Aninagasaqarnermut Inuussutissarsiornermullu Ataatsimiititap marsip 21-ianni 2023 aalajangerpaa, kommunimut pilersaarummut tapiliussatut siunnersuut L9-1 tamanut tusarniaassutigineqassasoq.
Siunertaa
Kommunimut pilersaarummut tapiliussaq una aqqutigalugu immikkoortup ilaa L-imi nutaamik takornarialerinermi siunertanut atugassiisoqassaaq. Immikkoortoq Kapisillit avannaatungaani Amitsuarsuup paavata nalaani kujallermiippoq. Kangerluk naggorissunik sivinganertaqartiterpoq, tamaanilu kuuit kuunnguillu arlaqarlutik. Immikkoortup ilaata kangiatungaa eqaloqarfiunngitsumik kooqarpoq.
Pilersaarummi siunertat tunngaviillu:
- Takornarianut illuaqqanik / akunnittarfittut atuuffilinnik immikkoortumik L-imik nutaamik ilanngussisoqassasoq.
- Unnuisarfinnik pitsaasunik 12-nik sanaartornissaq, neriniartarfik soqutiginarsakkanik pitsaasunik sassaallerfiusoq atortulersuutillu sanaartorfimmut attuumassuteqartut pilersinnissaannut aalajangersakkat qulakkeernissaat.
- Ataatsimut sanaartukkat tulleriissaarlugit suliarineqarsinnaaneri aalajangersakkatigut qulakkeerneqarnissaa.
- Talittarfimmik sanaartornissat aalajangersakkatigut qulakkeerneqarnissaa.
- Sumiiffimmi tamani piujuartitsinermik suliniutit nassuiaatitaat, ilaatigut seqerngup qinngorneranik nukissiuutit ilanngullugit aalajangersakkatigut qulakkeerneqarnissaa
- Talittarfimmit neriniartarfimmut unnuisarfinnullu aqqusiornissap qulakkeernissaa.
Tamanut oqallisissiaq
Pilersaarutitut siunnersuut piffissami 29. marsip – 24. maajip 2023-ip tungaanut tamanut tusarniutigineqassaaq.
Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.
Oqaaseqaatit akerliliissutillu Kommuneqarfik Sermersuumi tiguneqareersimassapput maajip 24-at 2023 nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl
Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.
Inatsisinut tunngasut
Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut illuliorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.
Pilersaarut uani atuarneqarsinnaavoq
Kommunimut pilersaarummut tapiliussamut siunnersuut kommunip nittartagaani www.sermersooq.gl-imi tusarniaassut ataani atuarneqarsinnaavoq, kommunip innuttaasunik kiffartuussiviini imaluunniit Sanarfinermut Avatangiisinullu ingerlatsivimmut 36 74 00-imut saaffiginninnikkut pissarsiarineqarsinnaavoq.