Isumaginninnermi suliat allaaserineqarnerat

Quppernermi uani Kommuneqarfik Sermersuumi innuttaasunut ikiorsiissutit innersuussutigineqartut tamarmik nassaassaapput, suliassaqarfinnut tulliuttunut atuuttut: 

Suliat allaaserineqarnerat Kommunalbestyrelsimit ukiumut ataasiarlutik nutarterneqartarput akuerineqarlutillu. Taakkua Kommunalbestyrelsip suliassaqarfinni sullissinerup qaffasissusissaattut aalajangiussaannik ersersitsisuupput.

Siunertaq

Suliat allaaserineqarneri suliassaqarfinni qulaani taaneqartuni kommunip suliniutitut neqeroorutigisai pillugit paasissutissiipput, tassunga ilanngullugit innuttaasut ikiorsiissummik innersuunneqarnissaannut killiliussat suut aallaavigineqassanersut.  Suliat allaaserineri innuttaasut Kommuneqarfik Sermersuumi sumiluunniit najugaqaraluarunik assigiimmik kiffartuunneqarnissaannik qulakkeerinneqataassaaq.

Suliat allaaserineqarnerisa siunertaasa ilagaat, ikiorsiineq pissarsiarineqarsinnaasoq pillugu sulisut innuttaasullu erseqqissumik nassuiaaffigineqarnerat.

Suliat allaaserineqarnerannik atugaqarneq makkuninnga iluaqutissartaqarpoq:

  • Suliat allaaserineqarnerat innuttaasut ataasiakkaat ikiorneqarnissamik pisariaqartitsiffiinik sunik pisinnaatitaaffeqarnerannik erseqqissaapput.
  • Suliat allaaserineqarnerat sullissisunut inniminniisartunut aamma sulisunut ikiorsiissummik ingerlatsisunut sakkussaapput, suliat allaaserineqarneranni ikiorsiissummik pissarsinissamut piumasaqaat erseqqissoq allaaserineqartarmat, taassumallu imarisaa.
  • Suliat allaaserineqarnerat politikkikkut sakkussaapput, sullissineq politikkikkut aalajangersaaffigineqartarmat inatsisit politikkikkullu pingaarnersiuineq naapertorlugit.

Suliat allaaserineqarnerat tulliuttunik imaqarpoq:

  • Inatsisitigut tunngavigisassaq
  • Siunertaq
  • Sullitat
  • Ikiorsiinerup nassuiarnera
  • Innersuussinermi piumasaqaatit
  • Piginnaassutsimut piumasaqaatit
  • Naammagittaalliornissamut ilitsersuut

Piginnaassutsimut piumasaqaatit

Ikiorsiissutinik sullissinermik tunniussisut[1] innuttaasunut ataasiakkaanut ikiornissaannut tapersersornissaannullu akuersissutigineqartumut pilersaarusiussapput naammassinnissallutillu, sullissisup aalajangiinera aamma suliat allaaserineqarneranni kiffartuussinissaq allaaserineqartoq naapertorlugu.

Sullissinermik ingerlatsisup qulakkiissavaa, sulisut paaqqutarinninnermik tapersersuinermillu sulianik ingerlatsisut, isumaginninnermik aamma peqqissaanermik imaluunniit perorsaanermik ilinniarsimassuseq pisariaqartoq naapertorlugu ilinniagaqarsimasuussasoq. Suliat allaaserineqarneranni allassimavoq ikiorsiinermi aalajangersimasumi piginnaasassanut piumasaqaatigineqartut suut atuutsinneqarnersut.

Suliassap suussusia innuttaasullu inissisimaffiata tamakkiisup suliassap ataatsimoortup katitigaaneranut tunngaviliisuussaaq. Inuttaasup inissisimanera, suliassallu katitigaanera aamma sulisut ataasiakkaat piginnaasaat suliap kimit naammassineqarnissaanut aalajangiisuussapput. Taamaattumillu sullissivinni ataasiakkaani aqutsisoq sulisut suleqatigalugit suliatigut naliliinermik ingerlatsissaaq, kiap suliamik naammassinninnissaa aalajangerniarlugu.

Innuttaasut tamarmik Kommunimi sumiluunniit najugaqaraluarunik assigiimmik kiffartuunneqarnissaat pingaartinneqaraluartoq, illoqarfimmi sumiiffinnilu assigiinngitsuni ilinniarsimasunik sulisoqarnissap unammillernartuunera peqqutaalluni kiffartuussineq assigiinngissitaarpoq. Ilinniarsimanngitsunik sulilersitsinikkut suliat allaaserineqarnerat pillugit ilinniartitsisoqassaaq taakkualu atuutsinneqarnissaannut immikkut suliniartoqassaaq, taamaaliornikkut piumasaqaatit sapinngisamik pitsaanerpaamik naammassisinnaaqqullugit. 

