Siunertaa
Pilersaarusiornermut periusissiaq 2023 – Sermersooq, najugaqarfigissallugu pitsaasoq piujuartitsisumik ineriartortitsinermi pingasuusunik tunngaveqarpoq tassaasut, aningaasaqarnikkut, inooqatitaanikkut avatangiisitigullu piujuartitsineq. Kommunimut pilersaarutip iluarsaateqqinnissaanut siunnersuutit taakku pingasuusut pingaarnertut naleqartitatut siunnersuutigineqarput.
Pingaarnertut naleqartitat ingerlatsinissami qitiutinneqartussat arfiniliusut makkuupput:
1. Tamanut inissiat pitsaasut
2. Meeqqanut inuusuttunullu inuuneq pitsaasoq
3. Sullivimmi inuunerissuuneq
4. Sunngiffimmi inuuneq pitsaasoq
5. Attaveqaatit pitsaasut
6. Ataatsimoornerit pitsaasut
Qitiutillugit suliaqarfissat ataasiakkaat tamarmik siunertani iliuutsinilu uuttorneqarsinnaasumik piviusunngortinneqassapput. Taamaasilluni pilersaarusiornermut periusissaq siunissami suliassaqarfinni qitiutitani ataasiakkaani siuarsaanermi uuttortaanissamut tunngavissiissaaq.
Anguniakkani iliuuserisassat Naalagaaffiit Peqatigiit nunarsuarmi anguniagaanut tunngatitaapput, taamaasilluni Kommuneqarfik Sermersuumi siuarsaanermik pilersitsinermi takussutissanut ilapertuutaassapput, nungusaataanngitsumik malittarisaqarnermi minnerunngitsumillu siuarsaaneq uuttorneqarsinnaassalluni.
Tamanut oqallisissiaq
Pilersaarutitut siunnersuut piffissami 24. maaji – 2. aggusti 2023 tungaanut tamanut tusarniutigineqassaaq.
Piffissami tusarniaaffiusumi siunnersuummut oqaaseqaateqartoqarsinnaallunilu akerliliissuteqartoqarsinnaavoq.
Oqaaseqaatit akerliliissutillu Kommuneqarfik Sermersuumi tiguneqareersimassapput aggustip 2-t 2023 nallertinnagu, uunga nassiunneqassallutik Kommuneqarfik Sermersooq, Sanarfinermut Avatangiisinullu Ingerlatsivik, Postboks 1005, 3900 Nuuk imaluunniit mailikkut uunga nassiullugu: plan@sermersooq.gl
Oqaaseqaatit akerliliissutillu piffissaq eqqorlugu tiguneqartut kommunimut pilersaarummut tapiliussap Kommunalbestyrelsimi inaarutaasumik oqaluuserineqarnissaanut ilanngunneqassapput.
Pilersaarut uani atuarneqarsinnaavoq
Kommunimut pilersaarummut tapiliussamut siunnersuut kommunip nittartagaani www.sermersooq.gl-imi tusarniaassut ataani atuarneqarsinnaavoq, kommunip innuttaasunik kiffartuussiviini imaluunniit Sanarfinermut Avatangiisinullu ingerlatsivimmut 36 74 00-imut saaffiginninnikkut pissarsiarineqarsinnaavoq.