Illoqarfimmik Inerisaaneq

Kommunimut pilersaarummut tapiliussatut Nunaannarmut pilersaarut 2-2, Nuup eqqaani nunataq siunnersuut

8 months tilbage

Aninagasaqarnermut Inuussutissarsiornermullu Ataatsimiititap juuniip 25-ianni 2020 aalajangerpaa, kommunimut pilersaarummut tapiliussatut siunnersuut Nunaannarmut pilersaarut 2-2, Nuup eqqaani nunataq tamanut tusarniaassutigineqassasoq.

Siunertaa

Pilersaarutitut siunnersuummi killeqarfiit sumiiffiillu toqqarneqarput, siunissami sunngiffimmi illuaraliorfigineqarsinnaasut, takornarialerisunut tammaarfiliorfigineqarsinnaasut, meeqqeriviit allallu illuaraliorfigisinnaasaat. Maannakkut kommunimut pilersaarummut tapiliussatut siunnersuummi, inuilaarsuarmi piffissami aalajangersimasumi atortunik inaaliinissamut, tupeqarfiliornissamut aammalu utaqqiisaasumik oqquiffissaliornissamut periarfissiisoqassaaq.

Pilersaarutitut siunnersuutikkut matumuuna periarfissaatinneqassaaq, inuussutissarsiornermut atatillugu atugassiamik aqqusinniornissaq imaluunniit takornarialerinermik siuarsaanissamik siunertat pingaarnerutillugit ass. ATV-nut assigisaanullu aqqusiortoqarsinnaanera.

Kommunimut pilersaarummut tapiliussatut siunnersuummi matumani immikkoortut ilaat arlallit taaguutaasigut killeqarfiisigulluunniit allanngortinneqassapput. Soorlu aamma illuaraqarfioreersuni nutaanik immikkoortulersuisoqassasoq imaluunniit nutaanik illuaraliortoqarnissaa pisariaqalissappat tamanna periarfissaatinneqassasoq.

Tamanut oqallisissiaq

Pilersaarutitut siunnersuut piffissami 01. juulimiit 26. aggusti 2020-ip tungaanut tamanut tusarniutigineqassaaq.

Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.

Oqaaseqaatit akerliliissutillu Kommuneqarfik Sermersuumi tiguneqareersimassapput aggusti 26-at 2020 nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl   

Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.

Inatsisinut tunngasut

Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut illuliorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.

Pilersaarut uani takuneqarsinnaavoq

Kommunimut pilersaarummut tapiliussaq Nunatta atuagaateqarfiani atuarneqarsinnaavoq, kommunip saaffiginnittarfiani pissarsiarineqarsinnaalluni, kommunip nittartagaani aaneqarsinnaalluni www.sermersooq.gl imaluunniit Sanarfinermut Avatangiisinullu ingerlatsivimmut uunga sianerluni 36 74 34 saaffiginninnikkut pissarsiarineqarsinnaalluni.