Ilinniaqqinnissannut sulilernissannulluunniit periarfissatit pitsanngorsarusuppigit? Taamaappat Majoriami piginnaanngorsaqqinnissaq aallartiffiusinnaavoq. Kommunip Majoriaqarfiini sisamaasuni aggustimi aallartinniaruit kingusinnerpaamik aggustip 7-iani qinnuteqassaatit.
Innuttaasut ilinniakkaminnik pitsanngorsaarusuttut Majoriami piginnaangorsaqqissinnaapput. Ilinniaqqinnissamut pilerigisannut aqqutaasinnaavoq – immaqalu suliffigilerusutannut.
Majoriami aallartikkusukkuit Majoriaqarfik qaninnerpaasat attaveqarfigisinnaavat. Ingerlariaqqiffigisinnaasatillu pitsaasut pillugit inuussutissarsiornermut ilinniarnermullu siunnersorti oqaloqatigisinnaavat. Pisariaqartitatit, anguniakkatit periarfissatillu aallaavigalugit iliuusissiamik pilersaarusioqatigiissaasi.
Innuttaasorpassuit ilinniaqqinnissaannut sulilernissaannullu Majoriaqarfiit aqqutissiuisareerput. Taakku ilagaat Albertine Sørensen, taanna Majoriami atuareerluni imminut naleqartinnerulerpoq, Greenland Business Schoolimilu ilinniartunngorluni. Taanna pillugu oqaluttuaq uani atuarsinnaavat.
Kommunip Nuummi, Tasiilami, Paamiuni Ittoqqortoormiinilu Majoriaqarfiini tamani Majoriami piginnaanngorsaqqinnissamut neqerooruteqarpoq. Paamiuni Majoriap saniatigut Pilersitsivik periarfissaavoq. Inuusuttut 18-it 25-llu akornanni ukiullit atuagarsorlutik ilinniarnatik assassorlutik sulerusunnerusut tassani aallartinnissaannut neqeroorfigineqartarput. Peqataasut tunngaviusumik ilinniagassanik peqateqarlunilu piginnaanngorsarnermik siunissami ilinniaqqinnissaminni iluaqutigisinnaasaannik sammisaqartinneqartarput. Pilersitsivimmi sulerisarneq pillugu Facebookimi qupperneranni uani paasisaqarsinnaavutit.
Kommunip Majoriaqarfiini tamani Majoriami atualertussat aggustimi aallartissapput. Maanna qinnuteqarit! – kingusinnerpaamik aggustip 7-iani. Atuarnerup ingerlasarnera aamma akuerineqarnissaq pillugu uani paasisaqarnerusinnaavutit.