Pitsaassutsimik malittarinninneq

Kommunip siullertut pingaarnertullu suliassaraa kommunimi innuttaasut pitsaanerpaamik kiffartuunneqarnerat qulakkiissallugu. Ataatsimut isigalugu anguniagaq taanna angusinnaajumallugu suliassaqarfinni arlalinni pitsaassuseq pingaartinneqassaaq: 

  • Kiffartuussinerit ikiorsiissutillu pitsaasut
  • Pisortat ingerlatseriaasiat pitsaasoq
  • Ingerlatsineq suleriaatsillu pitsaasut
  • Sulinermi avatangiiserisat pitsaasut

Pitsaassutsimik qulakkeerinninnermi sakkussat pingaarnerit ilagaat suliat allaaserisarnerat. Suliat pitsaassusissaat qulakkeerinnissaaq, kiffartuussinissaq qaffasissusissaatut aalajangiussat malinneqarnissaat aamma ikiorsiissutit innuttaasut ataasiakkaat pisariaqartitaannik matussusiinissaat. Ukiumut ataasiarluni suliat allaaserineqarnerat tamarmik misissorneqartarput nutarterneqartarlutillu, missingersuutillu akuerineqarnerini politikkikkut suliarineqartarput akuerineqarlutillu.

Aqutsisut tamakkiisumik nakkutilliinerannik ingerlatsisoqartarpoq, kommunip ikiorsiissutaasa inatsisinut atuuttunut naapertuunnerat politikkikkullu anguniakkat aallaavigalugit ingerlatsiviup eqquutitsinera qulakkeerniarlugu. Taamatuttaaq ingerlatsivimmit isumagineqartarput suliffeqarfiup nammineq nakkutilliineranit aamma avataanit nakkutilliiffigineqarnermit isumannaagassat aaqqinnissaat.

Innersuussisartoqatigiit

Ikiorsiinerit amerlanerit sulianik allaaserineqarnerani ersersinneqartutut, innuttaasoq kiffartuunneqassaguni ikiorsiissummut innersuunneqassaaq. Sullissisoq innuttaasup ikiorneqartariaqarneranik naliliisuusarpoq innuttaasoq aamma assersuutigalugu isumassuisut qanigisaasulluunniit suleqatigalugit.

Innuttaasup, sullissisup, innersuussisartup/timigissaasut isumassuisulluunniit akornanni suleqatigiinneq ataqqinninnermik, unneqqarinnermik tatiginninnermillu tunngaveqartumik pissaaq, aalajangiinerit iliuusissallu pitsaanerpaamik aaqqiissuteqarfigiumallugit. Tamannalu pissaaq innuttaasoq naligalugu oqaloqatigineratigut, tassuunalu sapinngisamik innuttaasup inuunermik isiginninnera, ileqqorisaanut inooriaasianullu tulluarsaanissaq qulakkeerniarlugu. 

Suliamik suliarinninnermi piffissaliussat

Inuit innarluutillit pillugit inatsit naapertorlugu taperserneqarnissaq pillugu qinnuteqaatip tiguneqarneranit, aalajangiinerup pereersimanissaanut piffissaq qanoq sivisutigissanersoq, piffissamut killiliussanik kommune aalajangersaassaaq.

Inuit innarluutillit tapersersorneqarnissaat pillugu Inatsisartut inatsisaat nr. 13, 12 juuni 2019-imeersoq inuit innarluutillit tapersersorneqarnissaannut tunngasoq naapertorlugu qinnuteqaatit suliarineqarnissaannut 2024-mi qaammatit sisamat piffissaritinneqarput. Kiffartuussinernut amerlasuunut suliarinninnerup sivisussusia sivikinnerusoq atuuppoq.

Piffissap taassuma iluani aalajangiisoqarsinnaanngippat, taava innuttaasoq allakkatigut ilisimatinneqassaaq aalajangiineq qaqugu naatsorsuutigineqarnissaa pillugu, kiisalu matumani pisumi piffissaritinneqartup sooq malinneqarsinnaannginneranik nassuiaanneqassaaq.

Naammagittaalliornissamut ilitsersuut

Innuttaasumit aalajangiineq isumaqataaffigineqanngippat, innuttaasoq naammagittaalliuteqarnissaminut periarfissaqakkajuttarpoq. Ikiorsiissuteqarnerni ataasiakkaani naammagittaalliuteqarnissamut ilitsersuut ersersinneqartarpoq.

[1]Kommuneqarfik Sermersooq sullissinermik tunniussisuuvoq, kommunip suliffeqarfiutai pisortanilu atorfillit innuttaasunut ikiorsiissutinik tunniussisuummata.naammagittaalliuteqarnissaminut periarfissaqakkajuttarpoq. Ikiorsiissuteqarnerni ataasiakkaanni naammagittaalliuteqarnissamut ilitsersuut ersersinneqartarpoq.

Kommuneqarfik Sermersooq 2025-mi suliat pitsaassusaasa allaasinerat uani ammakkit