Asasakka innuttaasut – maani Nuup Saavani katersuuteqataasusi.
Siullermik inuiattut ullorsiornitsinni uummammit pisumik tamassi pilluangaaritsi.
Ullumikkut ulloq tassaavoq ullortuneq.
Siulitta ullorsiutit suli atulinngikkallarmatali ulloq manna aamma ilisimavaat, tassa seqernup qullarnerpaaffia, qaamanerup annertunerpaaffia. Piffissaq ataatsimoorfiulluni pilinermut pinngortitamiinnermullu atorneqartartoq.
Seqernup qaamanerullu eqqaasittuartarpaatigut, qanorluunniit taarsiorfimmiitsigigaluarutta qaamaneq kingumut uteqqittuaannartoq. Tamannalu aamma erfalasutta, maanna nunarsuaq tamakkerlugu ilisimalluarneqalersup, ersersippaa. Seqernup aappilliulluni sermersuakkut nuinera, tassaavoq qaamanerup uteqqinnera. Erfalasuttattaaq ersersittarpaa inuiaasugut immikkuullarissut, immikkut kinaassuseqarluta oqaaseqartugut kultooreqartugullu.
Kultoorikkut naleqartitat kingornutavut inuiattut ullorsiornitsinni nalliussillugillu malunnartittarpagut. Kalaaliunitsinnik tulluusimaaruteqarluta kalaallisoorluta, kalaaliminertuulluta, ilaquttat nunaqqatillu peqatigalugit, erinarsuataarnerit nipilersornerillu aallullugit, silagikkaangallu silamiilluta nuannisaaqatigiittarluta.
Ileqqoq tamanna kusanartoq kingornutarput kingulitsinnut aamma ingerlateqqipparput. Tassaniimmat inuiattut ataatsimoorfipput nukittoqquterpullu.
Inuiaavugut amerlanngitsut, pissutsillu atukkavut aamma ilaatigut imaannaanngissisinnaasarput. Taamaattumik inuunermi sumiluunniit unammillernartunik nalaataqartilluta nukinnik aallerfissatsinnik pisariaqartitsisarpugut. Ullutsinnilu inuunermi atukkani naatsorsoruminaassinnaasartuni, aqussinnaasattalu avataaniit unammilligassanik takkuttoqartartillugu ataatsimoorfissatsinnik pisariaqartitsisarpugut.
Kommunitsinni innuttaasunut kiffartuussisarnitta pitsaassusia sapinngisarput tamaat eqqumaffigiuarlugulu pitsanngorsaavigiuartarparput. Eqqaarusuppara kommunitsinni ilaqutariit nukittorsarneqarnerat pingaartitatta annerpaat ilagimmassuk. Meeqqat ilaqutariillu nukittuut pitsaasunik sinaakkuteqartikkusullugit Meeqqanut ilaqutariinnullu politikkimik suliaqarnikuuvugut, tassanilu ilaqutariit nukittorsarneqarnerat tigussaasumik pitsaasumillu sunniutilertorpoq, meeqqat angerlarsimaffiup avataanut inissitaasimasut angajoqqaaminnut uteqqissinnaasalernerannik kinguneqartumik.
Pitsanngorsagassaqartillugu pingaaruteqarpoq nassuerutiginnissinnaasarnissaq, aammattaarli iluatsittut nuannaarutigisarnissaat pingaaruteqarpoq. Kommunitsinni nammineq uatsinnut naleqquttunik periuseqarnissarput nutaanillu nassaarsiorsinnaanerput pikkoriffigineruleraluttuinnaratsigu tamanna tulluusimaarnartutut isigaara. Pitsaasumimmi nikeriaqqinniarutta immitsinnut aallaavigaluta politikkeqartariaqarpugut, soorluttaaq aamma aalajangersaanerit qitiusumiit ingerlakkunnaarlugit, aalajangiisinnaassuseq oqartussaaqataanerlu pineqartunut uterteqqillugu sulianik ingerlatsisugut. Illoqarfitsinnut nunaqarfinnullu periusissiat atulernikuupput, ukiorlu manna aamma Paamiut, Ittoqqortoormiit Tasiilallu periusissiaat atuutilissapput. Tassuunakkut aamma innuttaasut kissaataat malillugit ineriartortitsinissaq, akisussaaqatigiinneq aallaavigalugu ingerlanneqassaaq.
Inuiattut ullorsiornitsinni anngukkusutara aamma unaavoq; inuiattut avissaartuuffissarsiorata ataatsimoorfissarsiorta, ataatsimooraangattami nukerujussuaq pilersittaratsigu. Qujanaq maani kommunitsinni innuttaaqataalluarlusi inuiaqatigiinnik ingerlatitseqataagassi. Ullumikkut inuiattut ullorsiornermi, ullortunermi kinaassuserput ersarilluinnartumik kingumut takutipparput: nalliuttorsioqatigiilluta, ataatsimoorluta nukissatsinnillu aallerfigeqatigiilluta. Qanortoq ukiup qanoq ilinera pisullu qanoq ittuuneri apeqqutaatinnagit anersaaq tamanna attattuartigu.
Inuiattut ullorsiornitsinni – ullortunersiornitsinni – tamassi pilluaqqigitsi ullorlu atorluarisiuk.