Sanarfinermut Avatangiisinullu Ingerlatsivik

Kommunimut pilersaarummut tapiliussaq 20C6-2, Paamiut

4 years tilbage

Aningaasaqarnermut Inuussutissarsiornermullu Ataatsimiititaq 19.8.2019-imi ataatsimiinnerminni aalajangerput, ”Kommunimut pilersaarummut tapiliussaq 20C6-2, Paamiut” sapaatip arfineq-pingasuni tamanut tusarniutigineqassasoq.

Siunertaq

Pilersuinermik kiffartuussiviup Nukissiorfiup ingerlatani illumi ataatsimi katersorusummagit kommunimut pilersaarummut tapiliussatut siunnersuut suliarineqarpoq. Kommunimut pilersaarummut tapiliussatut siunnersuummi immikkoortup ilaa 20C6 pioreersoq annertusineqarpoq. Immikkoortup ilaa immikkoortoq C-tut taaguuteqaannaassaaq.

Kommunimut pilersaarummut tapiliussatut siunnersuummi matumani immikkoortup ilaa 20C6 (illoqarfiup qeqqa) pioreersoq annertusineqarpoq.

Immikkoortup ilaani sanaartorfissamik nutaamik pilersitsisoqarpoq. Tassuuna pilersuinermik kiffartuussivik immikkoortuminik illumi ataatsimi ataatsimoortitsinissamik periarfissinneqassaaq, ukulu ataatsimoortikkusunneqarput, allaffik toqqorsivillu ataasiakkaanik sannavittut atortunik initalik kiisalu annertunngitsumik toqqorsivilik. Immikkoortut taakku ullumikkut illoqarfimmi sumi tamaani siammasillutik inissisimapput.

Pilersaarummut tapiliussatut siunnersuummi aamma allamik siunertaqartoqarpoq, tassa B-129, utoqqaat angerlarsimaffitoqaat allatut atulersinneqarnissaanik siunissamilu ungasinnerusumik isaterneqarnissaanik qulakkeerinninnissaq.

Tamanut ammasumik oqallitsitsineq

Siunnersuut sapaatit akunnerini arfineq pingasuni tamanut tusarniutigineqassaaq piffissami 28.8.2019 – 23.10.2019.

Piffissami tusarniaaffimi siunnersuut pillugu oqaaseqaateqartoqarlunilu akerliliisoqarsinnaavoq. 

Oqaaseqaatit akerliliissutillu Kommuneqarfik Sermersuumit tiguneqareersimassapput 23.10.2019 uungalu nassiunneqassallutik Sanaartornermut Avatangiisinullu Ingerlatsivik, Postboks 1005, 3900 Nuuk imaluunniit mailadressemut:  plan@sermersooq.gl

Kommunalbestyrelsip kommunimut pilersaarummut tapiliussaq inaarutaasumik eqqartulerunikku piffissaagallartillugu oqaaseqaatit akerliliissutilu tunniunneqarsimasut ilanngullugit eqqartussavaat.

Inatsisitigut atuutsitsineq

Kommunimut pilersaarummut tapiliussamut siunnersuut saqqummiunneqarpat, nunaminertat, illuutit sanaartukkallu siunnersuummi ilaareersut sanaartorfigineqassanngillat imaluunniit kommunimi pilersaarummut tapiliussami aalajangiunneqareersimasumut naapertuutinngitsumik atorneqassanngillat.

Pilersaarut uani atuarneqarsinnaavoq

Kommunimut pilersaarummut tapiliussaq kommunip nittartagaani www.sermersooq.gl tusarniaavimmi atuarneqarsinnaavoq, aamma kommunip innuttaasunik kiffartuussiviani imaluunniit Sanarfinermut Avatangiisinillu Ingerlatsivimmut oqarasuaat 36 74 00-mut saaffiginninnikkut pissarsiarineqarsinnaalluni.