Sanarfinermut Avatangiisinullu Ingerlatsivik

Kommunimut pilersaarummut tapiliussatut 2C1-1 Nuussuaq Qitiusoqarfimmut siunnersuut

2 years tilbage

Aningaasaqarnermut Inuussutissarsiornermullu Ataatsimiititaq ulloq 26 septembari 2019 ataatsimiinnermi aalajangerpoq kommunimut pilersaarummut tapiliussassatut siunnersuut 2C1-1 Nuussuarmi Qitiusoqarfik tamanut tusarniaassutigineqassasoq.

Siunertaq

Siunnersuut immikkoortup ilaata sisamanut immikkuualuttunngorlugu aggulunnissaa. Immikkuualuttoq 1-mut aalajangersakkat sukumiisut tunniunneqassapput, tassani pisiniarfik B-2061, atuarfik B-2315 meeqqerivillu B-1986-p allilerneqarnissaat periarfissanngussalluni. Illut allilerneqassappata pioreersut portoqatigissavaat. Nutaamik illuliat illut pioreersut portussusaannit meterinik marlunnik portunerutinneqarsinnaapput pioreersuni init quleriit amerlaqataannik amerlatigisunik.

Tamanut saqqummiussineq

Siunnersuut tamanut tusarniaassutigisassanngorlugu sapaatit-akunnerini 6-ni saqqummiunneqassaaq piffissami 09.10.2019 – 20.11.2019.

Piffissami tusarniaaviusumi siunnersuut pillugu oqaaseqaateqartoqarlunilu akerliliissuteqartoqarsinnaavoq.

Oqaaseqaatit akerliliissutillu Kommuneqarfik Sermersuumi ulloq  20.11.2019 nallertinnagu tiguneqareersimassapput, nassiunneqassappullu uunga Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut: plan@sermersooq.gl

Piffissarititap iluani oqaaseqaatit akerliliissutillu tiguneqartut kommunimut pilersaarummut tapiliussap Kommunalbestyrelsip inaarutaasumik suliarineranut ilaatinneqassapput.

Inatsisinut tunngasut

Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut sanaartorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.

Pilersaarut uani atuarneqarsinnaavoq

Kommunimut pilersaarummut tapiliussassatut siunnersuut kommunip nittartagaani www.sermersooq.gl tusarniaaneq iserfigalugu atuarneqarsinnaavoq, kommunip innuttaasunik kiffartuussiviini imaluunniit Sanarfinermut Avatangiisinullu ingerlatsivimmut 36 74 00-imut saaffiginninnikkut pissarsiarineqarsinnaavoq.