr.
- Illutoqqanik iluarsaassineq: 2019: 300t kr. 2020: 600t kr. 2021: 600t kr.
Apeqqutit tunngaveqarpoq illoqarfimmi suliniutit suli aallartinngitsutut isikkoqarnerat, taamaattumik suliat killiiffii paasinissaat pisariaqarsorivat.
Sanarfinermut Avatangiisinullu Ingerlatsiviup apeqqutit suliaraa, apeqqutigisannullu siullermut paasissutissiissutigisinnaallugu 3 april 2018 illuliassamut malitassaq saqqummiussassaq missingersorneqartoq 26 mio. koruuninik á 650 m2-imik angissulilik suliarineqartoq.
24 april 2019 Isumaginninnermut Suliffissaqartitsinermullu Ingerlatsivik ataatsimeeqatigineqarpoq, pisortaq Isak Nielsen Kleist aamma fagchefi Arnannguaq Christensen, malitassat siornatigut saqqummiunneqartut 2019-imut aamma 2020-imut aningaasat immikkoortinneqartut naleqqussarnissaat siunertaralugit.
Malitassat saqqummiussassaagallartut ullulerneqarsimasut 29 maj 2019 kingorna Isumaginninnermut Suliffissaqartitsinermullu Ingerlatsivimmut oqaaseqarfigeqqullugit nassiunneqarput. Malitassat saqqummiussassat nassiunneqartut fagchefimit Arnannguaq Christensen ulloq 11 juli 2019 akuersissutigineqarput.
TB1 2019, aningaasanik illuartitsisoqarpoq, taamaalilluni 2019-imi 0.1 mio koruunit, 2020-imi 2.9 mio koruunit aamma 2021-imi 4.0 mio. koruuniullutik. Illuartitsinermi tassani aningaasat akuersissutigineqartut suli 7.0 mio. koruuniusut allanngortinneqanngillat.
Ukioq manna siunnersortimit suliniutip aallarnisarnissaa siunertaavoq. Suliniutip aallarnisarnera tamassuma kingorna pisortatigut akuersissutigineqassaaq taamaalilluni utoqqarnut najugaqatigiiffiit 2020-imi aallarnisarneqassapput 2021-imilu naammassineqarlutik.
Apeqqutivit aappaat illutoqqanik iluarsaassineq pillugu allatseqarfiup kisitsisit ilisarisinnaanngilai. Sanaartornermi 2019-imut missingersuutini 3.5 mio. koruuninik 2021-imi pisussami Ittoqqortoormiini iluarsaassinissamut atugassanik immikkoortitsisoqarpoq.
Paasissutigineqassaaq iluarsaassineq eqqaavissuarmik aaqqissuussinermik ataqatigiissarneqassammat illunik iluarsaassinermi eqqagassanik illoqarfiup ulikkaannginnissaa pillugu.
Inussiarnersumik inuulluaqqusillunga,
Hans Henrik Winther Johannsen
Sanarfinermut Avatangiisinullu Ingerlatsivimmi pisortaq