Aninagasaqarnermut Inuussutissarsiornermullu Ataatsimiititap septembarip 26-ianni 2023 aalajangerpaa, kommunimut pilersaarummut tapiliussatut siunnersuut 3C9-1 tamanut tusarniaassutigineqassasoq.
Siunertaa
Kommunimut pilersaarummut tapiliussaq suliarineqarpoq Nuummi mittarfiup qanittuaniittoq immikkoortup ineriartortinneqarnissaa qulakkeerniarlugu. Kommunimut pilersaarummut tapiliussamut ilanngullugu immikkoortup ilaa 3C9 atugassiissutigineqarpoq inuussutissarsiuuteqarfinnut mittarfeqarfimmut attuumassuteqartunut qitiusoqarfittut siunertanut atorsinnaasoq, tamakkununnga ilanngullugit: allaffiit, lagerit aammalu quersuit, angallassissutit attaveqaasersuutillu, ilioraaffiit, amerlasuunik pisiniarfiit, biilinik cykkilinillu atukkiussisarfiit, taxanut bussinillu inaaliisarfiit, nerisassanik pajuttuisarfiit, takornarialerisut/angalatitsiviit, akunnittarfiit, neriniartarfiit, café, ataatsimeersuartarfiit assigisaallu.
Pilersaarummi siunertat tunngaviillu:
- Immikkoortoq 3C9 mittarfimmut attuumassuteqartunik inuussutissarsiutinut qitiusoqarfimmut atorneqassasoq.
- Sanaartorfissat tunniunneqassasut aalajangersagalerlugit taamaalilluni qulakkeerneqassallutik suliffeqarfiit sanaartukkallu il.il. pilersissinnaaqqullugit Nuummi mittarfimmut angalasuinullu sullissisussanut kiffartuussisussanullu tunngasunik suliaqartunut.
- Sanaartorfissaq mittarfimmi biilinut inissiivinnut mittarfimmillu ingerlatsisussanut allaffinnut atortussanngortinneqassasoq.
- Illerngit 2001-ip aamma mittarfiup biilinut uninngasarfiata mittarfiullu illutaata akornanni pisummik ikaarfissamik sanasoqarnissaa periarfissaassasoq.
Tamanut oqallisissiaq
Pilersaarutitut siunnersuut piffissami 4. oktobarip – 29. novembarip 2023-ip tungaanut tamanut tusarniutigineqassaaq.
Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.
Oqaaseqaatit akerliliissutillu Kommuneqarfik Sermersuumi tiguneqareersimassapput novembarip 29-at 2023 nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl
Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.
Inatsisinut tunngasut
Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut illuliorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.