Sanarfinermut Avatangiisinullu Ingerlatsivik

Kommunimut pilersaarummut tapiliussatut siunnersuut, 4E2-1 Niaqornannguaq, pillugu

3 years tilbage

Kommunimut pilersaarummut tapiliussatut siunnersuut, 4E2-1 Niaqornannguaq, pillugu

Aningaasaqarnermut Inuussutissarsiornermullu Ataatsimiititap 08. februar 2018 ataatsimiinnermini aalajangerpaa Kommunimut pilersaarummut tapiliussatut siunnersuut 4E2-1 tamanut tusarniaassutigineqassasoq.

Kommunimut pilersaarummut tapiliussap siunertaa:
Kommunimut pilersaarummut tapiliussamut siunnersuut antenneqarfimmik pilersitsinissamut sinaakkutissanik pilersitsisoqarnissaanik kissaateqarnermik tunuliaqutaqarpoq. Qaammataasiaq aqqutigalugu internetimik sukkanermik nunarsuup sinneranut kiffartuussinissamik pilersitsinissamik kissaateqarneq.  Sukkasuumik internitsikkut attaveqarneq akikitsumik kiffartuussissutaasaaq, taannalu nunarsuarmi sumiikkaluaraanniluunniit iserfigineqarsinnaassaaq, inuilaaniluunniit. Ingerlatsiviup pineqaatissinneqarsimasunut inissiisarfissap avannaatungaani sanaartorfissanik marlunnik atortutigut pilersaarusiornermilu periusissamut tulluartumik tikkuaasimapput.  Sumiiffik kommunimut pilersaarummut atuuttumut teknikkimut atortulersuutinut atugassatut inniminnigaavoq.
Antenneqarfiup aaqqissuusaanera periarfissaqarneralu pinngortitarsuarmut Quassussuup avannaatungaaniittumut sumiiffimmullu sanaartornissamut pilersaarutaasunut tulluartuutinneqarpoq.
Kommunimut pilersaarummut tapiliussami timaani aqquteeqqat pioreersut qulakkeerneqassaaq Kuannninnguanut Nuullu timaanut sukisaarsaartarfiit akornutissaqanngitsumik aqqusaarneqarsinnaanissaat.

Tamanut oqallisissiaq
Siunnersuut tamanut tusarniaassutigineqassaaq sap.ak. 6-ni piffissami 14. 02. 2018 – 28. 03. 2018.
Tusarniaassutigineqarnerata nalaani siunnersuummut oqaaseqaateqarnissamut akerliliinissamullu periarfissaavoq.

Oqaaseqaatit akerliliissutillu Kommuneqarfik Sermersuumi ulloq  28. 03. 2018  nallertinnagu tiguneqareersimassaput nassiunneqassappullu uunga Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunnit mailikkut: plan@sermersooq.gl

Oqaaseqaatit akerliliissutillu piffissaagallartillugu tiguneqartut Kommunalbestyrelsimi inaarutaasumik kommunimut pilersaarummik suliarinninnermi ilaatinneqassapput.

Inatsisinut tunngasut
Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut sanaartorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.

Pilersaarut uani atuarneqarsinnaavoq
Kommunimut pilersaarummut tapiliussaq Nunatta Atuagaateqarfiani atuarneqarsinnaavoq, kommunimi innuttaasunik sullissivimmi, kommunillu nittartagaani www.sermersooq2028.gl -imi imaluunniit Sanarfinermut Avatangiisinullu ingerlatsivimmut oqarasuaat 36 74 00-imut sianerluni saaffiginninnikkut pineqarsinnaavoq.