Illoqarfimmik Inerisaaneq

Kommunimut pilersaarummut tapiliussatut O10-1 Nunatarsuaq, Nuuk siunnersuut

1 month tilbage

Aninagasaqarnermut Inuussutissarsiornermullu Ataatsimiititap aggustiip 18-ianni 2022 aalajangerpaa, kommunimut pilersaarummut tapiliussatut siunnersuut O10-1 tamanut tusarniaassutigineqassasoq.

Siunertaa
Kommunimut pilersaarummut tapiliussamut siunnersuutip nunaannarmi immikkoortup ilaanik nutaamik, tammajuitsussarsiorluni tuttunniartitsinissamut akuersissutigineqartussatut atorneqarsinnaasumik pilersitsisoqarnissaa imaraa. Sumiiffik katillugu 815 km2-it missaanni annertussuseqarpoq, tassa Nuup Kangerluani avannarpasissumi Immikkoortup ilaa O2 Inuilaarsuaq – Nerutusoq Avannarliup sanaartorfioqqusaanngitsup iluani.

Immikkoortup ilaata siunnersuutigineqartup O10-p iluani sumiiffiit pingasut akuersissuteqarfissatut atugassanngortinneqassapput. Taakku Naalakkersuisoqarfimmiit ataatsimut akuersissutissatut imaluunniit pingasunngorlugit akuersissutinik piginnittunut assigiinngitsunut akuersissutissatut neqeroortitsissutigineqarsinnaapput. 

Kommunimut pilersaarummut tapiliussami tunngaviit tassaapput:

  • Immikkoortup ilaa O10-mik nutaamik immikkoortuliornissaq
  • O10-p sumiiffittut tammajuitsussarsiorluni tuttunniartitsinissamut akuersissutigineqartussatut atugassianngorlugu aalajangersarneqarnissaa.
  • Nunaannaap naleqquttumik atorneqarnissaanik qulakkeerinissaq, aamma takornarianut sukisaarsaatigalugu piniartartunut pitsaasunik atugassaqartitsinissaq.
  • Sumiiffimmi pineqartumi akuersissummut attuumassuteqartumik tammaarsimaarfiliornissamik, tuperfiliornissamik assigisaanilluunniit periarfissaqartitsinissamik qulakkeerinissaq.

Tamanut oqallisissiaq
Pilersaarutitut siunnersuut piffissami 31 aggusti – 26 oktobari 2022-ip tungaanut tamanut tusarniutigineqassaaq.

Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.

Oqaaseqaatit akerliliissutillu Kommuneqarfik Sermersuumi tiguneqareersimassapput oktobari 26-at 2022 nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl

Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.

Inatsisinut tunngasut
Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut illuliorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.

Pilersaarut uani atuarneqarsinnaavoq
Kommunimut pilersaarummut tapiliussamut siunnersuut kommunip nittartagaani www.sermersooq.gl-imi tusarniaassut ataani atuarneqarsinnaavoq, kommunip innuttaasunik kiffartuussiviini imaluunniit Sanarfinermut Avatangiisinullu ingerlatsivimmut 36 74 00-imut saaffiginninnikkut pissarsiarineqarsinnaavoq.