Aningaasaqarnermut Inuussutissarsiornermullu Ataatsimiititap augustip 21-iani 2023 ataatsimiinnermini aalajangerpaa Kommunimut pilersaarummut tapiliussatut siunnersuut 4B4-2 tamanut tusarniaassutigineqassasoq.
Siunertaq
Sanarfinermut Avatangiisinullu Ingerlatsivimmit kommunimut pilersaarummut tapiliussatut siunnersuut 4B4-2 Inuussutissarsiuteqarfik, mittarfiup avannamut kangiatungaaniittoq, Nuuk, matumuuna saqqummiunneqarpoq. Immikkoortup ilaa 4B4 allilerneqassaaq, tamassumalu immikkoortup ilaa 3E5, 4E2 aamma 4D9.
immikkoortup ilaani 4B4-mi sanaartorfissat arfineq-pingasut periarfissaalissapput, taakkunannga marluk peqatigiiffinnut siunertanut sillimmatigineqassapput. Immikkoortoq aqqusaarlugu sukisaarsaarluni pisuttuartarfik aqquteeraq pioreersoq qulakkeerneqassaaq.
Immikkoortup ilaa agguataarneqassaaq immikkuualuttoq A aamma immikkuualuttoq B-tut. Immikkuualuttoq A-mi illup portussusia annerpaamik 10 meteriussaaq, Pinerluuteqarsimasunut Isertitsisarfiup isikkivia asserpallaarumanagu. Immikkuualuttoq B-mi illup portussusia annerpaamik 15 meteriussaaq.
Tamanut oqallisissianngortitsineq
Siunnersuut sapaatip-akunnerini arfineq-pingasuni tamanut tusarniaassutigisassanngorlugu saqqummiunneqassaaq, piffissami augustip ulluisa 30-ianniit – oktoberip ulluisa 25-iat 2023 tungaanut.
Piffissami tusarniaaffiusumi siunnersuut pillugu oqaaseqaateqartoqarlunilu akerliliissuteqartoqarsinnaavoq.
Oqaaseqaatit akerliliissutillu Kommuneqarfik Sermersuumi ulloq 25. oktobari 2023 nallertinnagu tiguneqareersimassapput, nassiunneqassappullu uunga Kommuneqarfik Sermersooq, mailikkut allaffissamut plan@sermersooq.gl-mut nassiullugu.
Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.
Inatsisinut tunngasut
Kommunimut pilersaarummut tapiliussassatut siunnersuutip tamanut saqqummiunneqareernerani nunaminertat, illut sanaartukkallu siunnersuummi pineqartut illuliorfigineqassanngillat allatigulluunniit kommunimut pilersaarutip imaluunniit kommunimut pilersaarummut tapiliussap inaarutaasup imarisaanut sioqqutsisutut isikkoqarsinnaasumik iluaqutiginiarneqassanatik.
Pilersaarut uani atuarneqarsinnaavoq
Kommunimut pilersaarummut tapiliussamut siunnersuut kommunip nittartagaani www.sermersooq.gl-imi tusarniaassut ataani atuarneqarsinnaavoq, kommunip innuttaasunik kiffartuussiviini imaluunniit Sanarfinermut Avatangiisinullu ingerlatsivimmut 36 74 00-imut saaffiginninnikkut pissarsiarineqarsinnaavoq.