Ileqquusumik ataatsimiinneq

Immikkoortortaqarfiit
Nuummi Najukkami Ataatsimiititaliaq
Date
4. June 2019 -
Qulequtaq
Saqqaa

Suliassamik saqqummiussaq

Aaliangiussaq

Ileqquusumik ataatsimiinneq

Nuummi Najukkami Ataatsimiititaliaq

 

Oqaluuserisassat

 

Marlunngorneq, ulloq 4. juuni 2019 nal. 16.30-18.30

 

 

Ilaasortat

Nivi Katrine Christensen

Arnarissoq Fleischer

Moses Masik Marcussen- Mølgaard

Ujammiugaq Engell

Poul Petersen

Finn Meinel

Aviaq Brandt

Nadia Aviaq Olsen

”Ari” Hansine P Rasmussen

Naleraq Eugenius

 

Pisinnaanatik nalunaartut

Nivi Katrine Christensen

Poul Petersen

 

Aggersarneqarput

Esmar Bergstrøm

Jutho Sofie Wilche

Ullormut oqaluuserisassat akuerineqarneri

Suliassamik saqqummiussaq

Aaliangiussaq

Oqaluuserisassat akuerineqarput oqaaseqaatigalugu Taasariaqartut allani immikkoortut tulliuttut ilanngunneqassasut:

 

  • 5A: Asiarpami eqqaamiunut atoqqitassaarniartitsinissamut/aqqusinermi nuannatitsinissamut aningaasanik tapiiffigineqarnissamik qinnuteqaat
  • 5B: Ilaqutariinnut timersortitsisarnissamut timersortarfimmi akunnernik inniminniinissaq pillugu saaffiginnissut (Nadia Aviaq Olsen)
Nalunaarutit

Suliassamik saqqummiussaq

Aaliangiussaq

Ilisimatitsissutit

Suliassamik saqqummiussaq

Aaliangiussaq

2019-imi aningaasaliissutit atugassanngortinneqarsimasut pillugit killiffik

Suliassamik saqqummiussaq

2019-imi aningaasaliissutit atugassanngortinneqarsimasut pillugit killiffik

 

Nuummi Najukkami Ataatsimiititaliaq 2019-imi katillugit 4.225.000 koruuninik atugassinneqarpoq.  Tamatuma saniatigut inunnut qulinut qaammammut 2.124 koruuninik akissarsiaqartitsinissamut taakkunannga ilanngaasoqartassaaq, tassa ukiumut 255.000 koruuniussapput.
Taamaalilluni Najukkami Ataatsimiititaliaq 2019-imi 3.970.000 koruuninik aningaasaliissutinik atuisinnaavoq. 


2019-imi aningaasaliissutit atugassanngortinneqarsimasut pillugit juunip aallartinnerani killiffiat imaappoq:

 

Aningaasartuutit

Aningaasat akuerisat koruuninngorlugit

 

Aningaasat atorneqartut/kr.[1]

 

Ataatsimiinnermi sutugassaqartitsineq

 

 

3410

Nuummi apummik ilusilersuineq.

 

120.000 koruunit tungaannut aningaasaliissutigineqarput

120.000

Oqaluttuarisaaneq pillugu allagartalersuutit

 

20.000 koruunit tungaannut aningaasaliissutigineqarput

6.000

Qiajuk Studio – Nuummi innuttaasunut qitittarfimmik pilersitsinissaq pillugu filmimik takutitsineq oqallinnerlu

10.000

10.000

René Design – paasissutissanik naqiterinermut

8.762

8.762

Arsaattarfiit eqqaanni qullilersuineq ungalulersuinerlu

(Maluginiagassaq Suliassaq naammassippat aatsaat tunniunneqassapput)

152.990 kr.

