Kommuneqarfik Sermersuup Nuup Kangerluani qipoqqarnik eqqissisimatitsinissaq pillugu kommunip ileqqoreqqusassaatut siunnersuut, ilaatigut takornariaqarnermik inuussutissarsiuteqartut toqqammavissaattut aammalu Kommuneqarfik Sermersuup takornarialerinermi periusissiaanik tapersersuisussaq tusarniaassutigissavaa.
Siunertaq
Nuummi mittarfiup 2.200 meterinut tallineqarnissaanut atatillugu takornarialerinermi periarfissat annertusineqarnissat naatsorsuutigineqarmat, ileqqoreqqusami Nuup Kangerluaniit (takuuk assitaa) qipoqqarniarnerup nuutinneqarnissaa siunertarineqarpoq. Taava aamma kangerlummi qipoqqaat amerlinerisigut illoqarfimmi innuttaasut aliannaarsaariarnissaminnut periarfissagissaarnerulissasut naatsorsuutigineqarpoq. Kangerluup avataani suli qipoqqarniartoqarsinnaammat, inuussutissarsiutigalugu piniartunut ileqqoreqqusap annertunerusumik sunniuteqarnissaa naatsorsuutigineqanngilaq, aammalu aningaasatigut taarsiissuteqartoqarnissaanik pisariaqartitsisoqanngitsoq nalilerneqarpoq.
Siunnersuut piffissami 2021-mi januaarip ulluisa 29-annit 2021-mi februaarip ulluisa 26-anni nal. 12-ip tungaanut sapaatit akunnerisa sisamat ingerlanerini tamanut tusarniaanikkut saqqummiunneqassaaq.
Nuup Kangerluani qipoqqarnik eqqissisimatitsinissaq pillugu oqaaseqaatit akerliliissutillu piffissaq eqqorlugu pissarsiarineqartut Kommunalbestyrelsip kommunip ileqqoreqqusassaanik inaarutaasumik suliarinninnissaanut ilanngunneqassapput.
Siunnersuut kommunip nittartagaani www.sermersooq.gl-imi tusarniaanerniittoq una toorlugu atuarneqarsinnaavoq, kommunimi innuttaasunik kiffartuussivimmi pissarsiarineqarsinnaalluni, imaluunniit aamma attaveqaqatigiinnermut oqarasuaammut 36 70 00-imut sianerluni saaffiginninnikkut pissarsiarineqarsinnaavoq.
Tusarniaanermut oqaaseqaatit, imaluunniit akerliliinerit uunga nassiunneqarsinnaapput:
E-mail: kommunikation@sermersooq.gl
Suliffeqarfimmut Kiffartuussivik
Innuttaasunik Kiffartuussivik
Postboks 1005
3900 Nuuk