Siunertaa
Inunnut innarluutilinnut suliassaqarfik malunnaatilimmik ineriartorpoq inuit innarluutillit pillugit politikki 2017-imi kingullermik kommunimit suliarineqarnerata kingorna. Ilaatigut Inuit Innarluutillit tapersersorneqarnissaat pillugu Inatsisartut inatsisaat 2019-imi saqqummiunneqarpoq, tamatuma nassataanik oqaaseq innarluuteqarneq aamma taamaattumik sullinniakkat inatsimmi pineqartut pillugit paasinnittaaseq siammasinnerulerpoq. Ilanngullugu inuit innarluutillit pillugit politikkip ukiut sisamat qaangiunneri tamaasa aaqqissuunneqartarnissaa inatsisitigut pisussaaffiulerpoq.
Siunissaq aamma uninngaannanngilaq, ukiuni tulliuttuni aggersuni kommune inuiaqatigiinni arlalitsigut allanngoriartornermik aqqusaagaqarumaarpoq, innarluutilinnut suliffeqarfiup ineriartorneranut toqqaannartumik sunniuteqartumik. Innuttaasut tapersersorneqarnissamik pisariaqartitsisut amerleriaateqarnerat (aamma ilaqareernerat) Kommunimit maannangaaq malugineqareerpoq. Pingaartumik innuttaasut tarnikkut unammilligassaqarnertik pissutigalugu tapersersorneqartariaqalersut ukioqatigiiaani tamaginni amerleriaateqarput. Taamannak ineriartortoqarnera ingerlaannassangatinneqarpoq, pingaartumik inuup inuuffissaata sinneruttup sivitsoriartornerata ilutigisaanik, tamatuma nassataanik tapersersorneqarnissamik pisariaqartitsisut amerliartussapput aamma sivisunerusumik tapersersortariaqassapput.
Tapersersorneqarnermik pisariaqartitsinerujartorneq innuttaasunut, suliffeqarfinnut, ilinniagaqarfinnut kiisalu kommunip neqeroorutaanut unammilligassanik nassataqarpoq. Kommunimi aningaasaqarneq neqeroorutinut amerlanerusunut nutaanullu naammattariaqarpoq, sulisinnaasunik amigaateqarnerup qaffakkiartornerata ilutigisaanik.
Kommuneqarfik Sermersooq nunatamigut kommuniuvoq annertoorsuaq, tamaani inuunermi atugassarititaasut, innuttaasut katitigaanerat aamma attaveqaasersuutit assigiinngisitaartorujussuupput. Assigiinngisitaartut unammilligassanik periarfissanillu assigiinngiiaartunik nassataqarput, aamma taamaattumik aaqqiissutissanik assigiinngitsunik pisariaqartitsipput.
Inuit innarluutillit pillugit politikki aqqutigalugu piffissamut ungasissumut toraagassanik takorluukkanillu aalajangersaassaagut, Kommuneqarfik Sermersuumi innuttaasunut piginnaanikillisimasunut pissutsit qanoq ittuunissaanut kissaativut tunngavigalugit.
Inuit innarluutillit pillugit politikki aqqutigalugu kommunip innarluutilinnut suliassaqarfimmi suliniutinik ataatsimoorussanut toraagassamik inissiissaaq aamma pingaarnertut ukkatarineqartussat pillugit politikkikkut najoqqutassat inissillugit. Politikkimi innuttaasut piginnaanikillisimasut inuuneranni pissutsit tulliuttut pingaarnertut isiginiassavagut:
- Meeqqat inuusuttullu inuunerat
- Ulluinnarni inuuneq
- Sunngiffimmi inuuneq
- Ilinniarnermi inuussutissarsiornermilu inuuneq
- Inuunermi ikaarsaarnerit
Inuit innarluutillit pillugit politikkimi suliassaqarfik pillugu ullumikkut inissisimaffipput ersersinneqanngilaq. Polikki anguniagaqarfioqaaq piviusunngortinneqarnissaanut siunnerfeqarluni tassunga annertuumik suliniartoqarnissaa piumasaqaataavoq. Taassuma saniatigut piviusorsiortuunissarput akuersaartuunissarpullu piumasaqaataavoq, atugassarititaasut aamma eqqarsaatersuutit arlallit anguniakkanik angusaqarnissatsinnut unammillernartunik atugassaqartitsisut tunuliaqutaralugit sulisariaqarpugut. Ilanngullugu inuit innarluutillit pillugit nalinginnaasumik isiginnittaatsit, inissanik amigaateqarneq, sullinniakkat ikittunnguakkaat, nunap ingerlaarfigineqarsinnaasup silallu unammillernartuunerat sermertarnera apisarneralu eqqarsaatigalugit, soorluttaaq sulisinnaasut ilinniarsimasut ilinniagaqarsimanngitsullu amigaataanerat eqqarsaatigineqassapput.
Taamaattumik pingaaruteqarpoq inuit innarluutillit pillugit politikkimi anguniakkat aamma suliniutissat aalajangersimasut suliariuminarsarneqarsimanissaat. Aamma pingaaruteqarpoq, anguniakkat suliniutillu taakkua akuttunngitsumik iserfigineqaqqittarnissaat ilaatigut qulakkeerumallugu, piffissami sivikitsumi suliniutit piffissamut ungasinnerusumut tunaartarineqartunut ataqatigiissuteqarnerat, imaappoq politikki aqqutigalugu aallartinneqarsimasunut kiisalu qulakkeerumallugu, suliniutit piffissami atuuttumi inuiaqatigiit ineriartornerannut naleqqussarsinnaanerat.
- Pilersaarutitut siunnersuut piffissami 2023-mi 13. decembari – 2024-mi 31. januarip tungaanut tamanut tusarniutigineqassaaq.
- Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.
- Oqaaseqaatit akerliliissutillu Kommuneqarfik Sermersuumi tiguneqareersimassapput januarip 31-at 2024 nallertinnagu, uunga nassiunneqassallutik Kommuneqarfik Sermersooq Suliffeqarnermut Isumaginninnermullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: si@sermersooq.gl + Cc kiiv@sermersooq.gl
Pilersaarut uani atuarneqarsinnaavoq: