Illoqarfimmik Inerisaaneq

Kommunimut pilersaarummut tapiliussatut 1C38-2 QULLILERFIK, NUUK

2 years tilbage

Aningaasaqarnermut Inuussutissarsiornermullu Ataatsimiititap 20. februaari 2020 ataatsimiinnermini aalajangerpaa Kommunimut pilersaarummut tapiliussatut siunnersuut 1C38-2 sapaatip-akunnerini 6-ni tamanut tusarniaassutigineqassasoq.

Siunertaa

”Pilersaarummut qinnuteqaat Qullilerfik” tunngavigalugu kommunimut tapiliussassatut siunnersuummi 1C38-2-mi qitiusoqarfimmi 1C38-mi, immikkuualuttoq IV-mut aalajangersakkat nassuiaasersukkat ilanngullugit, sanaartorfissat tallimat atugassiissutigineqarput. Sanaartorfissani inissiaqarfiit tallimat 3-miit 7-inut quleriillit sananeqarsinnaapput, piumasaqaataavorlu Imanerup Qapiarfiusaallu akornanni pingasunik uninngaartarfittalimmik tamanit atorneqarsinnaasunik aqqusineeraliortoqarnissaa kiisalu illoqannginnersamik aaqqissuussineq.

Kommunimut pilersaarummut tapiliussaq 1C38-1-imut pioreersumut tapiliullugu siunnersuut atuarneqassaaq.

Qullilerfiup eqqaani qaqqaq sinerlugu sanaartornissamut periarfissiissut nutaaq illoqarfimmi inissianik pisariaqartitsinerup annertusiartorneranut naapertuuttuuvoq. Pilersaarummi sanaartorfissat atugassiissutigineqartut qaqqaq sinerlugu sanaartukkat nutaat illullu pioreersut akornatigut isikkiveqarnissaa qulakkeerneqarpoq. Tamatuma saniatigut Imanerup Qapiarfiusaallu akornanni tamanit atorneqarsinnaasumik aqqusineeraliorneq innuttaasunut iluaqutaassasoq ingerlatsivimmit nalilerneqarpoq.

Tamanut oqallisissiaq

Siunnersuut tamanut tusarniaassutigisassanngorlugu sapaatip-akunnerini 6-ni saqqummiunneqarpoq piffissami 04. marsi – 15. apriili 2020.

Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.

Oqaaseqaatit akerliliissutillu Kommuneqarfik Sermersuumi tiguneqareersimassapput 15. apriili 2020 nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl   

Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.

Inatsisinut tunngasut

Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut illuliorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.

Pilersaarut uani takuneqarsinnaavoq

Kommunimut pilersaarummut tapiliussaq Nunatta atuagaateqarfiani atuarneqarsinnaavoq, kommunip saaffiginnittarfiani pissarsiarineqarsinnaalluni, kommunip nittartagaani aaneqarsinnaalluni www.sermersooq.gl imaluunniit Sanarfinermut Avatangiisinullu ingerlatsivimmut uunga sianerluni 36 74 34 saaffiginninnikkut pissarsiarineqarsinnaalluni.