Illoqarfimmik Inerisaaneq

Pilersaarusiornissamut qinnuteqaat Eqingami Inissiat

10 months tilbage

Kommunalbestyrelse 29. apriili 2020‐mi ataatsimiinnerani aalajangiunneqarpoq, “Pilersaarusiornissamut qinnuteqaat Qinngutsinni Eqingami Inissiat” sapaatit‐akunnerini arfineq pingasuni tamanut tusarniaassutigineqassasoq.

Siunertaq

Qinngutsinni Eqingami nutaanik inissialiornissaq pillugu pilersaarusiornissamut qinnuteqaat Sanarfinermut Avatangiisinullu Ingerlatsivimmit tiguneqarpoq. Pilersaarusiornissamut qinnuteqaammi pineqarluni, inissialiassat 98-it ilaatigut illumik ataatsimoorussaqassalluni timigissartarfilik/cafelik/pisiniarfilik kiisalu sissaq sinerlugu kikkunnilluunniit pisuttuarfissalik.

Pilersaarusiornissamut soqutiginnittup sissaq sinerlugu pisuttuarfissap umiatsiat talittarfianut tallineqarnissaa aamma silatai kommunimit akuerineqarnissaat kommunalbestyrelsimit piumasarineqarpoq.

Suliap ingerlanissaa imatut allaaserineqarsinnaavoq:

1. Aningaasaliisussap/Suliffeqarfiup pilersaarummut qinnuteqaatini Kommunalbestyrelsimut nassiutissavaa, piumasaqaataavorli aningaasaliisussap pilersaarusiornermi tunngavigineqartoq nammineq suliarissagaa aammalu kingorna avatangiisinut tunngatillugu naliliinerit, assersuutigalugu VVM‐it nammineq isumagalugit.

2. Kommunalbestyrelsip pilersaarut akuerissavaa, ikinnerpaamillu sapaatit akunnerini arfinilinni tusarniaassutigissallugu, tassunga ilanngunneqassapput Kommunalbestyrelsip qinnuteqarnissamut piumasaqaatai, taakkulu piviusorsiortuussapput kinaassusersiortuunatillu.

3. Tusarniaanermi innuttaasut tusarniaassummut akissuteqarsinnaapput, akerliliissuteqarsinnaapput imaluunniit allanik pilersaarutaasinnaasunik tunniussaqarsinnaallutik.

4. Qinnuteqaatit tunuliaqutigalugit Kommunalbestyrelse piviusorsiortumik kinaassusersiortuunngitsumillu pilersaarummik pitsaanerpaamik toqqaassaaq.

5. Tamatuma kingorna aningaasaliisussaq ukiuni marlunni sivisussuseqarsinnaasumik nunaminertamik inniminniinissaminik periarfissaqalissaaq kommunimullu pilersaarummut tapiliussap suliarineqarnera aallartissaaq. Nunaminertamik atuinissamut inniminniinerup nalaani, immikkoortoq pillugu soqutiginnittoq nammineerluni kommunimut pilersaarummut tapiliussaliussaaq, pilersaarusiassallu angissusaa assigisaaluunniit peqqutaallutik avatangiisinut tunngatillugu nalilerneqartariaqarpat, soqutiginnittoq SMV‐mik suliaqassaaq, tassa avatangiisinut naliliinermi periaasissaq, imaluunniit VVM‐imik.

Pilersaarusiornermut inatsit naapertorlugu pilersaarutit kommunimut pilersaarummut imaluunniit politikkikkut takorluukkanut allanut naapertuutinngippata qaqugukkulluunniit Kommunalbestyrelsimit itigartitsissutigineqarsinnaapput.

Tamanut saqqummiussineq

Siunnersuut tamanut tusarniaassutigisassanngorlugu sapaatit‐akunnerini arfinilinni piffissami 6. maajimiit 1. juuli 2020‐mut saqqummiunneqarpoq.

Piffissami tusarniaaviusumi siunnersuut pillugu oqaaseqaateqartoqarlunilu akerliliissuteqartoqarsinnaavoq. Allanik pilersaarutaasinnaasut, oqaaseqaatit akerliliissutillu Kommuneqarfik Sermersuumi ulloq 1. juuli 2020 nallertinnagu tiguneqareersimassaput, nassiunneqassallutillu uunga Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunnit mailikkut: plan@sermersooq.gl

Piffissarititap iluani oqaaseqaatit akerliliissutillu tiguneqartut kommunimut pilersaarummut tapiliussap Kommunalbestyrelsip inaarutaasumik suliarineranut ilaatinneqassapput.

Illuliornissamut pilersaarut uani atuarneqarsinnaavoq

Illuliornissamut qinnuteqaat kommunip nittartagaani www.sermersooq.gl‐imi tusarniaanerni atuarneqarsinnaavoq, kommunimi innuttaasunik kiffartuussivimmi, kommunillu nittartagaani www.sermersooq.gl‐imi imaluunniit Sanarfinermut Avatangiisinullu ingerlatsivimmut oqarasuaammut 36 74 00‐imut sianerluni saaffiginninnikkut pissarsiarineqarsinnaavoq.