0

Qinnuteqarneq – Meqqaanut sumiginnakkanut angalatitsineq, Meeqqat Ikiortigit

12.025

12.025

Nordisk Koncertkor (Nunani Avannarlerni Erinarsoqatigiit)

34.000

34.000

Nunani Tamalaani Katersugaasiviit Ulluat

26.000

26.000

Nuuk Nordisk Kulturfesitval 2019 (NAPA)

300.000

300.000

Uanga Timera – Teaterprojekt på skolerne

100.000

100.000

Suliniut Law Shifters, Nuummi Eqquiitsulianik Saqqummersitsivik

60.000

60.000

Suliniut Narsarsuaq/Sletten. Blok 1-10 my home is where my heart is (angerlarsimaffiga uummatinniippoq)

200.000

200.000

Saqqummersitaq Pinnersaat, Nuummi Eqqumiitsulianik Saqqummersitsivik

65.000

60.000

Katillugit

1.108.777 kr.

935.270

 

 

Aningaasat atorsinnaasat

Atuineq:

Atorsinnaasat:

 

Kr. 3.970.000

 

Kr. 935.270

 

Kr. 3.034.730

 

Inassuteqaatigineqarpoq

Inassuteqaatigineqarpoq:

  • Ilisimatitsissut tusaatitut tiguneqassasoq

 


[1] Suliniutinut ataasiakkaanut inaarutaasumik naatsorsuusiat sillimaffigineqassaaq. Aningaasat atorneqanngitsoortut Najukkami Ataatsimiititamut utertinneqassapput

 

Aalajangerneq

Ilisimatitsissut tusaatitut tiguneqassasoq

Aalajangiiffigisassat

Suliassamik saqqummiussaq

Aaliangiussaq

Qinnuteqaat – Josef Tarrak teater

Suliassamik saqqummiussaq

Qinnuteqaat – Josef Tarrak teater

 

Marlunngorneq maajip 21-anni 2019 Nuummi Najukkami Ataatsimiititaliaq qinnuteqaammik tigusaqarpoq, isiginnaagassialiornissamut Nuummi inuusuttunut sammitinneqartumut aningaasanik tapiiffigineqarnissamik qinnuteqaat. Isiginnaagassiaq nipilersornermik tunngaveqarpoq oqaasertaalu rappertartumit Josef Tarrak Petrussen-imit allataapput, taannalu isiginnaagassiami aamma pingaarnertut inuttaassaaq.

Isiginnaagassiami meeqqat atuarfianni angajullerni atuartut aamma inuusuttut 14-21-llu akornanni ukiullit eqqarsaatigineqarput.

 

Katillugit 326.920 koruunit qinnutigineqarput.

 

Suliniutip allaaserinerani ilaatigut allaqqavoq:

 

(…) isumaqarpugut inuusuttut iserlutik isiginnaagassiamik takusaqarnissaat pingaaruteqartuusoq. Isiginnaartitsissummi qulequttat inuusortorpassuit aqqusaartagaat sammineqassapput, aamma uagut inuiaqatigiittut akisussaaffipput apeqquserneqarpoq kiisalu uagut inuttut nammineq.

 

Tapiissuteqarnissigut isiginnaartitsissutip isiginnaartitsissutigilivinnginnerani misiliinermi meeqqat atuarfii arlallit akeqanngitsumik isiginnaarsinnaanerinut aggersaasinnaanitsinnut periarfissinneqassaagut.

Uani isiginnaartitsissusiornissap aallartinneqarnissaanut, soorlu isiginnaartitsissummi atortussanut, isiginnaartitsiviup isikkussaanik aaqqissuisartumut kiisalu isiginnaartitsissutip ingerlanerani filmimut tapiiffigineqarnissaq qinnutigineqarpoq. Inuusuttut ullumikkut attaveqatigiiffinnik (tusagassiornikkut, isiginnaagassiornikkut atugassiornikkullu) atuisuupput, taamaattumik ilaatinneqarnissaa pingaartutut isumaqarfigivarput, ullutsinnut malinnaasuujumalluta (…).

 

Isiginnaagassiaq taanna ullumikkut pisunut attuumassuteqarluinnartuusoq isumaqarpugut, qulequttanik imminut toquttarnermut aamma sumiginnagaanermut sammisaqarmat aammattaaq inuusuttut maligassiuerusussuseqalersissavai, Josef-ip oqaluttuaanik tusarnaarnermikkut.

 

Suliniut pillugu allaaserisaq ilanngunneqartoq annertunerusumik paasisaqarfigineqarsinnaavoq.

