Aningaasaqarnermut Inuussutissarsiornermullu Ataatsimiititap 12. decembari 2023-mi Kommunimut pilersaarummut tapiliussatut siunnersuut 4A3-1, Nuummi Ningitsiviup Kujataata tungaa, tamanut tusarniaassutigineqassasoq aalajangerpaa.
Siunertaa
Matumani Kommunimut pilersaarummut tapiliussaq suliarineqarpoq pilersaarummik qinnuteqaat, Kommuneqarfik Sermersuumi kommunalbestyrelsimit februaarimi 2022-mi akuerineqartoq, tunngavigalugu.
Kommunimut pilersaarummut tapiliussami immikkoortup ilaata siunertanut C-nut atorneqarneraniit immikkoortoq A-mut allanngortinneqarpoq. Immikkoortup ilaa assigiinngitsunut inissialiorfissatut soorlu illunut uiguleriiaanut quleriiaanullu atugassanngortinneqarpoq. Immikkoortup ilaanik killeqarfilersuineq allanngortinneqassaaq, taamaalilluni Aqqusineq Dronning Margrethe II-ip qeqqa malillugu killeqarfilersorneqassalluni.
Pilersaarummi siunertat tunngaviillu:
- 4A3-p illoqarfiup ilaatut ineriartortinnissaa periarfissaqartikkusullugu sanaartorfissat inissialiornermut atugassanngortinneqarput.
- Aqqusernernut, aqqusineeqqanut, biilinut inissiivinnut ataatsimoorussamillu sukisaarsaarfinnut nunaminertanik atugassiineq.
- Sanaartorfiup isikkivik, aqqutit, nunap ilusaa sumiiffiullu qanoq issusaa eqqarsaatigalugit inissinneqarnissaa.
- Sanaartornerit sumiiffiup nunataata pitsaassusaanut naleqqunnissai qularnaarniarlugu.
- Sumiiffik aqqusaarlugu sinersilluni aqqutiliortoqarnissaanut periarfissiinissaq.
Tamanut oqallisissiaq
Pilersaarutitut siunnersuut piffissami 20. decembari 2023 – 14. februaari 2024-ip tungaanut tamanut tusarniutigineqassaaq.
Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.
Oqaaseqaatit akerliliissutillu Kommuneqarfik Sermersuumi tiguneqareersimassapput februaarip 14-at 2024 nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl
Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.
Inatsisinut tunngasut
Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut illuliorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.
Pilersaarut uani atuarneqarsinnaavoq
Kommunimut pilersaarummut tapiliussamut siunnersuut kommunip nittartagaani tusarniaassut ataani atuarneqarsinnaavoq, kommunip innuttaasunik kiffartuussiviini imaluunniit Sanarfinermut Avatangiisinullu ingerlatsivimmut 36 74 00-imut saaffiginninnikkut pissarsiarineqarsinnaavoq.