Innuttaasut angerlarsimaffeqanngitsut Nuummi Sipisaq Kangillermi toqqiniittartut pillugit KNR-imi ilanngutassiarineqarput. Toqqit kommunimiit innuttaasunut peeqquneqarsimasut ilanngutassiami atuarneqarsinnaavoq. Suliap ingerlarnga aalajangiinermut tunngaviliisoq pillugu paasissutissat annertunerusut uani atuarsinnaavatit.
Suliaq inunnut amerlanngitsunut tunngasuummat apeqqutit inuit atugaannut sulianullu ataasiakkaanut tunngassuteqarsinnaapput. Paasissutissat taamaattut kommunimiit tamanut ammasumik oqaaseqarfigineqarsinnaanngillat kisianni suliap nalinginnaasumik ingerlarnga innuttaasunullu angerlarsimaffeqanngitsunut kommunimiit neqeroorutaasoq paasissutissiissutigineqarsinnaapput. Tamanna tunngavigaluguttaaq suliaq pillugu borgmesterip KNR-imi apersorneqarnissani taamaatippaa.
Innuttaasut saaffiginninnerat tunngavigalugu suliaq aallartinneqarpoq
Sumiiffimmi pissutsit pillugit innuttaasuniit saaffiginnissuteqartoqarlunilu naammagittaalliuuteqartoqareersorlu suliaq kommunimiit aallartinneqarpoq. Nunaminertaq tamanit atorneqarsinnaasoq pisarialimmik akuersissuteqanngitsumik atorneqartillugu kommune nunaminertanut oqartussaasutut qisuariartussaatitaavoq.
Nunaminertaq pineqartoq nunaminertamik atuinissamut tunniunneqanngitsutut imaluunniit nunaminertamik atuinissamut akuersissuteqanngitsumik piffissami sivisunerusumi najugaqarfissatut atorneqalerpoq. Taamaalilluni atorneqarnera pilersaarusiornermut inatsimmi aalajangersakkanut naapertuutinngilaq. Toqqit peerneqarnissaannut kommunimiit aalajangiisoqareersorlu Aningaasaqarnermut Akileraartarnermullu Naalakkersuisoqarfimmiit aalajangiusimaneqarpoq.
Inissisimaffia atorneqarneralu maleruagassanut atuuttunut eqquutsitsippat, najugaqarfinnit allanit qaninnerpaamik 500 meterinik ungasitsigitillugu tupermi unnuineq aallaaviatigut pisinnaasoq innuttaasunut pineqartunut ilisimatitsissutigineqarpoq.
Aalajangiinerit matumuunatut ittut kajumissutsimik eqquutsinneqartinnagit, toqqit peerneqarnissaannut atatillugu kommunimiit politiinut suliassatut noqqaassutigineqarsinnaavoq. Tamanna kommunimiit ornigulluni pissaanerup atoqqusaannginneranik peqquteqarpoq.
Innuttaasunut angerlarsimaffeqanngitsunut ikiuineq
Kommunimi aqqusinermi ujartuillutik angalaartartut Nuummi innuttaasut angerlarsimaffeqanngitsut akornanni ujartuisarput innuttaasullu ataasiakkaat killiffii pisariaqartitaallu aallaavigalugit ikiuinissamik neqerooruteqartarlutik. Ilaatigut angerlarsimaffeqanngitsunut unnuiffimmiissinnaanermut, tapersersuinissamut aamma namminerisamik inigisassami najugaqarnissamut sungiusarnermut neqeroorutit isumaginninnikkulluunniit neqeroorutit allat pineqarput. Aqqusinermi ujartuillutik angalaartartoqatigiit ataavartumik malinnaasarput neqeroorutillu uteqqittarlugit, aamma naak innuttaasoq siullermik neqeroorfigineqarnermini itigartitsigaluarpat.
Innuttaasut pineqartut innimigineqartussaammata, ataasiakkaat neqeroorutinik qanoq ittunik tunineqarsimasut akuersisimasulluunniit kommunimiit oqaaseqarfigineqarsinnaanngillat.
Angerlarsimaffeqanngitsunut ikiorsiineq