Kittat

Puisip amianik mersortarfimmi ameq naqqaniit suliarineqartarpoq – panertiterineq, ilusilersuineq mersornerlu.

Kalaallit assuutaat arnanut, angutinut meeqqanullu attartorneqarsinnaapput.

  1. Kalaallisuunik attartorusuppunga. Angissutsinnut naammattunik peqarpisi?

Angissutsit assigiinngitsut pigaavut. Angissuseq 37-qqissaaq pigineripput oqaatigisinnaanngilarput pitsaanerpaassaaq kalaallisuunik misiliillutit usseeqqaaruit taava takussavarput attartortittakkatta arlaat naammagisinnaanerit

2. Qaqugu kalaallisuunik attartortittakkanik inniminneereersinnaavunga?

Kalaallisuunik misileereeriaruit siumut ulloq attartorfissat qaquguussanersoq taallugu inniminniisinnaavutit. Ukiup tullissaanut kalaallisuunik attartorusukkuit pitsaanerpaassaaq misiliinissamut piffissamik inniminniinissat, decembarimi januaarimiluunniit.

  1. Sapaatiuppamut kalaallisuunik attartugassaateqarpisi?

Pitsaanerpaasarpoq piffissaqarluarluni inniminniigaanni, aammalu apeqqutaassaaq illit naammagisannik peqarnersugut. Inniminneereersut amerlasoorujuupput. Sapaatiuppamut attartugassaatigut sinneqarnersut aperiniaraanni pitsaanerpaavoq sianernissaq.

  1. Angutinut annoraanik attartortitsisarpisi?

Ajoraluartumik nukappiaqqanut angutinullu annoraanik attartortitsisanngilagut.

  1. Unneq/Tungujorsiaq/Alersissaq/Qasigiaq amiinik tunisassaateqarpisi?

Kittat-ni puisit amii suliarisartakkavut nammineq atortarpavut pisiniat pigisaannik iluarsaanermut imaluunniit uagut attartortittakkatsinnut assuutinut. Puisit amii ilivitsut tuniniagarinngilavut, Nunatsinnilu Qasigiaq eqqissisimatitaavoq, taamaattumik qasigissat amiinik tuniniaaneq ajorpugut (spættet sæl).

  1. Kalaallisuunik piserusuppunga/tunisaqarusuppunga. Kalaallisuut qanoq akeqarpat?

Kommune suliffeqarfinnut namminersortunut unammillertuunngilaq. Taamaattumik kommunip suliffeqarfiillu namminersortut akiutaat assigiinngillat. Aamma apeqqutaavoq kalaallisuut tunerusutavit/pisiarerusutavit pitsaassusaat qanoq innersoq.

  1. Kalaallisuukka iluarsartariaqarput. Iluarsaassinnaavisigit?

Ajunnginnerutipparput mail-erlutit imaluunniit sianerlutit apereqqaaruit. Apeqqutaassaaq kalaallisuut qanoq annertutigisumik iluarsagassaanersut. Qanoq annertutigisumik iluarsagassaanersoq paasisuugutsigu mersortartut arlaat suliarinissaanut piffissaqarnersoq isumaqatigiissutigisinnaavarput.

  1. Nammineerlunga mersorusuppunga, ikiorsinnaavisinga/siunnersorsinnaavisinga?

Siullertut innersuussutigisinnaavarput Illorput (innuttaasut illuat), tassani ataasinngornermi amernik mersortoqartarpoq, marlunngornermi annoraaminernik, pingasunngornermilu kalaallisuunik mersortoqartarluni. Nalunaaqqaarnissaq pisariaqanngilaq, takkutiinnarnissamut tikilluaqqusaapput nal. 18-21.

  1. Ilulissani najugaqarpunga (illoqarfik/nunaqarfik), Kittat-nit pisisinnaavunga?

Pisiniarfitsinni nioqqutissanik tammajuitsussanillu pisiassaateqarpugut, illoqarfinnit allanit pisisoqarsinnaavoq aqqutaalu nammineq akilerneqartarpoq. Illoqarfiup avaaneersut kalaallisuut iluarsartuunneq ajorpavut, imaluunniit Nuup avataaneersunik mersuussineq ajorpugut.

  1. Utaqqisunut allattorsimaffiuteqarpisi, allatsiffigisinnaasannik?

Aappi, utaqqisunut allattorsimaffimmik peqarpugut. Nammineq amiuteqaraanni sianertoqarsinnaavoq oqaatigalugu inniminnigaq qaqugu atorneqartussaanersoq. Illoqarfimmit/nunaqarfimmit allaminngaaneeruit allatsissinnaanngilatit. Kittat-nut pingaartuuvoq inuk qanimut isigalugu uuttortaanissaq, naggataagullu inniminnigaq inuup naammagisinnaaneraa.