 

Allatseqarfimmiit oqaaseqaatit

Meeqqat atuarfianni angajullerni atuartut, 1 G immaqalu klubbit ilai isiginnaagassiap isiginnaartitsissutigineqannginnerani misiliinermi akeqanngitsumik isiginnaariaqquneqassapput. Taassuma kingorna billetsi 60-70 koruunit missaannik akeqartinneqassaaq.

 

Inassuteqaat

Inassutigineqarpoq:

- suliniut aningaasatigut tapiiffigineqassanersoq Nuummi Najukkami Ataatsimiititaliamit aalajangiiffigineqassasoq

 

Ilanngussat

1. Qinnuteqaat

2. Qinnuteqarnermi immersugassaq

3. Missingersuutit

Aalajangerneq

Naleraq Eugenius suliamut attuumassuteqarnini pissutigalugu aalajangeeqataasinnaanani nalunaarpoq, inilu qimallugu.

Nuummi Najukkami Ataatsimiititaliap aalajangerpaa, qinnuteqaat ilaannakortumik akuerineqassasoq suliniummullu 251.920 koruuninik tapiissuteqartoqassasoq, oqaaseqaatigalugu Nuummi innuttaasut inuusuttut mininneqarajuttut, taakkununngalu kulturikkut suliniutinut Najukkami Ataatsimiititaliap tapersiisarnissani kissaatigigaa.

5-it akuersipput 4-llu itigartitsillutik

Qinnuteqaat – “Taquaasivinnik atorfissaqartitsineq”, Qualture

Suliassamik saqqummiussaq

Qinnuteqaat – “Taquaasivinnik atorfissaqartitsineq”, Qualture

 

 "Taquaasivinnik atorfissaqartitsineq" avatangiisinik innarliinaveersaartunit Qualture-mit suliniummik ingerlatsisumit sapaammi maajip 26-ianni Nuummi Najukkami Ataatsimiititaliaq qinnuteqaammik tigusaqarpoq. Suliniummi siunertarineqarpoq, Nuummi innuttaasutilloqarfimmi neriniartarfinni, cafeni kantiinanilu poortuutissanik ataasiaannartakkanik atuinermut taarsiullugu taquaasivinnik atoqqiinissaannik suliniuteqarnissaq.

 

Qinnuteqaatigineqarput katillugit 52.000 koruunit.

 

Suliniutip allaaserinerani ilaatigut allassimavoq:

 

(…) siunertaavoq:

 

  • Nuummi poortuutissanik ataasiaannartakkanik atuinerup annikillisarneqarnissaa, aammalu ullup qeqqasiornermi nerisassanut poortuutigineqartartunik nungusaataanngitsunik avatangiisinullu naviananngitsunik atuinerunissaq siunertaralugu.

 

  • Ullup qeqqasiornermi nerisassanut poortuutigineqarsimasut igiinnarneqartarnerat pillugu oqallineq taamaatillugu Nuummi innuttaasut nerisassanut poortuutissanik nungusaataanngitsunik atuilernissaat siuarsarniarlugu. Isumaqarpugut ullup qeqqasiornermi oqallittarnermi, nerisassanut poortuutissat nungusaataanngitsut oqallinnermik isumassarsiornermillu pilersitseqataasinnaasut.  Isumaqarpugut ullup qeqqasiornermi nungusaataanngitsumik atuineq pillugu isummanik paarlaasseqatigiiffittut oqalliffittut atorluarneqarsinnaasoq, tassanimi inuit assigiinngitsorpassuit ullup qeqqasiorlutik nereqatigiittarmata. Taamaattumik suliniummi taquaasiviit pineqarput.

