Aningaasaqarnermut Inuussutissarsiornermullu Ataatsimiititap 25. novembari 2021-mi ataatsimiinnermini aalajangerpaa, Kommunimut pilersaarummut tapiliussatut siunnersuut 2A3-2 Manngua tamanut tusarniaassutigineqassasoq.
Siunertaa
Kommunimut pilersaarummut tapiliussatut siunnersuummi immikkoortup ilaa 2A3 immikkuualuttunut marlunnut avinneqarpoq. Illut pioreersut avannaatungaanni immikkuualuttumi sanaartorfissat marluk atugassiissutigineqarput, taamaalilluni meeqqanut inuusuttunullu najugaqarfimmik pilersitsinissaq periarfissiissutigineqarpoq. Nutaamik sanaartornermi quleriit ataaseq marlulluunniit sanaartorneqarsinnaapput, sanaartorfissallu atugassiissutigineqarput siunissami sanaartukkat nutaat akornanni kaajaluisaqarfissalerlugit, sukisaarsaarnermullu tunngasunik pilersitsinerup saniatigut biilinik unittarfeqarnissaq periarfissaassaaq. Immikkuualuttoq pilersitaq nutaaq Nuussuarmi aqqusinermut pingaarnermut aqqutilerneqassaaq attaveqaatit pitsaanerulersinniarlugit kiisalu Mannguani inissianut aqqutip pioreersup aqqusaartugaavallaalernissaa pinaveersaartinniarlugu.
Siunnersuummi Mannguata isikkua attatiinnarneqarnissaa pingaartinneqarpoq, tamannami ilaqutariinnut ataatsinik, illunik affarleriinnik aamma uiguleriinnik peqarneruvoq.
Nuussuup Mannguanut sukisaarsaartarfimmut aqqut pitsaasoq attatiinnarneqarpoq kiisalu immikkoortup iluani cykelertunut pisuinnarnullu aqqutinik atugassaritinneqartut pitsanngorsarneqarlutik.
Tamanut oqallisissiaq
Siunnersuut sapaatip-akunnerini 6-ini tamanut tusarniaassutigisassanngorlugu saqqummiunneqassaaq, piffissami 22. decembari 2021 – 02. februaari 2022.
Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.
Oqaaseqaatit akerliliissutillu Kommuneqarfik Sermersuumi tiguneqareersimassapput 02. februaari 2022 nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl
Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.
Inatsisinut tunngasut
Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut illuliorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.
Pilersaarut uani atuarneqarsinnaavoq
Kommunimut pilersaarummut tapiliussamut siunnersuut kommunip nittartagaani, kommunip innuttaasunik kiffartuussiviini imaluunniit Sanarfinermut Avatangiisinullu ingerlatsivimmut 36 74 00-imut saaffiginninnikkut pissarsiarineqarsinnaavoq.