Aninagasaqarnermut Inuussutissarsiornermullu Ataatsimiititap juunip 20-ianni 2023 aalajangerpaa, kommunimut pilersaarummut tapiliussatut siunnersuut 4C7-1 tamanut tusarniaassutigineqassasoq.
Siunertat
Matumani kommunimut pilersaarummik siunnersuummi immikkoortoq C nutaaq, Nuummi Qinngutsinni inissianut inuussutissarsiutinullu mingutsitsisuunngitsunut, atugassiissutigineqarpoq. Immikkoortoq illoqarfiup qeqqa pioreersoq nangillugu atugassiissutigineqarpoq, tassanngaanniillu inissiaqarfiillu Suloraq, Pinguaraq aamma Igimaq akornanni ikaarsaarfittut pilersinneqarpoq.
Aqqusineq pioreersukkut Unaakkut immikkoortumut aqquteqassaaq, taanna pilersaarummik ineriartortitsinissamut periarfissiinissamut avammut tallineqassammat.
Katillugit sanaartorfissat tallimat atugassiissutigineqassapput, quleriit assigiinngitsuussapput sisamaniit arfinilinnut. Sanaartorfissami immikkut ataatsimik illuliortoqarsinnaavoq, taakkulu pingasunik ataatsimut sanaartukkanik illutaqassapput.
Illuni init quleriit allersaat 50%-imik ammasutut sanaartorneqassapput, illup silataanik matuneqassanngillat. Taamaalilluni nunataatigut angallattoqarsinnaalissaaq, biilit unittarfiinik qulisanik sanaartortoqarsinnaalissaaq ilaallu ilanngullugit.
Illuliornikkut inissianik ataasiakkaanik 100-nik kiisalu inuussutissarsiornissamut periarfissanik arlalinnik, inissialiornermut ataqatigiissarsinnaasunik, sanaartornissamut periarfissaqalissaaq. Matumani inuussutissarsiutit mingutsitsisuunngitsut nipiliorfiunngitsullu pineqarput. Cafeqassappat/neriniartarfeqassappat unnuami nipiliorfiussanngillat.
Pilersaarutip ilaatut qaqqajunnakkut aqqusineeraliortoqarsinnaavoq, taamaasilluni Suloqqap Igimallu akornatigut aqquteqalissaaq. Silami sukisaarsaartarfiit amerlanerusut pilersinneqassapputtaaq, tassunga ilanngullugit pinnguartarfiit, uninngaartarfiit ilaallu ilanngullugit.
Tamanut oqallisissiaq
Pilersaarutitut siunnersuut piffissami 5. juunip – 30. Aggustip 2023-ip tungaanut tamanut tusarniutigineqassaaq.
Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.
Oqaaseqaatit akerliliissutillu Kommuneqarfik Sermersuumi tiguneqareersimassapput aggustip 30-at 2023 nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl
Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.
Inatsisinut tunngasut
Kommunimut pilersaarutip inaarutaasumik akuerineqarnera tamanut nalunaarutigineqareerpat kommunimut pilersaarummut imaluunniit kommunimut pilersaarummut tapiliussamut aalajangiunneqartumut inatsisitigut piviusumilluunniit pissutsinut akerliusumik pilersitsisoqassanngilaq, Pilersaarusiornermut inatsimmi § 30 innersuussutigalugu.
Akerliliissuteqarnissamut ilitsersuut
Kommunalbestyrelsip aalajangernera akerliliissuteqarfigerusukkaanni, tamanna Naalakkersuisunut nassiunneqassaaq: Naalakkersuisut, Aningaasaqarnermut Akileraartarnermullu Naalakkersuisoqarfik; Nuna tamakkerlugu Pilersaarusiornermut Immikkoortortaqarfik; Postboks 1037, 3900 Nuuk.
Uuma saqqummiunneqarneraniit akerliliissut kingusinnerpaamik sapaatit akunneri arfineq-pingasut qaangiutsinnagit nassiunneqareersimassaaq.
Pilersaarut uani atuarneqarsinnaavoq
Kommunimut pilersaarummut tapiliussaq kommunimi innuttaasunik sullissivimmi, kommunillu nittartagaani https://kp.sermersooq.gl/ imaluunniit Sanarfinermut Avatangiisinullu ingerlatsivimmut oqarasuaammut 36 74 00-mut sianerluni saaffiginninnikkut pineqarsinnaavoq.