 

Suliniut ima naammassiniarneqarpoq:

 

  1. Aallaqqaammut neriniartarfiit, cafet, mamartunik nerisassaarniarfiit kantiinallu suliniummut peqataatinniarneqassapput.
  2.  Neriniartarfinni taquaasivinnik atuiffiusinnaasuni nipitittakkanik tunniussisoqassaaq pisiniarfiusuni takussaasumut nipitinneqartussanik. Nipitittakkami tassani takuneqarsinnaassaaq suliffeqarfik imaluunniit pisiniarfik nerisassanut poortuutissanik ataasiaannartakkanik atuinani atoqqitassanik atuinermik illersuisuusoq. Taamaaliornikkut suliffeqarfiit avatangiisit pillugit nittarsaassisoqarnerani pitsaasumik naleqartitaqartutut nittarsaanneqassapput. Nipitittakkat atorlugit aamma innuttaasunut erseqqissaatigineqassaaq, taquaasiviit sumi atorneqarsinnaanersut.
  3. Nuuk Centerimi innuttaasut taquaasivinnik agguaassiffigissavagut. Kikkut tamarmik taquaasivinnik pisinnaapput, nerisassanut poortuutissanik ataasiaannartakkanik ullup qeqqasiornerminni atuisarnerminnilu apeqqutit akisassat akippatigit. Taquaasiviit taakkua illoqarfinni neriniartarfinni, cafeni, mamartunik nerisassaarniarfinni kantiinanilu  nerisassanik annisassanik pisiniartarfinni pisianut atorneqarsinnaapput. Taquaasiviit atoqqinneqarsinnaasut atornerisigut akikillisaasoqartarnissaa siunertaraarput, tassami neriniartarfiit poortuutissanik ataasiaannarlugit atorneqartartunik pisiniarnerminni aningaasartuutissaminnik sipaaruteqassammata.
  4. Una aqqutigalugu #brugformadkasser innuttaasut ”taquaasivinnik atuinermi misigisat” inuit attaveqaqatigiittarfiisigut agguaattarsinnaavaat (Facebook aamma Instagram). Tamanna taquaasivinni quppersakkami ilanngussami atuarneqarsinnaavoq.

 

Inassuteqaat

Inassutigineqarpoq:

- suliniut aningaasatigut tapiiffigineqassanersoq Nuummi Najukkami Ataatsimiititaliamit aalajangiiffigineqassasoq

 

Ilanngussat

1. Qinnuteqaat

 

Aalajangerneq

Nuummi Najukkami Ataatsimiititaliap qinnuteqaat itigartitsissutigaat ima oqaasertalerlugu:

Nuummi Najukkami Ataatsimiititaliamit isumassarsiaq pitsaasutut isigineqarpoq, suliniummullu tunngavigineqartut siunertaasorlu akuersaarlugu. Najukkami Ataatsimiititaliamit suliniut tapiissuteqarfigineqassappat pilersaarut sukumiisoq suliarilluagarlu piumasarineqarpoq, tulliuttullu akissutaanik assersuutigalugu imaqarsinnaalluni:

  • Neriniartarfinnik/kantiinanit isumaqatigiissutit piviusut imaluunniit suleqatigiinnissamut neriniartarfinnit akuersissutit
  • Taquaasiviit kikkunnut agguaanneqassappat? Kikkut sullinniarneqarpat?
  • Taquaasiviit qanoq isikkoqarpat? Oqariartuutinik/allassimasunik naqinneqassappat, taamaalillutik atuisut suna siunertaanersoq ilisimassagamikku imaluunniit qaammarsaasoqassava?
  • Ingerlariaqqinnissamut pilersaarut – taquaasiviit 200t agguaanneqareerpata susoqassava? Suliniut naliliiffigineqassava? Suliniut ineriartortinneqassava? Taquaasivinnik piseqqittoqassava imaluunniit taquaasivik sunaluunniit angerlarsimaffimmiit nassataq atorlugu nerisassanik aallertoqarsinnaava?

Nuummi Najukkami Ataatsimiititaliap suliniummik ingerlatsinerup iluatsilluarnissaanik kissaappaasi nutaamillu qinnuteqaammik tigusinissani ammaffigalugu.

Qinnuteqaat: Work in progress – Avannaamioqatigiit oqaluttuatoqaataat

Suliassamik saqqummiussaq

Qinnuteqaat: Work in progress – Avannaamioqatigiit oqaluttuatoqaataat


 

Marlunngorneq ulloq 28. maj 2019 Nuumi Najukkami Ataatsimiititaliaq Seid Productionimiit Nunatta Isiginnaartitsisarfiani Work in Porgress (*WIP) august 2019-imi takutinnissaanut aningaasatigut taperneqarnissamik qinnuteqaat tiguaat. Isiginnaagassiami siunertarineqarpoq eqqumiitsuliornerup Nuummi innuttaasunut  tikikkuminartunngortinneqarnissaa taamaattorli isiginnaartunut iserneq akeqassanngilaq.

