Aninagasaqarnermut Inuussutissarsiornermullu Ataatsimiititap maajiip 21-ianni 2020 aalajangerpaa, kommunimut pilersaarummut tapiliussatut siunnersuut 2B2-5, inuussutissarsiuteqarfik Qeqertat tamanut tusarniaassutigineqassasoq.
Siunertaa
Kommunimut pilersaarummut tapiliussami uani siunertaavoq, Qeqertat inuussutissarsiuteqarfittut piorsarneqarnerata ingerlatiinnarneqarnissaa qulakkeerneqarnissaa aamma pilersaarutitut tunngavimmi pioreersumi imatut allannguisoqassasoq:
- Annertussuseq immikkuualuttuni A aamma C allanngortinneqassaaq, tankeqarfiup toqqavianut nunamut atasortaa pioreersoq 3.600 m2 miss. allilerneratigut. Tankeqarfiup pioreersup sissaata kujataatungaata nunniorneratigut tamanna pissaaq.
- Immikkuualuttoq B allilerneqassaaq (avannamut kangiatungaani immikkuualuttoq A annikillineratigut), immerlugu 15.000 m2 miss sissaq immerneratigut taannalu talittarfeqarfimmut atatillugu atorneqarsinnaavoq.
- Immikkuualuttoq nutaaq pilersinneqassaaq, immikkuualuttoq E, immerneqareeriarpat inuussutissarsiutinik siunertalinnut, quersuaqarnermut allanulluunniit inaalitsivittut talittarfiup eqqaaniittariaqartunut atorneqarsinnaasoq. Immikkuualuttoq E sanaartorfiussaguni qummut 15 m portunerussanngilaq.
Immikkuualuttut atorneqarnerat ataasiakkaani allaaserineqassaaq:
- Immikkuualuttoq A talittarfeqarnermut siunertaqassaaq.
- Immikuualuttut B, C & D talittarfeqarnermik inuussutissarsiornermut atugassanngortinneqassapput.
- Immikkuualuttoq E quersuaqarfittut allanulluunniit inaalitsivittut talittarfeqarfiup eqqaaniittariaqartunut siunertalinnut atugassanngortinneqassaaq.
Tamanut oqallisissiaq
Pilersaarutitut siunnersuut piffissami 16.09.2020 – 11.11.2020-ip tungaanut tamanut tusarniutigineqassaaq.
Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.
Oqaaseqaatit akerliliissutillu Kommuneqarfik Sermersuumi tiguneqareersimassapput 11.11.2020 nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl
Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.
Inatsisinut tunngasut
Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut illuliorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.
Pilersaarut uani takuneqarsinnaavoq
Kommunimut pilersaarummut tapiliussaq Nunatta atuagaateqarfiani atuarneqarsinnaavoq, kommunip saaffiginnittarfiani pissarsiarineqarsinnaalluni, kommunip nittartagaani aaneqarsinnaalluni www.sermersooq.gl imaluunniit Sanarfinermut Avatangiisinullu ingerlatsivimmut uunga sianerluni 36 74 34 saaffiginninnikkut pissarsiarineqarsinnaalluni.