Quppernermi uani atuarfiup siulersuisuinut qinersineq pillugu annerusumik atuarsinnaavat – Uani ilaalluni qaqugu qinersinerup pinissaa.
Ukioq kommunalbestyrelsimut qinersiviusoq assigalugu kommunimi meeqqaat atuarfiini siulersuisussanik qinersineq ingerlanneqartarpoq. Atuarfimmi siulersuisut kikkut tamat oqartussaaqataanerat tunngavigalugu atuarfinni tamani ingerlanneqartarpoq, siunertaallunilu atuarfinni ataasiakkaani ingerlatsinermut najoqqutassaliornissaq aamma atuarfimmik ineriartortitsinissamut suleqatigiinnissaq. Atuarfinni ataasiakkaani atuartut amerlassusii aallaavigalugit siulersuisuni ilaasortat amerlassusilerneqartarput.
Atuarfinni ataasiakkaani siulersuisut atuartunut angajoqqaat aamma atuartut ilinniartitsisullu sinnerlugit toqqarneqarsimasunik ilaasortaqartarput. Atuarfiup pisortaa pisortallu tullersortaa atuarfimmi siulersuisuni aamma ilaasortaasarput. Ilaasortat tamarmik sinniisuuffigisaminnit toqqarneqartarput. Ima paasillugu, angajoqqaanut sinniisut assersuutigalugu atuarfimmi atuartut angajoqqaavinut sinniisut taakku akornanneersumik taakkunannga toqqarneqartartoq. Atuarfimmi atuartut ilinniartitsisullu sinniisaat aamma taamatut. Taamaattorli atuarfiup pisortaa pisortallu tullersortaa marluullutik ”aalajangersimasumik” ilaasortassaareertarput, ima isumaqarluni atuarfimmi siulersuisuni ilaasortassaareertartut.
Atuarfiup pisortaa atuarfimmi siulersuisut ataatsimiinneranni allattaanissamik suliassaqarpoq, pisortap tullersortaalu marluullutik ataatsimiinnerni taasisinnaatitaanngillat. Ilaasortalli sinneri taasisinnaatitaapput. Atuarfimmi siulersuisut siulittaasoqassapput, atuarfimmilu siulersuisussarsiortoqareernerata kingorna inissitsiterluni ataatsimiinnermi siulersuisuni ilaasortanngortut tamatuminnga toqqaassapput. Siulittaasoq atuarfimmi atuartut angajoqqaavi sinnerlugit ilaasortat akornannit toqqarneqassaaq. Qinigaaffik ukiunik sisamanik sivisussuseqassaaq, tassa imaappoq, atuarfinni siulersuisunut qinersinissap tullia 2025-mi pissaaq.
Atuarfimmi atuarfiup siulersuisuini angajoqqaat ilaasortaatitassaannik qinersineq pillugu nalunaarummi § 27 naapertorlugu kommunalbestyrelsip qinersinerup inernerata naatsorsorneqarnera piareerniariarpat saqqummiuttussaavaa. Kommunalbestyrelsip aamma qinersinermi inerit tamanut nalunaarutigissavai.