Arsaattarfiit ivigaaraasanik qallikkat

Ulloq 7. juuni 2023 “Arsaattarfiit ivigaaraasallit” pillugit allaffeqarfitsinnut apeqquteqaateqarputit. Apeqqutit imaattoq Suliffeqarfimmut Kiffartuussivimmit tiguneqarpoq:

”Kommuneqarfik Sermersuumi ullumikkut arsaattarfiit ivigaaraasallit: Gummitaritinneqartut biilit assakaasuanneersuugajupput, uanilu ajornartorsiutaasoq tassaavoq plastikkit mikisuaqqat piffissap ingerlanerani arsaaffimmiikkunnaarlutik sumi tamaani mingutsitsisunngortarnerat. Plastikkini kemikaliat tappiorannartut taakkuninnga arsaattarfinnik atuisunut ajoqutaapput. Kræfteqalissutaasinnaagamik.

1: Arsaattarfinnik taamatut ittunik massakkut pilersitsiortorneq unitsinneqassava?

2: Allatut aaqqiissutissaqartoqarpa?

3: taamaappat (2). aningaasartuutit?

4: Arsaattarfiit ivigaaraasallit pioreersut avatangiisimut ajoqutaannginnerusunik taarsersorneqassappat?

5: Taamaappat (4). aningaasartuutit?”

Asasara Justus Hansen,

Arsaattarfiit ivigaaraasallit pillugit allaffeqarfimmut apeqqutinnut qujanaq.

Ad 1. Arsaattarfiliornissaq politikkikkut aalajangigaavoq, taamaattumik aalajangiineq taanna allaffeqarfiup allanngortissinnaanngilaa. Politikkikkut nutaamik aalajangiisoqarpat taanna malillugu ingerlatsivik ingerlatsissaaq. Massakkut arsaattarfiit marluk suliaralugit ingerlanneqarput, Kuummiini aamma Qeqertarsuatsiaani. Kuummiini arsaattarfissamut atortussat pisiarineqareerput, taamaalilluni pilersaarutigineqartup allanngortinneqarnissaa kingusinaareerpoq. Qeqertarsuatsiaani arsaattarfissap suliarineqarnera uunga killippoq ingerlatsivik teknikkikkut allatut aaqqiinissaminik periarfissaqarluni, tassa sioqqat seqummarissut iffiorfikkut panertitat allequtassatullu atorlugit, gummi pinnagu.

Ad 2. Aaqqiissutissanik assigiinngitsunik peqarpoq, avatangiisimut artukkiinermikkut aamma atuisut misigisaqarnerannut assigiinngitsumik sunniutilinnik. Immikkoortoq siulleq aamma takujuk

Ad 3. Qeqertarsuatsiaani arsaattarfimmut aningaasartuutit sanaartugassanut missingersuutini pilersaarutaareersunit akilerneqarnissaat naatsorsuutigineqarpoq. Suliassat sinneri 2023-mi suliarineqarnissaat pilersaarutaavoq.

Ad 4. Arsaattarfioreersut allanngortinneqarnissaat assut aningaasartuutaassaaq. Tamanna 2024-mut missingersuutinut politikkikkut misissuiffigineqartussatut kissaatigineqarsinnaavoq, tamanna kissaatigineqarpat.

Ad 5. Siuliani immikkoortoq takuuk.

Inussiarnersumik inuulluaqqusilluta

Søren Pedersen

Sanarfinermut Avatangiisinullu Ingerlatsivimmi pisortaq