 

Katillugit 150.000 koruunit qinnutigineqarput.

 

Suliniutip allaaserinerani ilaatigut allassimavoq:

 

"Asseqanngitsumik pilersitserusuppunga, Nuummi avannaamioqatigiinniluunniit takuneqarsimanngitsumik", oqaatsit taakkua Madelaine Gordon Graadahlimut tunngaviliisuullutillu piumassuseqartitsisuupput, 2018-mi ukiami avannaamioqatigiit oqaluttuatoqaataat misissorniarlugit aalajangersimavoq, taakkualu tunngavigalugit isiginnaagassiamik tupinnartuliamik pilersitsisinnaajumalluni. Isiginnaartitsisarfik, erinarsuutit, qitinneq angakkuarnerlu suliniummi sammisani qitiupput aammalu kalaallit kulturianut Nuummilu innuttaasunut naleqquttumik eqqumiitsuliornerup tikikkuminartuunissaa siunertaralugu.

 

Nuummi sapaatit akunnerni marlunni ingerlasumi (juli-august 2019) Seid Productions paasisassarsiorniarpoq taavalu isiginnaagassiortartut peqataasut peqatigalugit isiginnaagassiaq WIP* katitissallugu. Isiginnaartunut tiguartinnarsinnaasumik isiginnaartitsisarfik, erinarsuutit, qitinneq angakkuartarnerlu pingaarnerutillugit isiginnaartitsinerup tupinnartup pilersinnissaa siunertarineqarpoq.

 

Eqqumiitsuliortut suleqatigissallugit paarlaateqatigissallugillu pingaartipparput taamaattorli najukkami eqqumiitsuliortut suliami peqataatikkusuppavut, soorlu isiginnaagassiortartut nipilersortartullu. Aammattaaq najukkami soqutigisallit kalaallillu oqaluttualiaatitoqaannik ilisimasalinnik peqataatitsiniarpugut, paasissutissanik isumassarsiassanillu pissarsiaqarfiusinnaasunik.

 

Inassuteqaat

Inassutigineqarpoq:

- suliniut aningaasatigut tapiiffigineqassanersoq Nuummi Najukkami Ataatsimiititaliamit aalajangiiffigineqassasoq

 

Ilanngussat

1. Qinnuteqarnermi immersugassaq

2. Suliassap allaaserineqarnera

3. Missingersuutit

 

Aalajangerneq

Nuummi Najukkami Ataatsimiititaliap qinnuteqaat itigartitsissutigaa, oqaaseqaatigalugu isiginnaagassiap imarisaanut tunngatillugu paasissutissat amigaatigineqartut kiisalu isiginnaagassiamut work in progress-imut innuttaasut qassit isiginnaariarsinnaanersut paasissutissat amigaatigineqartut. Innuttaasut isiginnaagassiamut isiginnaariartussat amerlassusaat eqqarsaatigalugu aningaasat qinnutigineqartut amerlavallaarsorineqarput.

1 akuersivoq, 3 taasinngillat, 4-llu akerliupput.

Nuummi oqaluffiit eqqaanniittut pillugit saaffiginnissut

Suliassamik saqqummiussaq

Nuummi oqaluffiit eqqaanniittut pillugit saaffiginnissut

 

Marlunngorneq 21. maaji 2019 Najukkami Ataatsimiititaliami sinniisussap aappaa Jutho Wilche Nuummi oqaluffiit marluk eqqaanniittut pitsanngorsaavigineqarnissaannut siunnersuuteqarluni saaffiginnippoq.

 

Saaffiginninnermi Rasmus Berthelsenip Aqqutaa, Annaassisitta Oqaluffiata avannaaniittoq innersuussutigineqarpoq. Saaffiginninnermi allassimavoq, aqqusinermi qaammaqqutit amigaatigineqartut aqqusinerlu iluarsaanneqartariaqartoq.

