Nuummi discimik golferluni unammisarfik siulleq 9-nik putulik Nuffiumanermi innuttaasunut tamanut ammarneqarpoq. Bane akeqanngilaq tamanullu ammalluni aamma meeqqanut, inuusuttunut inersimasunullu pinngortitami sammisaqarusuttartunut neqeroorutitut pilersinneqarpoq. Atuisut namminneq discimik (frisbeemik) nassartassapput.
Discgolf timersuutaavoq golf-ernermut nalinginnaasumut assingusoq, tassanilu disc (frisbee) koorimut periarneqartarpoq. Timersuutaavoq aalanermik, eqqoqqissaarinermik pilersaarusiornermillu akuleriissitsisoq. Anguniagaasarpoq unammiffimmi sapinngisamik ikinnerpaanik periarnissaq.
Discimik golferluni unammisarfimmik pilersitsineq kommunip timip aalatinnissaanut sunngiffimmilu silamiinnissamut akeqanngitsunik tikikkuminartunillu pilersitsinissamik kissaataanut tulluartuuvoq:
“Frisbee nammineq pigisaq nassarlugu aggerit, ullumilu unammisarfik misilikkiartorlugu. Unammisarfik tikikkuminartumiippoq, neriuutigivarpullu illalaarnernut, unammiuaarnernut aamma kinguaariit tulleriit akornanni avatangiisimi kusanartumi peqatigiinnermik katersuuffigilluarneqalerumaartoq. Aallarterlaat sungiussereersimasullu pinnguaqataasinnaapput nuannersumillu misigisaqarfigalugu. Eqqaamallugu immikkoortumiittut atuisut allat eqqarsaatigisarnissaat. Unammiffiup atulerneqarnissaa qilanaarivarput.”– Jonas Lundsgaard Nilsson oqarpoq, Kommuneqarfik Sermersuumi Kultureqarnermut immikkoortoqarfimmi aqutsisoq.
Suliniut Nuummi Najukkami Ataatsimiititaliamit tapiiffigineqarpoq. Ineriartortinneqarpoq Islandimi discgolfertartut peqatigiiffiat suleqatigalugu, misilittagaqarluartoq unammiffissallu ilusissaanik inissisimaffissaanillu siunnersueqataasoq.
Pinnguarnermi malittarisassat
Discgolf golf-ernertut nalinginnaasutut ingerlanneqartarpoq, tassani taamaallaat frisbee golf-ip arsaaraanut taarsiullugu atorneqartarpoq. Anguniagaasarpoq koori sapinngisamik ikinnerpaariarluni ikisiffigeriartarnissaa.
Unammiffimmi putut qulingiluaapput. Putunut tamanut aallartiffissat marluupput:
- aallartiffik nalinginnaasoq
- meeqqanut/aallarterlaanut aallartittarfik naannerusoq
Ima unammisoqartarpoq:
- aallartiffissami nalunaaqutserneqarsimasumit aallartigit
- periartussaq koorimut ungasinnermi inissisimasoq periarluni aallarteqqaartuaannassaaq
- discirisappit tuffia milorujussilluni aallartiffiujuaannassaaq
- unammineq naammassisarpoq disc koorimut ikigaangat kalunnernulluunniit nivinngaraangat
Inniminnigit: Atuisunut tamanut kaammattuutigissavarput perialersinnani sumiiffigisami sammiviup inoqannginnissaata qulakkeerneqaqqaartarnissaa, atuisunut allanut mianerisaqartarnissaq aamma iliveqarfimmut ataqqinnilluinnartarnissaq, ilisisoqarneranilu. Ilisisoqartillugu allatulluunniit ilagiinnut tunngasunik pisoqartillugu unammineq unitsinneqarallartassaaq kinguartinneqarluniluunniit.
Malugiuk: Ukioq manna kingusinnerusukkut aamma teepads-it ivigaaraasartallit bænkitallillu pilersinneqassapput, aallartittarfiup sumiinneranik nunap assinganik takussutissiamik, unammiffiup ingerlaarfianik aamma malittarisassanik allagartarsualiisoqassaaq kiisalu meeqqanut aallartittarfiinik nalunaaqutsersuisoqassalluni.
Immikkoortortaq nuna siunertamut akuerisaavoq. Inissisimaffissaa toqqarneqarpoq pisuffiit aqqutaat pioreersut, ujakkaarluni ingerlaarfiit innimigalugit, tamannalu Sisorarfiit allallu sisorartartut klubbii oqaloqatiginerisigut pivoq.
Qaammatit tulliuttut ingerlaneranni ammaanersiortoqassaaq.
