Sanarfinermut Avatangiisinullu Ingerlatsivik

Kommunimut pilersaarummut tapiliussatut 3E5-3 Nuuk Airport siunnersuut pillugu

4 years tilbage

Aninagasaqarnermut Inuussutissarsiornermullu Ataatsimiititap septembarip 26-ianni 2019 aalajangerpaa, kommunimut pilersaarummut tapiliussatut siunnersuut 3E5-3 Nuuk Airport tamanut tusarniaassutigineqassasoq.

Siunertaa

Kommunimut pilersaarummut tapiliussassatut siunnersuut Nuuk Airport suliarineqarpoq Nuummi mittarfiup allineqarnissaanut atatillugu pilersaarutit pioreersut, kingullermillu Atlantiku qulaallugu timmisartunut mittarfissap illutassai pillugit pilersaarutit tunngavigalugit suliarineqarluni. Pilersaarummut tapiliussami sanaartorfissat atugassiissutigineqarput, tamaani sananeqarsinnaanngorlugit timmisartoqarfiup illutassaa, sullissiveqarfik, timmisartunut inissiisarfik allallu illussanik titartaasartunik unammisitsinermi naammassereersumi ajugaasut COWI ZESO Architects suleqatigalugit titartagaat tunngavigalugit.

Tamanut oqallisissiaq

Pilersaarutitut siunnersuut piffissami 9.  oktobarimiit 20. novembari 2019-ip tungaanut tamanut tusarniutigineqassaaq.

Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.

Oqaaseqaatit akerliliissutillu Kommuneqarfik Sermersuumi tiguneqareersimassapput novembari  20-at 2019 nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl   

Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.

Inatsisinut tunngasut

Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut illuliorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.

Pilersaarut uani takuneqarsinnaavoq

Kommunimut pilersaarummut tapiliussaq Nunatta atuagaateqarfiani atuarneqarsinnaavoq, kommunip saaffiginnittarfiani pissarsiarineqarsinnaalluni, kommunip nittartagaani aaneqarsinnaalluni www.sermersooq.gl imaluunniit Sanarfinermut Avatangiisinullu ingerlatsivimmut uunga sianerluni 36 74 34 saaffiginninnikkut pissarsiarineqarsinnaalluni.