Aninagasaqarnermut Inuussutissarsiornermullu Ataatsimiititap maajiip 20-ianni 2021 aalajangerpaa, kommunimut pilersaarummut tapiliussatut siunnersuut L8-1 tamanut tusarniaassutigineqassasoq.
Siunertaa
Kommunimut pilersaarummut tapiliussap siunertaraa Amerikamiut Sorsunnersuit Aappaanni sakkutooqarfigisimasaasa inuerunnikup, Ikkatteq Bluie East 2, ilaata pigiinnarnissaa tamaanilu nutaanik suliniuteqartoqarsinnaalersillugu, taamaaliornermi tamatuma oqaluttuassartaata ingerlateqqinnissaa, tamatuma ornigarneqartuaannarnissaa kiisalu takornarianut isumannaatsuunissaa anguniarneqarluni.
Siunnersuummi sakkutooqarfimmi talittarfiit pitsanngorsarneqarnissai aamma paasititsiivinnik pilersitsinissaq, issiaviit takisuut kiisalu pisuttuartunut aqqutit nalunaarsorneqarneri, ilaatigut nutaanik siunissami pisuttuartarfittut aqqutaasinnaasunik nalunaaqutsersuisoqarsinnaanissamut, periarfissiisoqarpoq. Tamatuma saniatigut nutaanik sanaartornissamut nunaminertanik atugassiisoqarpoq, tassa illu saqqummiisarfik, oqquisarfiit shelterillu.
Sanarfinermut Avatangiisinullu Ingerlatsivimmit siunnersuut immikkoortup oqaluttuarisaaneranik amerikamiullu sakkutooqarfia inuerunnikoq, Ikkatteq Bluie East 2, qulakkeerneqarnissaanut saniatigullu immikkoortup sukisaarsaarfiusinnaaneranut pingaaruteqassussaata annertunerulersinneranut iluaqutaassasoq nalilerneqarpoq.
Ingerlatsiviup siunnersuummi immikkoortup pitsaasumik ineriartortinneqarnissaa, Illuliortaatsikkut Politikimi akuerisat malillugit aammalu kommunimut pilersaarut Sermersooq2032 malillugit, qulakkeerneqassasoq nalilerpaa.
Tamanut oqallisissiaq
Siunnersuut tamanut tusarniaassutigisassanngorlugu sapaatip-akunnerini 8-ni saqqummiunneqarpoq, piffissami 26. maaji – 21. juuli 2021.
Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.
Oqaaseqaatit akerliliissutillu Kommuneqarfik Sermersuumi tiguneqareersimassapput juuli 21-at 2021 nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl
Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.
Inatsisinut tunngasut
Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut illuliorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.
Pilersaarut uani atuarneqarsinnaavoq
Kommunimut pilersaarummut tapiliussamut siunnersuut kommunip nittartagaani uani tusarniaassut ataani atuarneqarsinnaavoq, kommunip innuttaasunik kiffartuussiviini imaluunniit Sanarfinermut Avatangiisinullu ingerlatsivimmut 36 74 00-imut saaffiginninnikkut pissarsiarineqarsinnaavoq.