 

Tassani saqqummiunneqarpoq, Hans Egedep oqaluffiata eqqaani pisuinnaat aqqutaat/majuartarfiit aserfallassimasut iluarsaanneqartariaqartullu.

Pisuinnaat aqqutaani tigummiviit aamma taamaapput, arlallit sukkut tamaana uppeqqapput pisuinnaallu aqqutaatigoortunut isumannarlutik. Nutaanik ullutsinnut naleqquttunik majuartarfiliortoqarnissaa saaffiginninnermi siunnersuutigineqarpoq.

 

Allatseqarfimmiit oqaaseqaatit

Sumiiffinni pineqartut pillugit saaffiginnissut pillugu Allatseqarfiup Sanarfinermut Avatangiisinullu Ingerlatsivik oqaloqatigaa.

 

Sanarfinermut Avatangiisinullu Ingerlatsiviup Hans Egedep Oqaluffiata tungaanut pisuinnaat aqqutaanni tigummiviit kiisalu pisuinnaat aqqutaat suliassat tiguai, ukiuunerani aputaajarnermi ilaat aserorneqarsimammata. Taamaattorli pisuinnaat aqqutaat iluarsartuunneqassaaq nutaanillu majuartarfiliortoqarnani, tamanna saaffiginnissummi apeqqutigineqaraluarpoq.

 

Tassunga atatillugu Sanarfinermut Avatangiisinullu Ingerlatsiviup Annaassisitta Oqaluffiata eqqaani Rasmus Berthelsenip aqqutaa misissorpaa. Ingerlatsiviup aqqut ajorpallaanngitsoq nalilerpaa. Tamanna pillugu Sanarfinermut Avatangiisinullu Ingerlatsivik annertuumik tassani iluarsartuussissanngilaq. Isumaqatigineqarporli B-138-p eqqaani qaammaqqutit pitsanngorsarneqarsinnaasut. Nuummi Najukkami Ataatsimiititaliap Rasmus Berthelsenip Aqqutaani qaammaqqutit pitsanngorsarneqarnissaat sulissutigeqqinnissaa kissaatigippagu, kommunimi Illoqarfimmik Inerisaaneq saaffigineqassaaq, sumiiffik allanngutsaaliugassatut eriagisassatullu nalunaarsoqqammat. Tamatuma kingorna Nukissiorfiit attavigineqassapput.

 

Allatseqarfiup inassuteqaatigaa, Najukkami Ataatsimiititaliap Aqqaluup Aneerasaartarfiata eqqaalu iluarsartuunneqarnissaanut suliniummut aallarteqqammersumut atatillugu qaammaqqutit pitsanngorsaavigineqarnissaat kissaatigineqartoq erseqqissaatigineqassasoq.

 

Aqqaluup Aneerasaartarfiata eqqaani iluarsartuussineq kommunimi Illoqarfimmik Inerisaanermit aallartinneqarpoq, tassungalu atatillugu innuttaasut peqataatinneqarnissaat pingaartinneqarpoq. Tamanna pillugu ilaatigut Najukkami Ataatsimiititaliaq ulloq 27. maaji 2019 workshoppernissamut qaaqqusaavoq, tassanilu Najukkami Ataatsimiititaliami ilaasortat sisamat peqataapput.

 

Inassuteqaat

Inassutigineqarpoq:

- Najukkami Ataatsimiititaliamit saaffiginnissut oqaluuserineqassasoq aalajangiiffigalugu Najukkami Ataatsimiititaliamit suliaq ingerlateqqinneqassanersoq.

 

Ilanngussat

1. Hans Egede Kirkep Oqaluffia pillugu saaffiginnissut

2. Annaassisitta Oqaluffia pillugu saaffiginnissut

 

Aalajangerneq

Nuummi Najukkami Ataatsimiititaliamit saaffiginnissut ilisimatitsissutitut tiguneqarpoq. Allatseqarfik Sanarfinermut Avatangiisinullu Ingerlatsivimmut saaffiginnissuteqaqquneqarpoq, Hans Egedep Oqaluffiata eqqaani majuartarfimmut taarsiullugu asfaltilimmik aqqusineeraliortoqarnissaa, taamalu innuttaasunit pisuutilinnit barnevognilinnillu atorneqarsinnaalernissaata misissuiffiginissaa pillugu.

