Aningaasaqarnermut Inuussutissarsiornermullu Ataatsimiititap juunip ulluisa 20-anni 2023-mi immikkoortup ilaa 40E2 Tankeqarfik, Ittoqqortoormiit pillugu pingaarnertut aalajangersakkat nutaat pillugit siunnersuut tamanut tusarniaaffigineqarnissaa aalajangerpaa.
Siunertaq
Immikkoortup ilaa 40E2 pillugu pingaarnertut aalajangersagassatut siunnersuummi immikkoortup teknikkimik atortulersuutinut siunertalinnut atorneqarnissaa aalajangiusimaneqarpoq, immikkoortulli ilaa avannamut killinga annertusitinneqassaaq taamaalilluni immikkoortoq 1,1 ha-itut annertutigilersinneqarluni. Immikkoortup ilaa taamaalilluni nunaqarfiup innaallagissiorfianik, transformatoreqarfimmik gassiisivimmillu peqarpoq tassalu immikkoortup ilaani tassani teknikkimut atortulersuutit ataatsimoortinneqarput.
Pingaarnertut aalajangersagassatut siunnersuummi nutaamik sanaartornissamut atortulersuutinillu, immikkoortup teknikkimut siunertanut atorneqarsinnaanerata ilaatut, periarfissiisoqassaaq.
Pilersaarummi siunertat tunngaviillu:
- Immikkoortup ilaani teknikkimut atortulersuutit arlallit ataatsimoortinneqarnissaannut immikkoortup ilaa allilerneqassasoq
- Immikkoortup teknikikkut siunertanut atorneqarnerata ilaatut sanaartukkanik atortorissaarutinillu allanik, sanaartorfigineqarsinnaalissasoq.
Tamanut oqallisissiaq
Pilersaarutitut siunnersuut piffissami 28. juunip – 23. aggustip 2023-ip tungaanut tamanut tusarniutigineqassaaq.
Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.
Oqaaseqaatit akerliliissutillu Kommuneqarfik Sermersuumi tiguneqareersimassapput aggustip 23-at 2023 nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl
Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.
Inatsisinut tunngasut
Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut illuliorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.
Pilersaarut uani atuarneqarsinnaavoq
Kommunimut pilersaarummut tapiliussamut siunnersuut kommunip nittartagaani www.sermersooq.gl-imi tusarniaassut ataani atuarneqarsinnaavoq, kommunip innuttaasunik kiffartuussiviini imaluunniit Sanarfinermut Avatangiisinullu ingerlatsivimmut 36 74 00-imut saaffiginninnikkut pissarsiarineqarsinnaavoq.