Sanarfinermut Avatangiisinullu Ingerlatsivik

Kommunimut pilersaarummut tapiliussaq 1A15-3 Inussussuaq, Nuuk

4 years tilbage

Aningaasaqarnermut Inuussutissarsiornermullu Ataatsimiititaq 19.8.2019-imi ataatsimiinnerminni aalajangerput, ”Kommunimut pilersaarummut tapiliussaq 1A15-3 Inussussuaq, Nuuk” sapaatip akunnerini arfineq-pingasuni tamanut tusarniutigineqassasoq.

Siunertaq

Nuummi innuttaasut suli amerliartorput. Kommuneqarfik Sermersuup eqiterinissamut periusissiaanut atatillugu, Inussussuaq eqiterivissatut toqqarneqarsimavoq, tamannalu tunngavigalugu kommunimut pilersaarummut tapiliussaq suliarineqarpoq.

Sumiiffimmi soqutigisaqaqatigiit kissaatigaat, suli eqiterisoqassasoq aamma kommunimit nalilerneqarpoq, immikkoortup ilaanut tamanna ajornanngitsoq.
Ìmmikkuualuttumut B-mut aamma C-mut aqqusineq nunataanut iluarsillugu tulluussagaavoq, tamatumalu kingunerivaa immikkuualuttoq A-mi sanaartorfissiaq iluarsineqarneri. Tassunga atatillugu sanaartorfissiaq 6 atorunnaarsinneqarpoq aamma sanaartorfissiaq 5 tassunga taarsiullugu allisinneqarpoq.
Taamatuttaaq immikkuualuttoq C-mi sanaartorfissat iluarsineqarput, taamalu illunik quleriinnik arfineq-pingasunik sanaartornissamut periarfissaqalerluni.

Inissiat portusuut arlallit sanaartorneqalereerput, pilersaarummilu matumani nunap pissutsillu piviusut malillugit naapertuuttumik ineriartortinneqarnissaa periarfissaalissaaq. Taamalu pilersaarummut toqqammavigineqartoq, 1A15-2, ulloq 9.2.2016-imi akuerineqarsimasoq, pilersaarummi matumani ineriartortinneqarpoq.

Tamanut ammasumik oqallitsitsineq

Siunnersuut sapaatit akunnerini arfineq pingasuni tamanut tusarniutigineqassaaq piffissami 28.8.2019 – 23.10.2019.

Piffissami tusarniaaffimi siunnersuut pillugu oqaaseqaateqartoqarlunilu akerliliisoqarsinnaavoq. 

Oqaaseqaatit akerliliissutillu Kommuneqarfik Sermersuumit tiguneqareersimassapput 23.10.2019 uungalu nassiunneqassallutik Sanaartornermut Avatangiisinullu Ingerlatsivik, Postboks 1005, 3900 Nuuk imaluunniit mailadressemut:  plan@sermersooq.gl

Kommunalbestyrelsip kommunimut pilersaarummut tapiliussaq inaarutaasumik eqqartulerunikku piffissaagallartillugu oqaaseqaatit akerliliissutilu tunniunneqarsimasut ilanngullugit eqqartussavaat.

Inatsisitigut atuutsitsineq

Kommunimut pilersaarummut tapiliussamut siunnersuut saqqummiunneqarpat, nunaminertat, illuutit sanaartukkallu siunnersuummi ilaareersut sanaartorfigineqassanngillat imaluunniit kommunimi pilersaarummut tapiliussami aalajangiunneqareersimasumut naapertuutinngitsumik atorneqassanngillat.

Pilersaarut uani atuarneqarsinnaavoq

Kommunimut pilersaarummut tapiliussaq kommunip nittartagaani www.sermersooq.gl tusarniaavimmi atuarneqarsinnaavoq, aamma kommunip innuttaasunik kiffartuussiviani imaluunniit Sanarfinermut Avatangiisinillu Ingerlatsivimmut oqarasuaat 36 74 00-mut saaffiginninnikkut pissarsiarineqarsinnaalluni.