Aninagasaqarnermut Inuussutissarsiornermullu Ataatsimiititap apriilip 28-ianni 2022 aalajangerpaa, kommunimut pilersaarummut tapiliussatut siunnersuut 3E5-5 tamanut tusarniaassutigineqassasoq.
Siunertaa
Nutaamik mittarfittaarnermut atatillugu ujaqqerivik pioreersoq pineqartup kitaatungaaniittoq matuneqassasoq siunnersuummi tunngavigineqarpoq. Tamanna silaannaap aalarulunnera pissutigalugu mittarfimmik akuersissummik piginnittumit, tassa KAIR-imit, piumasaqaatigineqarpoq. Taamaammat ujaqqerivittut ingerlatsisumut sumiiffimmik nutaamik ujartuinissaq pingaaruteqarsimavoq, tassami sanaartortunut tamanna pingaaruteqarluinnarmat.
Kommunimut pilersaarummut tapiliussamut siunnersuut una atorlugu mittarfiup kangianut ujaqqerivik inissinneqassasoq siunnersuutigineqarpoq, immikkoortoq pineqartoq mittarfissap ujaqqanik nussuiffigineqarnissaanut atatillugu qaartiteriffiuvoq. Taamaalilluni ujaqqerivik nutaaq atorlugu mittarfiup sanaartorneqarneranut qaartiterineq nanginneqassaaq portussusaa mittarfimmut aqquserngup portussusaanut assigiilerniassammat. Taamaalilluni mittarfimmut siunertaqartumik siunissami atuinissamut pisariaqartitsisoqartillugu periarfissiisoqassaaq.
Mittarfiup kangiatungaani sulineq silaannarmik aalarulutsitsinani ingerlanneqarsinnaasoq KAIR-imiit akuerineqarpoq. Taamaattoq isumannaallisaaneq eqqarsaatigalugu qaartitsinerit mittarfimmik akuersissummik piginnittut suleqatigalugit akuerineqaqqaarlutillu pilersaarusiorneqassapput.
Immikkuualuttup ilaani B-mi allaffeqarfissamut nutaamut sanaartorfissamik ataatsimik allamik atugassiisoqassaaq.
Tamanut oqallisissiaq
Pilersaarutitut siunnersuut piffissami 05. majimiit 15. juuni 2022-ip tungaanut tamanut tusarniutigineqassaaq.
Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.
Oqaaseqaatit akerliliissutillu Kommuneqarfik Sermersuumi tiguneqareersimassapput juuni 15-at 2022 nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl
Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.
Inatsisinut tunngasut
Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut illuliorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.
Pilersaarut uani atuarneqarsinnaavoq
Kommunimut pilersaarummut tapiliussamut siunnersuut kommunip nittartagaani tusarniaassut ataani atuarneqarsinnaavoq, kommunip innuttaasunik kiffartuussiviini imaluunniit Sanarfinermut Avatangiisinullu ingerlatsivimmut 36 74 00-imut saaffiginninnikkut pissarsiarineqarsinnaavoq.