Illoqarfimmik Inerisaaneq

Kommunimut pilersaarummut tapiliussatut N1-1 – Utoqqarmiut Kangerluarsunnguami erngup nukinganik nukissiorfik, nunaannarmi siunnersuut

6 months tilbage

Aninagasaqarnermut Inuussutissarsiornermullu Ataatsimiititap septembariip 23-ianni 2021 aalajangerpaa, kommunimut pilersaarummut tapiliussatut siunnersuut N1-1 tamanut tusarniaassutigineqassasoq.


Siunertaa
Kommunimut pilersaarummut tapiliussaq una Kangerluarsunnguami nukiliorfiup, Nuummik innaallagissamik pilersuisup annertusineqarnissaanik Namminersorlutik Oqartussat Nukissiorfiillu kissaataat tunngavigalugu suliarineqarpoq. Nunataq tamangajammi pinngortitaavoq, immikkoortullu ilaa tamanna immikkoortitaavoq, nunaannartut taaneqartarnera pissutigalugu.

Pilersaarummi matumani Kangerluarsunnguup tasersuata Isortorsuullu tasiata akornanni nutaamik sullorsualiortoqarnissaa periarfissinneqassaaq. Taamaaliortoqarniarpoq nukiliorfiup tamakkiisumik piginnaasaata annertusinissaa, taamaasilluni siunissami Nuup inuttusiartornera ilutigalugu innaallagissamik pilersorsinnaaniassammagu. Sullorsualiarineqartussami sullorsuup isuani isaariaanilu isaarialiortoqassaaq, generatorilerlugu/tankilerlugu mikisunillu sulisut initassaannik sanatitsisoqassalluni (upalungaarsimaneq eqqarsaatigalugu). Aamma sullorsuarnut qanittumi isaarissanut atortunut sinneruttunut atortussaasiviliortoqassaaq. Pilersaarummut tapiliussaq una aamma aqqutigalugu nukiliorfimmik nutaamik sanatitsisoqarsinnaalissaaq, pioreersumut tapertaasussamik.

Aqquserngit sulinermi atugassat suliarineqarsinnaapput, aqqutiliat imaluunniit illunut, sanaartukkanut allanullu nunaminertamik atuinernut attuumassuteqartunik, ilanngussami inissisimaffissaa innersuussutigalugu. Aqquserngit, aqqutiliat aqqusineeqqallu tamanit isumannaatsumik tikinneqarsinnaassapput.

Tamanut oqallisissiaq
Pilersaarutitut siunnersuut piffissami 29.09.2021-24.11.2021 tungaanut tamanut tusarniutigineqassaaq.

Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.

Oqaaseqaatit akerliliissutillu Kommuneqarfik Sermersuumi tiguneqareersimassapput 24.11 2021 nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl   

Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.

Inatsisinut tunngasut
Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut illuliorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.

Pilersaarut uani atuarneqarsinnaavoq
Kommunimut pilersaarummut tapiliussamut siunnersuut uani atuarneqarsinnaavoq, kommunip innuttaasunik kiffartuussiviini imaluunniit Sanarfinermut Avatangiisinullu ingerlatsivimmut 36 74 00-imut saaffiginninnikkut pissarsiarineqarsinnaavoq.


PDF: Kommunimut pilersaarummut tapiliussatut N1-1 – Utoqqarmiut Kangerluarsunnguami erngup nukinganik nukissiorfik, nunaannarmi siunnersuut

PDF: Forslag til KPT N1-1 – Vandkraftanlæg i Utoqqarmiut Kangerluarsunnguat (Buksefjorden), det åbne land