Taasariaqartut allat

Suliassamik saqqummiussaq

Aaliangiussaq

6A: Qinnuteqaat – Tamanut eqqaamiunut atoqqitassaarniartitsinissaq/aqqusinermi nuannatitsinissaq

Najukkami Ataatsimiititaliaq marlunngorneq 4. juuni 2019 Qinngutsinni Asiarpami najugaqartumit aningaasanik tapiiffigineqarnissamik qinnuteqaammik tigusivoq. Asiarpami innuttaasut eqqaamiunut atoqqiitassanik tuniniaatitsineq ingerlakkusuppaat ulloq 22. aamma 23. juuni 2019, tassungalu atatillugu pissittaarfimmi pinnguartitsineq (hoppeborg), kiinnanut qalipaaneq allanillu sammisassaqartitsinerit ingerlakkusuppaat. Nuummi innuttaasut tamarmik tikilluaqqusaapput pisussarlu Nuuk Ugeavis aqqutigalugu sapaatip-akunnerini 24-mi aamma 25-mi nalunaarutigineqassaaq.

 

Qinnuteqaatigineqarput katillugit 5100 koruunit.

 

Qinnuteqaammi ilaatigut allassimavoq:

 

“Kikkunnut tamanut aasami nuannisartitsinissaq siunertaavoq. (…) Najugaqartut aqqusinerput Nuummi pitsaanerpaanngortinneqarnissaanut kajumissaarneqarput ataatsimuussuseqarluarnikkut kiisalu eqqakkanik aamma qimmit anaanik katersinikkut, naasunik pinnersaanikkut, bænkinik kusanartunik nammineq sanaartornikkut il.il. (…)”

 

Inassuteqaat

Inassutigineqarpoq:

- suliniut aningaasatigut tapiiffigineqassanersoq Nuummi Najukkami Ataatsimiititaliamit aalajangiiffigineqassasoq

 

Ilanngussat

1. Qinnuteqarnermi immersugassaq

 

Aalajangerneq

Nuummi Najukkami Ataatsimiititaliap qinnuteqaatip akuerineqarnissaa aalajangiuppaa suliniummullu 5100 koruuninik tapiissuteqartoqassasoq, oqaaseqaatigalugu Asiarpami ineqartut aqqusinerminni susassaqartitsinissamut piumassuseqarnerat kiisalu ataatsimoornerulernissamut najukkamilu pissutsinik pitsanngorsaataasumik iliuuseqarusunnerat nuannaarutigalugu.

 

6B: Ilaqutariinnut timersortitsisarnissamut timersortarfimmi akunnernik inniminniinissaq pillugu saaffiginnissut

Siusinnerusukkut ilaqutariinnut timersortitsisarnissamut aallartitsinissamik isumassarsiaq pillugu Nadia Aviaq Olsenip kissaatigaa, piffissaliussaq 11. juuni nallertinnagu timersortarfimmi akunnernik qinnuteqarnissaq oqaluuserineqassasoq.

Nuummi Najukkammi Ataatsimiititaliaq qaammammut ataasiarluni akunnermik ataatsimik, assersuutigalugu tallimanngorneq sapaalluunniit innuttaasut tamarmik nuannisarfigisinnaasaanni timersuutinillu assigiinngitsunik misileraaffigisinnaasaannik, timersortarfimmut piffissamik qinnuteqassasoq siunnersuutigineqarpoq.

Ilaatigut timersoqatigiiffiit ilaasortanik amigaateqartut suleqatiginiarneqarsinnaapput kiisalu kommunimi Peqqinnermut Susassaqartitsinermullu Immikkoortortaqarfik.

 

Aalajangerneq

Nadia Aviaq Olsen aamma Arnarissoq Fleischer qinnuteqaatitut siunnersuusiussasut aalajangerneqarpoq, taannalu Najukkami Ataatsimiititaliami ilaasortanut nassiunneqassaaq piffissaliussaq 11. juuni 2019 nallertinnagu.

Imaqarniliap akuerineqarnera

Suliassamik saqqummiussaq

Aaliangiussaq