Aninagasaqarnermut Inuussutissarsiornermullu Ataatsimiititap juuniip 25-ianni 2020 aalajangerpaa, kommunimut pilersaarummut tapiliussatut siunnersuut 3C8-1 tamanut tusarniaassutigineqassasoq.
Siunertaa
Kommuneqarfik Sermersuup pingaarnertut anguniagaraa, Nuummi illoqarfiup ineriartortinneqarnissaa illoqarfiup pioreersup eqiteriffigineratigut.
Kommunimut pilersaarummut tapiliussami matumani immikkoortup killeqarfia (naleqq. nunap assinga ilanngussaq 1) ataatsimullu atorneqarnissaanut siunertarineqartoq attatsiinarneqassaaq, immikkuualuttumik nutaamik (A) avannaata tungaani immikkoortitsisoqassaaq, pisortat inissiaataanik sanaartornissamik immikkut periarfissiisussamik. Immikkuualuttoq A-mi marlunnik quleriilinnik nutaanik inissiaqarfiusussanik sanaartortoqarsinnaassaaq. Sanaartukkat takisuutut sanileriiaatulluunniit sananeqassapput.
Siunissami sanaartorneqartussat sanaartukkanut pioreersunut illuliortaatsimut naleqqussaalluni pissapput. Sumiiffiup kujataatungaa sanaartorfiusinnaanngilaq, nunallu ilusaa allanngortinneqassanani.
Tamanut oqallisissiaq
Pilersaarutitut siunnersuut piffissami 01. juulimiit 12. aggusti 2020-ip tungaanut tamanut tusarniutigineqassaaq.
Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.
Oqaaseqaatit akerliliissutillu Kommuneqarfik Sermersuumi tiguneqareersimassapput aggusti 12-at 2020 nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl
Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.
Inatsisinut tunngasut
Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut illuliorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.
Pilersaarut uani takuneqarsinnaavoq
Kommunimut pilersaarummut tapiliussaq Nunatta atuagaateqarfiani atuarneqarsinnaavoq, kommunip saaffiginnittarfiani pissarsiarineqarsinnaalluni, kommunip nittartagaani aaneqarsinnaalluni www.sermersooq.gl imaluunniit Sanarfinermut Avatangiisinullu ingerlatsivimmut uunga sianerluni 36 74 34 saaffiginninnikkut pissarsiarineqarsinnaalluni.