Kommunalbestyrelse ataatsimiinnerminni ulloq 27.08.2019 aalajangerpoq, “Pilersaarummut qinnuteqaat Qullilerfik” nassiutissallugu sapaatip-akunnerini arfineq pingasuni tusarniaassutigineqassasoq.
Siunertaq
Sanarfinermut Avatangiisinullu Ingerlatsivik Nuummi Qullilerfimmi qaqqaq sinerlugu nutaanik inissialiornissamut nunaminertamik atugassamik atuinissamut immikkoortitsiffigineqarnissamik qinnuteqaammik tigusaqarpoq. Qinnuteqaatigineqartumi inissialiassat 56-iupput, biilinut uninngasarfissanut nunaminertassat aammalu Imanermiit qaqqaq sinerlugu Qapiarfiusaamut majuartarfiit uninngaarfissanik toqqissortallit.
Inatsisartut inatsisaat nr 34, 9, decembari 2015-imeersoq malillugu nunaminertamik inniminniisoqarnissaa, kingorna nunaminertamik atugassinneqarnissaq siunertaralugu, qinnutigineqarpoq..
Suliap ingerlanissaa imatut allaaserineqarsinnaavoq:
- Aningaasaliisussap/Suliffeqarfiup pilersaarummut qinnuteqaatini Kommunalbestyrelsimut nassiutissavaa, piumasaqaataavorli aningaasaliisussap pilersaarusiornermi tunngavigineqartoq nammineq suliarissagaa aammalu kingorna avatangiisinut tunngatillugu naliliinerit, assersuutigalugu VVM-it nammineq isumagalugit.
- Kommunalbestyrelsip pilersaarut akuerissavaa, ikinnerpaamillu sapaatit akunnerini arfinilinni tusarniaassutigissallugu, tassunga ilanngunneqassapput Kommunalbestyrelsip qinnuteqarnissamut piumasaqaatai, taakkulu piviusorsiortuussapput kinaassusersiortuunatillu.
- Tusarniaanermi innuttaasut tusarniaassummut akissuteqarsinnaapput, akerliliissuteqarsinnaapput imaluunniit allanik pilersaarutaasinnaasunik tunniussaqarsinnaallutik.
- Qinnuteqaatit tunuliaqutigalugit Kommunalbestyrelse piviusorsiortumik kinaassusersiortuunngitsumillu pilersaarummik pitsaanerpaamik toqqaassaaq.
- Tamatuma kingorna aningaasaliisussaq ukiuni marlunni sivisussuseqarsinnaasumik nunaminertamik inniminniinissaminik periarfissaqalissaaq kommunimullu pilersaarummut tapiliussap suliarineqarnera aallartissaaq. Nunaminertamik atuinissamut inniminniinerup nalaani, immikkoortoq pillugu soqutiginnittoq nammineerluni kommunimut pilersaarummut tapiliussaliussaaq, pilersaarusiassallu angissusaa assigisaaluunniit peqqutaallutik avatangiisinut tunngatillugu nalilerneqartariaqarpat, soqutiginnittoq SMV-mik suliaqassaaq, tassa avatangiisinut naliliinermi periaasissaq, imaluunniit VVM-imik.
Pilersaarusiornermut inatsit naapertorlugu pilersaarutit kommunimut pilersaarummut imaluunniit politikkikkut takorluukkanut allanut naapertuutinngippata qaqugukkulluunniit Kommunalbestyrelsimit itigartitsissutigineqarsinnaapput.
Tamanut saqqummiussineq
Siunnersuut tamanut tusarniaassutigisassanngorlugu sapaatit-akunnerini 8-ni saqqummiunneqassaaq piffissami 04.09.2019 – 30.10.2019.
Piffissami tusarniaaviusumi siunnersuut pillugu oqaaseqaateqartoqarlunilu akerliliissuteqartoqarsinnaavoq.
Oqaaseqaatit akerliliissutillu Kommuneqarfik Sermersuumi ulloq 30.10.2019 nallertinnagu tiguneqareersimassaput nassiunneqassappullu uunga Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunnit mailikkut: plan@sermersooq.gl
Piffissarititap iluani oqaaseqaatit akerliliissutillu tiguneqartut kommunimut pilersaarummut tapiliussap Kommunalbestyrelsip inaarutaasumik suliarineranut ilaatinneqassapput.
Illuliornissamut pilersaarut uani atuarneqarsinnaavoq
Illuliornissamut qinnuteqaat kommunip nittartagaani www.sermersooq.gl-imi tusarniaanerni atuarneqarsinnaavoq, kommunimi innuttaasunik kiffartuussivimmi, kommunillu nittartagaani www.sermersooq.gl-imi imaluunniit Sanarfinermut Avatangiisinullu ingerlatsivimmut oqarasuaammut 36 74 00-imut sianerluni saaffiginninnikkut pissarsiarineqarsinnaavoq.