Illoqarfimmik Inerisaaneq

Kommunimut pilersaarummut tapiliussatut 2B1-2 Industri vej, Nuuk siunnersuut

11 months tilbage

Aninagasaqarnermut Inuussutissarsiornermullu Ataatsimiititap januaarip 31-ianni 2023 aalajangerpaa, kommunimut pilersaarummut tapiliussatut siunnersuut 2B1-2 tamanut tusarniaassutigineqassasoq.

Siunertaa
Kommunimut pilersaarummut tapiliussaq una immikkoortup ilaanut pilersaarummik nutarterineruvoq, inuussutissarsiuteqarfittullu atuuffianik attassinissamut kiisalu piffissamut naleqquttumik ineriartortitsinissap qulakkeerneqarnissaa siunertaavoq.

Kommunimut pilersaarut 2032 naapertorlugu inuussutissarsiuteqarfinnik pisariaqartitsineq matussuserneqassaaq qorsooqqissut ajornerulersinnagit. Tamatuma imaraa attaviit pioreersut tikinneqarsinnaaneri ersarissuunerilu atuutiinnassasut.

Pilersaarummi siunertat tunngaviillu:

  • Nunaminertat arlallit akornanni sanaartorfissat ataatsimoortinneqarnissaat periarfissiissutigineqassasut.
  • Sanaartorfissanik atugassiinissaq, sisamanik quleriilinnik sanaartornissamut periarfissaqarfiusunik.
  • Angallannikkut isumannaatsuunissap qulakkeernissaa aamma pisuinnaat assigisaallu immikkoortukkoorsinnaanerisa pitsaanerulernissaa, tassungalu ilanngullugu Nuussuup Mannguani aqqusineeqqat pitsaanerulersinneqassapput.
  • Nakkutilliisunut illut immikkoortumi pilersinneqarnissaanut periarfissaq atorunnaarsinneqassasoq.

Tamanut oqallisissiaq
Pilersaarutitut siunnersuut piffissami 8. februaarip – 22. marssip 2023-ip tungaanut tamanut tusarniutigineqassaaq. Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.

Oqaaseqaatit akerliliissutillu Kommuneqarfik Sermersuumi tiguneqareersimassapput marsip 22-at 2023 nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl

Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.

Inatsisinut tunngasut
Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut illuliorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.

Pilersaarut uani atuarneqarsinnaavoq
Kommunimut pilersaarummut tapiliussamut siunnersuut kommunip nittartagaani uani tusarniaassut ataani atuarneqarsinnaavoq, kommunip innuttaasunik kiffartuussiviini imaluunniit Sanarfinermut Avatangiisinullu ingerlatsivimmut 36 74 00-imut saaffiginninnikkut pissarsiarineqarsinnaavoq.